လါအီကူး ၃သီ၊၂၀၂၃နံၣ်
ကညီကီၢ်စဲၣ် ဖၣ်အၣ်ကီၢ်ဆၣ် ဃိၣ်လိာ်တိၤဖီခိၣ် မ့ၣ်ပိၢ်ပိၢ်ဖးဝံၤအလီၢ်ခံ ပယီၤသုးမီၤစိရိၤမၤဃံးထီၣ်တၢ်ဘံၣ်တၢ်ဘၢ ဒီးသမံသမိးဃံးထီၣ်တၢ်အါန့ၣ်လၢညါန့ၣ် သ့ၣ်ညါဘၣ်လၢဟီၣ်ကဝီၤဖိတဖၣ်အိၣ်န့ၣ်လီၤ
ဖၣ်အၣ်ဝ့ၢ် ဃိၣ်လိာ်တိၤဖီခိၣ် ဖဲအပူၤကွံာ်လါယူၤလံ၃၁သီ ဂီၤ ၆နၣ်ရံၣ် ၄၅မံးနံးဆၢကတီၢ် မ့ၣ်ပိၢ်ပိၢ်ဖးထီၣ်လၢသိလ့ၣ်ပူၤကဲထီၣ်သးဝံၤ ဟီၣ်ကဝီၤကမျၢၢ်ဒီး ပယီၤသုးစုဖီလာ်ဝဲၤကျိၤဝဲၤဒၢးပှၤမၤတၢ်ဖိတဖၣ်ဘၣ်ဒိန့ၣ်လီၤ
သိလ့ၣ်မ့ၣ်ပိၢ်ပိၢ်ဖးထီၣ်ဒ်အံၤဝံၤအလီၢ်ခံ ပယီၤသုးဆီတလဲတၢ်ဆၢကတီၢ်ဒီး ပျဲလဲၤဝဲဂီၤ၆နၣ်ရံၣ်တုၤ ဟါ၇လၢဃိၣ်လိာ်တိၤတကးဒံးဘၣ်မၤဃံးထီၣ်တၢ်သမံသမိးန့ၣ်လၢညါန့ၣ်သ့ၣ်ညါဘၣ်လၢဖၣ်အၣ်ဝ့ၢ်ဟီၣ်ကဝီၤဖိတဖၣ်အိၣ်န့ၣ်လီၤ
“အခဲပာ်လီၤအါထီၣ်ဝဲဘံၣ်ဘၢဒီးပယီၤသုးဖိတဖၣ်လီၤ လၢညါပျဲလဲၤဝဲလၢတိၤဖီခိၣ် ဂီၤ ၆နၣ်ရံၣ်တုၤမုၢ်နၤခီ အနၣ်ရံၣ် ၁၀ အခဲပျဲလဲၤဝဲ ဂီၤ၆နၣ်ရံၣ်တုၤ ဟါ ၇နၣ်ရံၣ်လီၤ ကွဲၤဒီနၣ်န့ၣ်သမံသမိးဝဲထီဘိလီၤ”န့ၣ် ဖၣ်အၣ်ဝ့ၢ်ဟီၣ်ကဝီၤဖိတဂၤစံးဝဲလီၤ
တကီၢ်ခါခဲအံၤ တၢ်ပၢၢ်ဆၢသုးပာ်ဖှိၣ်တဖၣ် ဟ့ၣ်ပလီာ်ဃးဝဲဒ်သိးမုၢ်နၤတၢ်ခံးတလဲၤက့ၤဖဲ ဖၣ်အၣ်-မီၣ်လမၠ့ၣ်-ဝ့ၢ်တကူၣ်သိလ့ၣ်ကျဲ န့ၣ်လီၤ
ဖဲဃိၣ်လိာ်တိၤ သိလ့ၣ်မ့ၣ်ပိၢ်ပိၢ်ဖးထီၣ်တဘျီအံၤအပူၤ ကမျၢၢ်သံတဂၤဒီးပှၤလၢဘၣ်ဒိဘၣ်ထံးတဖၣ်ဘၣ်တၢ်ဆှၢအိဆူ တီၤကလ့သုးအတၢ်ဆါဟံၣ်န့ၣ်သ့ၣ်ညါဘၣ်န့ၣ်လီၤ
“တဂၤန့ၣ်သံဖဲတၢ်လီၢ်ကဲထီၣ်သးန့ၣ်လီၤ ပှၤအိၣ်လီၤတဲၤတဖၣ်ဘၣ်တၢ်ဆှၢအိဆူတီၤကလ့သုးအတၢ်ဆါဟံၣ်လီၤ ပှၤသံကအိၣ်လၢအဂၤတဆံညါ လၢတၢ်ကစီၣ်ပူၤပာ်ဖျါဝဲဒၣ်တဂၤလီၤ”န့ၣ်ပှၤဘူးဒီးသုးတၢ်ဆါဟံၣ်တဂၤစံးဝဲလီၤ
ဖၣ်အၣ်ဝ့ၢ် ဃိၣ်လိာ်တိၤတၢ်သမံသမိးတြဲၤအဃၢၢ်ဘၣ်တၢ်မၤပိၢ်ဖးထီၣ်မ့ၣ်ပိၢ်တပယူာ်ဃီဒီး ဖဲအပူၤကွံာ်လါအ့ဖြ့ၤ ၂၂သီအနံၤနာ်က့ဃိၣ်လိာ်တိၤအဃၢၢ်မ့ၣ်ပိၢ်ပိၢ်ဖးထီၣ်ဒံးန့ၣ်လီၤ
တကးဒံးဘၣ်ကညီကီၢ်စဲၣ်ပူၤနိၣ်တကီ၊ဖၣ်ပူၣ်ဒီးသၣ်တီၣ်ဝ့ၢ်သ့ၣ်တဖၣ်အပူၤ ပယီၤသုးစုဖီလာ် ဝဲၤကျိၤဝဲၤဒၢးတဖၣ်ဘၣ်တၢ်ခးလီၤမ့ၣ်ပိၢ်ဒီးဒြိတပယူာ်ဃီန့ၣ်လီၤ