လါယူၤ ၂၀၊၂၀၂၃နံၣ်
ကညီကီၢ်စဲၣ် ကီးတရံးဝ့ၢ်ပူၤဖဲလါယူၤ ၁၉သီဂီၤအဆၢကတီၤ ကမျၢၢ်လၢဆှီးဖီ၁၃ဂၤဘၣ်တၢ်ဖှီၣ်အီဒီးတုၤခဲအံၤတထံၣ်ဘၣ်ဒီးဒူၣ်ဖိထၢဖိတဖၣ်န့ၣ် သ့ၣ်ညါဘၣ်လၢကီးတရံးဟီၣ်ကဝီၤဖိတဖၣ်အိၣ်န့ၣ်လီၤ
ကီးတရံးဝ့ၢ် စံၤနးသုးခးကၠိမဲာ်ညါပယီၤသုးတဖၣ်ဆီလီၤတြဲၤဒီးဖှီၣ်ဃးဝဲပှၤလၢဆှီးဖီပှၤလၢဖှီၣ်ဖီ ပိၣ်မုၣ် ပိၣ်ခွါ ၁၃ဂၤန့ၣ်လီၤ
ဆၢကတီၢ်ခဲအံၤပှၤလၢဘၣ်တၢ်ဖှီၣ်၁၃ဂၤအံၤဘၣ်တၢ်ပာ်အီဖဲ ကီးတရံးကီၢ်ဆၤပၢၤကီၢ်ဝဲၢ်လီၢ်ဒီးတုၤခဲအံၤတပျဲထံၣ်လိၣ်သးဒီးဒူၣ်ဖိထၢဖိတဖၣ်န့ၣ် ကီးတရံးဝ့ၢ်ဟီၣ်ကဝီၤဖိတဲဝဲန့ၣ်လီၤ
“ဖှီၣ်ဝဲဖဲစံၤနးသုးခးကၠိမဲာ်ညါလီၤ ပှၤဆှီးဃးဖီနာ်က့တန့ၣ်ဘၣ် ပှၤလၢဆှီးဖီတဖၣ်တသမံသမိးဝဲဖှီၣ်ဝဲခဲလၢာ်လီၤ ဖှီၣ်ဃးလၢစုနာ်က့တန့ၣ်ဘၣ် ပိၣ်ခွါ ၅ဂၤ ပိၣ်မုၣ် ၈ဂၤ ခဲလၢာ်ပာ်ဖှိၣ်၁၃ဂၤလီၤအခဲပာ်ဝဲလၢဃိၣ်ပူၤ တန့ၣ်တၢ်ဆဲးကျိးဘၣ် တထံၣ်ဘၣ်ဒီးဒူာ်ဖိထၢဖိဘၣ်”န့ၣ်ကီးတရံးဝ့ၢ်ဟီၣ်ကဝီၤဖိတဲဝဲန့ၣ်လီၤ
တကးဒံးဘၣ်ပယီၤသုးလၢဆီလီၤသးဖဲ စံၤနးသုးတးကၠိမဲာ်ညါတဖၣ်တပျဲနီဝဲသိလ့ၣ်ယီၢ်ဒီးပှၤမ့ၢ်နီန့ၣ်ဖှီၣ်ဒဲဝဲမဲာ်သၣ်န့ၣ်လီၤ
“ပှၤဆှီးဖီတဖၣ်ဘၣ်တၢ်ဖှီၣ်လီၤ လၢစံၤနးသုးတးကၠိမဲာ်ညါန့ၣ် မ့ၢ်တုၤလၢကၠိမဲာ်ညါန့ၣ်တပျဲနီဝဲဘၣ် ဘၣ်ဆီၣ်ဝဲလီၤ မ့ၢ်သးပ့ၤနီၣ်သးဒီးနီဘၣ်ဝဲန့ၣ်ဒဲဝဲအမဲာ်သၣ်လီၤ ဒဲဝဲဝံၤတပျဲက့ၤဝဲဘၣ်”န့ၣ်ဟီၣ်ကဝီၤဖိတဂၤတဲဝဲန့ၣ်လီၤ
ဖဲအပူၤကွံာ်လါယူၤ ၁၉သီအနံၤ ပယီၤသုးဟံးန့ၣ်ထံကီၢ်စိကမီၣ်ဝံၤအလီၢ်ခံ ကမျၢၢ်ခိၣ်နၣ်လၢဘၣ်တၢ်ဖှီၣ်ဃးအီ Daw Aung San Sukyi နံၣ်အိၣ်ဖျဲၣ်ဆၢက့ၤ ၇၈ဝီတဝီဝံၤ ပှၤလၢမၤဝဲနံၣ်အိၣ်ဖျဲၣ်ဆၢမူးတဖၣ်ပယီၤသုးဟးဖှီၣ်ဝဲလၢထံကီၢ်ဒီတဘ့ၣ်အပူၤန့ၣ်လီၤ