အောက်တိုဘာလ ၅ ရက်၊ ၂၀၂၃ ခုနှစ်
ပဲခူးတိုင်း၊ ပဲခူးမြို့ မြို့ရှောင်လမ်းက စစ်ကောင်စီတပ်ကို နယ်မြေခံပြည်သူ့ကာကွယ်ရေးတပ်ဖွဲ့တွေက ဗုံးသီးတွေ မိုင်းတွေနဲ့ ဖောက်ခွဲတိုက်ခိုက်ခဲ့တာကြောင့် စစ်ကောင်စီတပ်သား ၁ ဦးသေဆုံးခဲ့တယ်လို့ သိရပါတယ်။
အောက်တိုဘာလ ၃ ရက်နေ့ ည ၈ နာရီအချိန်မှာ ပဲခူးမြို့ မြို့ရှောင်လမ်းမှာရှိတဲ့ စစ်ကောင်စီတပ်ရဲ့ ပင်မထောက်ပို့တပ်ကို ပဲခူးမြို့နယ်ပြည်သူ့ကာကွယ်တပ်က ၄၀ မမ ဗုံးသီးတွေ၊ မိုင်းတွေနဲ့ သွားရောက် ပစ်ခတ်တိုက်ခိုက်ခဲ့တာကြောင့် စစ်ကောင်စီတပ်သား ၁ ဦးသေဆုံးကာ ၂ ဦး ထိခိုက်ဒဏ်ရာရရှိခဲ့တယ်လို့ ပဲခူးတိုင်းပကဖရဲ့ပြောရေးဆိုခွင့်ရှိသူကိုဝေယံကပြောပါတယ်။
“စစ်ကောင်စီရဲ့ ပင်မထောက်ပို့တပ်ခေါ်တာပေါ့ ၃ ရက်နေ့ ည ၈ နာရီမှာ ပဲခူးမြို့နယ် ပကဖက နေပြီးတော့ နန်းထိုက်အောင်စစ်ဆင်ရေးအဖြစ် ၄၀ မမ ဗုံးသီးတွေနဲ့ ပစ်ခတ်တိုက်ခိုက်ခဲ့တယ် ပစ်ခတ်တိုက်ခိုက်ခဲ့နေရာတော့ ဂိတ်ပေါက်ကို ပစ်ခတ်တိုက်ခိုက်တယ် မိုင်းလည်းခွဲလိုက်တယ်၊ စစ်ကောင်စီဘက်က ၁ ဦးသေဆုံးတယ် ၂ ဦး ဒဏ်ရာပြင်းပြင်းထန်ထန်ရတယ် ၁ ဦးသေဆုံးတာကတော့ သတင်းပေးချက်တွေအရသိရတယ် ၂ ဦး ကတော့ ရန်ကုန်ကို အရေးပေါ်သယ်သွားရတယ်” လို့သူက ပြောပါတယ်။
အခုလိုစစ်ကောင်စီတပ်ရဲ့ ပင်မထောက်ပို့တပ်ကို နယ်မြေခံပြည်သူကာကွယ်ရေးတပ်ဖွဲ့က ဗုံးသီးတွေ၊ မိုင်းတွေနဲ့ သွားရောက်တိုက်ခိုက်ပြီးနောက် အောက်တိုဘာလ ၄ ရက်နေ့မှာတော့ စစ်ကောင်စီသား တွေက ပဲခူးမြို့ပေါ်မှာ လှည့်ပတ်ကြည့်ရှု့တာ လုပ်ဆောင်နေတယ်လို့ ပဲခူးမြို့ဒေသခံတစ်ဦးက ပြောပါတယ်။
“အဲ့ဒီဖြစ်တာက မြို့ပြင်မှာဖြစ်တာ မြို့ထဲမှာနေတာဆိုတော့ သေချာတော့မသိဘူး ဟို့တနေ့ညကတော့ ပစ်သံတွေတော့ကြားရတယ် ဟိုကောင်တွေကတော့ တစ်မြို့လုံးခြေရှုပ်နေတယ် အစ်မတို့လည်းသတိနဲ့ နေနေရတယ်”သူကပြောပါတယ်။
ဒါ့အပြင် ပဲခူးမြို့အဝင်ဂိတ်မှာ အမြဲစစ်ဆေးတာတွေတော့မရှိပေမဲ့ တခါတရံ စစ်ကောင်စီတပ်သားတွေ မှတ်ပုံတင်စစ်ဆေးတာမျိုးပြုလုပ်တတ်ပြီး ပဲခူးမြို့ပေါ်က စစ်ကောင်စီတပ်ဂိတ်ချထားတဲ့ နေရာတွေ မှာလည်း မကြာခဏ ပေါက်ကွဲမှုတွေဖြစ်ပေါ်လေ့ရှိတယ်လို့ ပဲခူးမြို့ဒေသခံတွေကဆိုပါတယ်။
ပဲခူးတိုင်းအတွင်း စစ်ကောင်စီတပ်နဲ့ နယ်မြေခံတော်လှန်းအင်အားစုတို့မှာ နေ့တိုင်းနီးပါးတိုက်ပွဲဖြစ်ပြီး အခုလိုတိုက်ပွဲတွေဖြစ်ပွားပြီးနောက်ပိုင်းမှာလည်း စစ်ကောင်စီတပ်ဘက်မှ အနီးအနားကျေးရွာတွေကို လက်နက်ကြီးနဲ့ပြန်လည်ပစ်ခတ်တာ၊ လေယာဥ်နဲ့ဗုံးကြဲတိုက်ခိုက်တာ၊ ကျေးရွာထဲက လူနေအိမ်တွေကို မီးရှို့ဖျက်ဆီးတာတွေ လုပ်ဆောင်လေ့ရှိတယ်လို့ ပဲခူးတိုင်းပကဖရဲ့ ပြောရေးဆိုခွင့်ရှိသူ ကိုဝေယံက ပြောပါတယ်။
စစ်ကောင်စီတက်အာဏာသိမ်းပြီးနောက်ပိုင်း ပဲခူးတိုင်းအတွင်းက စစ်ကောင်စီတပ်စခန်းတွေ၊ စစ်ဆေးရေးဂိတ်တွေ၊ စစ်ကောင်စီတပ်စစ်ကြောင်းတွေမှာ မကြာခဏ ကြားဖြတ်တိုက်ခံနေရတာ၊ မိုင်းဆွဲတိုက်ခိုက်ခံနေရတာအပြင် စစ်ကောင်စီတပ်လက်အောက်ခံဝန်ထမ်းတွေနဲ့ သတင်းပေးသူ တွေမှာလည်း မကြာခဏ ရှင်းလင်းခံနေရတာ ဖြစ်တယ်လို့ နယ်မြေခံတော်လှန်ရေးအင်အားစုတွေရဲ့ ထုတ်ပြန်ချက်အရသိရပါတယ်။
သတင်း – နော်ဖူးဖူး
ဓါတ်ပုံ – CJ
Phar Si Than (People’s Radio Myanmar)
