ကီးတရံးဒီးကြုၤတုၤဝ့ၢ်သ့ၣ်တဖၣ်အပူၤ ပယီၤသုးခးလီၤကျိဖးဒိၣ်တပယူၤဃီ

လါယူၤလံ ၁၅သီ၊၂၀၂၃နံၣ်

ကညီကီၢ်စဲၣ် ကီးတရံးဒီးကြုၤတုၤဝ့ၢ်သ့ၣ်တဖၣ်ပူၤ ခံခီခံကပၤတၢ်ဒုးကဲထီၣ်တအိၣ်၀ဲဘၣ်ဆၣ် ပယီၤသုးခးလီၤကျိဖးဒိၣ်ကိးမုၢ်နံၤဒဲးဟီၣ်ကဝီၤဖိတဖၣ်စံးဝဲန့ၣ်လီၤ

ပယီၤသုးခီၣ်သုးရ့ၣ်(ခလရ–၉၇)ဒီးလ့ၣ်ဝကျိဖးဒိၣ်လုၣ်လၢအိၣ်ဆီလီၤသးဖဲကီးတရံး၀့ၢ်ပူၤတဖၣ်အံၤ ခးလီၤကျိဖးဒိၣ်ကိးမုၢ်နံၤဒဲးဆူ ကီးတရံးဝ့ၢ်အဃၢၢ် ကမဲၣ်ကိသဝီ၊ရွၣ်တဲရှ့ၣ်သဝီ၊မၠီးကၠၣ်အ့သဝီတဖၣ်တကပၤန့ၣ် ဟီၣ်ကဝီၤဖိတဖၣ်စံးဝဲန့ၣ်လီၤ

“တနံၤန့ၣ်ပနၣ်ဟူဘၣ်အဆှၤကတၢၢ်အဖျၢၣ်၃၀ဃၣ်ဃၣ်လီၤ တဘျီတခီၣ်န့ၣ်နာ်ဟူဘၣ်ကျိဖိကလုာ် အါတက့ၤခးလီၤဝဲလၢအ့ရှါကျဲတကပၤသဝီတဖၣ်လီၤ တနီလီၤတဲၤဖဲဟံၣ်ဖီခိၣ်အဃိပှၤကညီဘၣ်ဒိအိၣ်”န့ၣ်ဟီၣ်ကဝီၤဖိစံးဝဲန့ၣ်လီၤ

ခီဖျိခးလီၤကျိဖးဒိၣ်ကိးမုၢ်နံၤအဃိ ဟီၣ်ကဝီၤကမျၢၢ်တဖၣ် ကိးမုၢ်နံၤတၢ်ဖံးအီၣ်မၤအီၣ်မူကျိၤဝဲၤကွာ်အဂီၤတၢ်ကီတၢ်ခဲအိၣ်ထီန့ၣ် ဟီၣ်ကဝီၤဖိစံးဝဲန့ၣ်လီၤ

“အဝဲသ့ၣ်ခးဝဲဒ်အံၤအဃိ ဘၣ်ကိာ်လၢမ့ၢ်ကလီၤလၢပခိၣ်ခဲလဲၣ်လီၤ မုၢ်နၤခီနာ်က့မံတဘူၣ်ဘၣ် ပမ့ၢ်လဲၤမၤတၢ်လၢစံာ်ပျီနာ်က့ မ့နာ်ဟူတၢ်ကလုာ်ဘၣ်ဟဲက့ၤဃ့ၣ်ထီၣ်လၢဟံၣ်လီၤ ပမၤတၢ်မၤတန့ၣ်ဂ့ၤဂ့ၤဘၣ်”န့ၣ်မၠီးကၠၣ်အ့သဝီဖိတဂၤစံးဝဲန့ၣ်လီၤ

ဒ်န့ၣ်သိးကီးတရံးဝ့ၢ်ကပၤ ကြုၤတုၤဝ့ၢ်ပူၤနာ်က့ ပယီၤသုးစုဖီလာ် ခလရ၅၄၆ သုးခးလီၤကျိဖးဒိၣ်ကိးမုၢ်နံၤအဃိ ဟီၣ်ကဝီၤကမျၢၢ်တဖၣ် ကဟးထီၣ်က့ၤလီၤအဂီၤဘၣ်သဂၢၢ်ဒီးတၢ်ကီတၢ်ခဲန့ၣ်လီၤ

“ခးဒုခးဝဲတပယူၤဃီလီၤ မုၢ်ထူၣ်နာ်က့ခး မုၢ်နၤနာ်က့ခး အဆှၤကတၢၢ်ကအိၣ်၁၀ဖျၢၣ်လီၤ ခးနါစိၤဝဲလၢသဝီတကပၤကြုၤတုၤဝ့ၢ်ဟီၣ်ကဝီၤဖိတဖၣ်န့ၣ်မ့နာ်ဟူတၢ်သီၣ်န့ၣ်နုာ်လီၤလၢဟံၣ်ပူၤလီၤ လဲၤတၢ်တဘူၣ်ဘၣ်”န့ၣ်ဟီၣ်ကဝီၤဖိတဂၤစံးဝဲန့ၣ်လီၤ
ဖဲအပူၤကွံာ်လါယူၤတလါအတီၤပူၤ ကီးတရံးဒီးကြုၤတုၤဝ့ၢ်တကပၤ ပယီၤသုးခးလီၤကျိဖးဒိၣ်အဃိ ဟီၣ်ကဝီၤဖိဘၣ်ဒိ၁၅ဂၤတကးဒံးဘၣ် သံ အဂၤ၁၀ဃၣ်ဃၣ်ဒီးဟံၣ်ဟးဂီၤ အဖျၢၣ်၁၀ဘျဲၣ်န့ၣ်သ့ၣ်ညါဘၣ်န့ၣ်လီၤ

တကီၢ်ခါခဲအံၤကညီကီၢ်စဲၣ်ပူၤ မၠၣ်ဝတံၣ်၊ကီးတရံး၊ကြုၤတုၤ၊ဖၣ်ပူၣ်ဒီးနိၣ်တကီဝ့ၢ်သ့ၣ်တဖၣ်အပူၤ ပယီၤသုးဒီး KNLAသုးပာ်ဖှိၣ်တဖၣ်အဘၢၣ်စၢၤ ခံခီခံကပၤ ဒုးယၤအတၢ်ဖ့ၣ်ဆၢအိၣ်ထီၣ်ဒီးတၢ်ဒုးကဲထီၣ်ကိးမုၢ်နံၤဃၣ်ဃၣ်န့ၣ်လီၤ