တကူၣ်ဆၢၣ် ပၢၤကီၢ်ဝဲၤဒၢးအဃၢၢ် ပယီၤသုးဒီးKNLAသုးပာ်ဖှိၣ်တဖၣ်အဘၢၣ်စၢၤ တၢ်ဒုးကဲထီၣ်

လါအီကူး ၃သီ၊၂၀၂၃နံၣ်

ကညီကီၢ်စဲၣ် နိၣ်တကီကီၢ်ဆၣ် တကူၣ်တၢၣ်သဝီပူၤ တကူၣ်တၢၣ်ပၢၤကီၢ်ဝဲၤဒၢးအဃၢၢ် ပယီၤသုးဒီးKNLAသုးပာ်ဖှိၣ်တဖၣ်အဘၢၣ်စၢၤခံခီခံကပၤတၢ်ဒုးကဲထီၣ်န့ၣ် သ့ၣ်ညါဘၣ်လၢဟီၣ်ကဝီၤဖိအိၣ်န့ၣ်လီၤ

ဖဲလါအီကူး ၂သီ မုၣ်ဃ့ၢ်လီၤ ၃နၣ်ရံၣ်ဃၣ်ဃၣ်ဆၢကတီၢ် တကူၣ်တၢၣ်ပၢၤကီၢ်ဝဲၤဒၢးပူၤ ပယီၤသုးဒီးKNLAသုးပာ်ဖှိၣ်တဖၣ်အဘၢၣ်စၢၤခံခီခံကပၤ ခးလိာ်သး တခီနၣ်ရံၣ်ဃၣ်ဃၣ်န့ၣ် တကူၣ်တၢၣ်သဝီပူၤ ဟီၣ်ကဝီၤပိာ်ခွါတဂၤစံးဝဲလီၤ

“ဖဲမဟါနာ်က့ခးလိာ်သးလီၤ တစိာ်ဖိလီၤ ဖဲလဲၤပှ့ၤတၢ်ထံၣ်လိာ်သးအဃိခးဝဲလီၤ လၢပၢၤကီၢ်ဝဲၤဒၢးကပၤလီၤ ဘၣ်ဒိဘၣ်ထံးန့ၣ်တသ့ၣ်ညါဘၣ်ဒံးဘၣ် ပယီၤသုးတကပၤခးကဒါက့ၤဝဲဒီး ၄၀မမလီၤ”န့ၣ်အဝဲစံးဝဲလီၤ

ဟီၣ်ကဝီၤပိာ်မုၣ်တဂၤနာ်က့ စံးဝဲလၢ”ဖဲမဟါတၢ်သီၣ်ကဒီးလီၤ ဘၣ်ဒီတၢ်အိၣ်သးဟဲက့ၤဟူးဝးထီၣ်ဒီးလံ”န့ၣ်လီၤ

တကူၣ်တၢၣ်သဝီပူၤ ပယီၢ်သုးမီၤစိရိၤဒီးKNLAသုးပာ်ဖှိၣ်တဖၣ်အဘၢၣ်စၢၤခံခီခံကပၤဒုးယၤအတၢ်ဖ့ၣ်ဆၢအိၣ်ထီၣ်ဒီး ဖဲလါအီကူး၂သီအနံၤနာ်က့ ခံခီခံကပၤထံၣ်လိာ်သးတၢ်ဒုးကဲထီၣ်တဆံးတက့ၢ်ဒံးန့ၣ် ဟီၣ်ကဝီၤကမျၢၢ်ဒီသဒၢသုးဖိတဂၤစံးဝဲလီၤ

“တၢ်ဒုးကဲထီၣ်ဒီးတကူၣ်တၢၣ်ပၢၤကီၢ်ဝဲၤဒၢးတဆံးတက့ၢ်လီၤ တၢ်သံ၊ဘၣ်ဒိ တအိၣ်ဘၣ်လၢပအိၣ်တကပၤန့ၣ် အဝဲသ့ၣ်တကပၤမ့ၢ်ဘၣ်ဧါတဘၣ်ဧါန့ၣ်တသ့ၣ်ညါဘၣ်ဒံးဘၣ် ဒုးယၤအတၢ်ဖ့ၣ်ဆၢန့ၣ်အိၣ်ဒံး”န့ၣ်အဝဲစံးဝဲလီၤ

သဝီပူၤ ဘၣ်တၢ်ဒီၤတဲၤကွံာ် ATOM ဒီး internet ကျိၤတဖၣ်ဒီးပယီၤသုးမီၤစိရိၤတကပၤ ခးလီၤကျိဖးဒိၣ်ဆူသဝီပူၤကိးမုၢ်နံၤဃၣ်ဃၣ်န့ၣ် သ့ၣ်ညါဘၣ်ခီဖျိဟီၣ်ကဝီၤဖိတဖၣ်စံးဝဲအသိးန့ၣ်လီၤ

တကးဒံးဘၣ်ဖဲအပူၤကွံာ်လါယူၤလံအတီၢ်ပူၤ တကူၣ်တၢၣ်သဝီကရူၢ်ပူၤ တၢ်ဒုးကဲထီၣ်အဃိ ချၢၣ်၊ပလ့ၣ်၊တကူၣ်တၢၣ်သဝီပူၤ ကမျၢၢ်ဃ့ၣ်တၢ်ဒုးတဖၣ်နာ်က့ ဟဲက့ၤအိၣ်ဆိးဝဲဖဲသဝီပူၤလံန့ၣ်လီၤ

ပယီၤသုးမီၤစိရိၤ ဆီလီၤလီၢ် တကူၣ်တၢၣ်ပၢၤကီၢ်ဝဲၤဒၢးပူၤ ဘၣ်တၢ်ခးလီၤမ့ၣ်ပိၢ်ဒီးဒြိတပယူာ်ဃီန့ၣ်လီၤ ကညီကီၢ်စဲၣ်ပူၤ မၠၣ်ဝတံၣ်၊ကီးတရံး၊ကၠူၤတုၤ၊ဖၣ်ပူၣ်ဒီးသၣ်တီၣ်ဝ့ၢ်သ့ၣ်တဖၣ်ပူၤ ပယီၤသုးဒီးKNLAသုးပာ်ဖှိၣ်တဖၣ်အဘၢၣ်စၢၤ တၢ်ဒုးကဲထီၣ်ကိးမုၢ်နံၤဃၣ်ဃၣ်ဒီးဖၣ်အၣ်၊လဲဘွဲ ဟီၣ်ကဝီၤတနီပူၤ ခံခီခံကပၤဒုးယၤအတၢ်ဖ့ၣ်ဆၢအိၣ်န့ၣ်သ့ၣ်ညါဘၣ်န့ၣ်လီၤ