လါစဲးပထ့ဘၢၣ် ၅သီ၊၂၀၂၃နံၣ်
ကညီကီၢ်စဲၣ် မၠၣ်ဝတံၣ်ဝ့ၢ်ပူၤ ပယီၤသုးစုတီၤဖီလာ် ဝဲၤကျိၤဝဲၤဒၢးပှၤမၤတၢ်ဖိဒီးဒူၣ်ဖိထၢဖိတဖၣ် ဒ်သိးတအိၣ်ဝဲလၢ ရူဒီးပှၤမၤတၢ်ဖိတၢ်အိၣ်လီၢ်ဆိးလီၢ်ပူၤအဂီၤ Federal Wings ထုးထီၣ်တၢ်ဘိးဘၣ်ရၤလီၤအပူၤ ပာ်ဖျါထီၣ်ဝဲန့ၣ်လီၤ
ဖဲလါစဲးပထ့ဘၢၣ်၃သီ ဟါခီဆၢကတီၢ် ပယီၤသုးစုတီၤဖီလာ် ဝဲၤကျိၤဝဲၤဒၢးရူတဖၣ်လၢအမ့ၢ်ဝဲ မၠၣ်ဝတံၣ်ဝ့ၢ် ပၢပြးရူဒီးပၢၤကီၢ်ဝဲၤလီၢ်တဖၣ် ဘၣ်တၢ်တ့ၢ်လီၤမ့ၣ်ပိၢ်ဒီးဒြိခီဖျိ Federal Wingsကရူၢ်ဝံၤအလီၢ်ခံ ပယီၤသုးစုဖီလာ်ပှၤမၤတၢ်ဖိဒီးအဒူၣ်ဖိထၢဖိတဖၣ် ဒ်သိးကသုးလီၢ်သုးကျဲလၢတၢ်လီၢ်အဂၤအဂီၤCobra သုးကျိၤ Federal Wings ကရူၢ်ပှၤဘၣ်မူဘၣ်ဒါ န့ၣ်မ့ထိ စံးဝဲန့ၣ်လီၤ
“ဒူၣ်ဖိထၢဖိတဖၣ်သုးအလီၢ်မ့န့ၣ်န့ၣ်အဂ့ၤကတၢၢ်လီၤ လီၢ်ကဝီၤကမျၢၢ်တဖၣ်ဒ်သိးကဃ့ၢ်ဆိဃးန့ၣ်ပတဲလီၤ ပတအဲၣ်ဒိးကမျၢၢ်ဘၣ်ဒိဘၣ် ဒ်သိးကမျၢၢ်တဘၣ်ဒိဘၣ်ထံးအဂီၤစ့ၢ်ကီးပဂုာ်ကျဲးစၢးမၤလီၤ တုၤခဲအံၤကမျၢၢ်ဘၣ်ဒိတအိၣ်ဘၣ် ပ missionတဖၣ်န့ၣ်တသ့ဖဲအသ့ ပမၤလၢဘူးဒီး ပယီၤသုးတဖၣ်လီၤ မ့သ့လၢဘူးဒီးအဝဲသ့ၣ် မံၣ်ထၢၣ် ၄၀၀ /၅၀၀န့ၣ်အိၣ်တဂ့ၤမီနီ”န့ၣ်အဝဲစံးဝဲလီၤ
ဘၣ်ဃးဒီးတၢ်မၤ ဒြိ mission အ့ၤမ့ၢ်ဒၣ်တ့ၢ်လီၤမ့ၣ်ပိၢ်ဆူပယီၤသုးအိၣ်တၢ်အလီၢ်ဒီးဘၣ်ယိၤလၢကဘၣ်ကမျၢၢ်အဃိ ဘၣ်ထုးထီၣ်လံာ်ဒ်အံၤန့ၣ်အဝဲတဲအါထီၣ်ဝဲန့ၣ်လီၤ
ပယီၤသုးစုဖီလာ် ပၢပြးရူဒီးပၢၤကီၢ်ဝဲၤလီၢ် ဘၣ်တၢ်ခးလီၤမ့ၣ်ပိၢ်ဒီးဒြိဝံၤအလီၢ်ခံ ပၢၤကီၢ်ဒူၣ်ဖိထၢဖိလၢအိၣ်ဖဲပၢၤကီၢ်ဝဲၤလီၢ်ပူၤတနီလဲၤအိၣ်က့ၤဝဲဆူမၠၣ်ဝတံၣ်ဝ့ၢ်ပူၤ ဘူးတံၢ်တဖၣ်အိၣ်န့ၣ်ပှၤဘူးဒီးပၢၤကီၢ်ဝဲၤလီၢ်တဂၤစံးဝဲလီၤ
“အခဲပှၤလၢသ့ၣ်ညါပှၤကညီအီၣ်တနီလီၤ သုးအလီၢ်န့ၣ် လၢတနီခီပှၤဟဲလၢတၢ်လီၢ်အဂၤတဖၣ်လီၤမီ သ့ၣ်ညါပှၤကညီတအိၣ်ဘၣ် ကလဲၤအိၣ်ဝဲတၢ်လီၢ်တအိၣ်ဘၣ် မၤဝဲတဘၣ် ဘၣ်အိၣ်ဖဲန့ၣ်လီၤတၢ်ကဲပှၤပျဲၤန့ၣ်”အဝဲစံးဝဲလီၤ
မၠၣ်ဝတံၣ်ဝ့ၢ် ပၢၤကီၢ်ဝဲၤလီၢ်ဘၣ်တၢ်ခးလီၤအဃိ ပယီၤသုးပဒိၣ်တဖၣ်ဒီးပှၤအဂုၤအဂၤသံ၅ဂၤဝံၤ ဘၣ်ဒိအါအါဂီၢ်ဂီၢ်ဒီးဖဲအပူၤကွံာ် လါအီကူး ၂၂သီအနံၤနာ်က့ မၠၣ်ဝတံၣ်ဝ့ၢ် ကီၢ်ရ့ၣ်တၢ်ဆါဟံၣ်ဘၣ်တၢ်တ့ၢ်လီၤမ့ၣ်ပိၢ်ဒီးဒြိအဃိ တၢ်ဆါဟံၣ်တၢ်သူၣ်ထီၣ်ဟးဂီၤဝဲတနီန့ၣ်လီၤ
တကးဒံးဘၣ် မၠၣ်ဝတံၣ်ဝ့ၢ်ပၢၤကီၢ်ဝဲၤလီၢ်ဒီးအဃၢၢ် ပာ်လီၤဃးဝဲပၢၤကီၢ်နီၢ်ဂံၢ်အါအါဂီၢ်ဂီၢ်န့ၣ် လီၢ်ကဝီၤဖိစံးဝဲအသိးသ့ၣ်ညါဘၣ်န့ၣ်လီၤ
ကညီကီၢ်စဲၣ် လီၢ်ကဝီၤတဖၣ်အပူၤ ပယီၤသုးစုဖိလာ်ဝဲၤကျိၤဝဲၤဒၢးတဖၣ် ဘၣ်တၢ်ခးလီၤတပယူာ်ဃီဒီး မၠၣ်ဝတံၣ်၊ကီးတရံး၊ကြုၤတုၢ်၊ဖၣ်ပူၣ်၊သၣ်တီၣ်ဒီးနိၣ်တကီဝ့ၢ်သ့ၣ်တဖၣ်အပူၤ ပယီၤသုးဒီးKNLAသုးပာ်ဖှိၣ်တဖၣ်အဘၢၣ်စၢၤ တၢ်ဒုးကဲထီၣ်ကိးမုၢ်နံၤဃၣ်ဃၣ်န့ၣ်သ့ၣ်ညါဘၣ်န့ၣ်လီၤ