ကမျၢၢ်အိၣ်ဖဲ မၠၣ်ဝတံၣ်ဝ့ၢ် ကၠီးလိကၠံဃိၣ်အလီၢ်ခံတဖၣ် ကဝီၤဒ့သးပှၢ်မၢသုးလီၢ်ကျဲ

လါယူၤလံ ၂၂သီ၊၂၀၂၃နံၣ်

ကညီကီၢ်စဲၣ် မၠၣ်ဝတံၣ်ဝ့ၢ် ကၠီးလိကၠံဃိၣ်လီၢ်ခံဟီၣ်ကဝီၤကမျၢၢ်တဖၣ် ကဝီၤဒ့ပှၤဘၣ်မူဘၣ်ဒါတဖၣ်မၢသုးလီၢ်ကျဲန့ၣ်သ့ၣ်ညါဘၣ်န့ၣ်လီၤ

မၠၣ်ဝတံၣ်ဝ့ၢ်အဃၢၢ် ပယီၤသုးမီၤစိရိၤဒီးKNLAသုးပာ်ဖှိၣ်တဖၣ်အဘၢၣ်စၢၤတၢ်ဒုးကဲထီၣ်ကိးမုၢ်နံၤဃၣ်ဃၣ်ဒီးပယီၤသုးစုဖီလာ် ခလရ ၂၇၅ဒီး စ့လဲးမၠ့ၣ်သိလ့ၣ်အိၣ်ဘှံးတၢ်လီၢ် လီၢ်ခံပယီၤသုးကလၢၤတဖၣ်ခးလီၤကျိဖးဒိၣ်ဆူ ဝ့ၢ်ဃၢၢ်ကိးမုၢ်နံၤန့ၣ်လီၤ

ခီဖျိခးလီၤကျိဖးဒိၣ်ဒ်အံၤအဃိ ကမျၢၢ်ဘၣ်ဒိဘၣ်ထံးအိၣ်ထီၣ်သ့အဃိ ကၠီးလိကၠံဃိၣ်လီၢ်ခံ ဟံၣ်အဖျၢၣ် ၁၀၀ဘျဲၣ်ပူၤ ဟီၣ်ကဝီၤကမျၢၢ် ၃၀၀ဘျဲၣ်အံၤ ဒ်သိးကဃ့ၣ်ပူၤဖျဲးသးအဂီၤ ကဝီၤဒ့သးပှၢ်တဖၣ်ဟဲဘိးဘၣ်သ့ၣ်ညါဝံၤ စးထီၣ်လါယူၤလံ ၂၁သီ ဟါခီန့ၣ် စးထီၣ်သုးလီၢ်ကျဲန့ၣ်ဟီၣ်ကဝီၤဖိတဖၣ်စံးဝဲလီၤ

“ကၠီးလိကၠံ အလီၢ်ခံဟံၣ်တဖၣ်မၢသုးအလီၢ်အကျဲလံ ကဝီၤဒ့ပှၤဘၣ်မူဘၣ်ဒါတဲဝဲပံးဃးဟံၣ် တၢ်လၢအရ့ဒိၣ်တဖၣ်မၢအစိာ်ဃုာ်ဝဲ အဝဲသ့ၣ်မ့ခးလီၤကျိဖးဒိၣ်န့ၣ်တပူၤအဃိမၢဃ့ၣ်ဆူတၢ်ပူၤဖျဲးအလီၢ်လီၤ”န့ၣ်မၠၣ်ဝတံၣ်ဟီၣ်ကဝီၤဖိတဂၤစံးဝဲန့ၣ်လီၤ

တကီၢ်ခါခဲအံၤ မၠၣ်ဝတံၣ်ဝ့ၢ်ပူၤ (အတွင်း)မဲကနဲၣ်သဝီ၊(အပြင်)မဲကနဲၣ်သဝီ၊ပွ့းလ့အ့မၠ့ၣ်ကဝီၤဒ့တကပၤ ကမျၢၢ်၅၀၀ဘျဲၣ်နာ်က့ ပယီၤသုးမၢဃ့ၣ်ဆူတၢ်ပူၤဖျဲးလီၢ်န့ၣ်သ့ၣ်ညါဘၣ်န့ၣ်လီၤ

တကးဒံးဘၣ် မၠၣ်ဝတံၣ်ဝ့ၢ်အဃၢၢ်တၢ်ဒုးကဲထီၣ်အဃိ ပယီၤသုးတဖၣ်ကးတံၢ်ကျဲဖဲ ကဝီၤဒ့ရူကျဲ၊ဘရ့းနီၣ်ကျဲဒီး ပယီၤသုးစုဖီလာ် ဝဲၤကျိၤဝဲၤဒၢးကျဲတဖၣ်န့ၣ်ဟီၣ်ကဝီၤဖိစံးဝဲန့ၣ်လီၤ

“အခဲလၢဝ့ၢ်ပူၤတၢ်အိၣ်သးတဂ့ၤဘၣ် မၢသုးအလီၢ်အကျဲခဲလၢာ်လီၤ လၢမၠ့းတၣ်လ့မၠ့ၣ်နာ်က့ပှၤခးလီၤ စ့လဲးမၠ့ၣ် သိလ့ၣ်အိၣ်ပတုာ်လီၢ်နာ်က့ခး ခံခီခံကပၤအဃိတၤအိၣ်သးအၢလံ အခဲပၢၤကီၢ်ဝဲၤဒၢးကပၤနာ်က့ပံးဃးဝဲလံ ကဝီၤဒ့ရူတဖၣ်မီ နီၢ်ဂံၢ် ၄၊၅ကဝီၤဒ့ရူကျဲတဖၣ်နာ်က့ပံးဝဲလံ”န့ၣ်ဟီၣ်ကဝီၤဖိစံးဝဲလီၤ

ခီဖျိပယီၤသုးကးတံၢ်ကွံာ်မၠၣ်ဝတံၣ်ဝ့ၢ်ပူၤ ဘရ့းနီၣ်ကျဲဒီးကဝီၤဒ့ကျဲတဖၣ်အဃိ ဟီၣ်ကဝီၤကမျၢၢ်တဖၣ်ဘၣ်သဂၢၢ်ဒီးတၢ်ကီတၢ်ခဲလၢဟးထီၣ်လ့ာ်လိာ်အဂီၤန့ၣ်သ့ၣ်ညါဘၣ်န့ၣ်လီၤ

စးထီၣ်ဖဲလါယူၤလၢခံကတၢၢ်တနွံန့ၣ် ကညီကီၢ်စဲၣ်ပူၤမၠၣ်ဝတံၣ်၊ကီးတရံး၊ဖၣ်ပူၣ်ဒီးနိၣ်တကီဝ့ၢ်သ့ၣ်တဖၣ်အပူၤပယီၤသုးမီၤစိရိၤဒီး ဟီၣ်ကဝီၤတၢ်ပၢၢ်ဆၢသုးပာ်ဖှိၣ်တဖၣ်အဘၢၣ်စၢၤတၢ်ဒုးကဲထီၣ်ကိးမုၢ်နံၤဃၣ်ဃၣ်န့ၣ်လီၤ