လါစဲးပထ့ဘၢၣ် ၅သီ ၊၂၀၂၃နံၣ်
ကညီကီၢ်စဲၣ် မၠၣ်ဝတံၣ်ဝ့ၢ် လဲးခဲးတီၣ်ဖီခိၣ် ခီဖျိပယီၤသုးတ့ၢ်လီၤမ့ၣ်ပိၢ်ဒီးကဘီယူၤခးလီၤကျိဖးဒိၣ်သ့ၣ်တဖၣ်အဃိ လဲးခဲးတီၣ်ဖီခိၣ် ဃိၣ်ဒီးတၢ်ဘါတၢ်သူၣ်ထီၣ်တဖၣ်ဟးဂီၤအါမးန့ၣ်ကၠသ့းနဲးသုးကျိၤပှၤဘၣ်မူဘၣ်ဒါတဂၤစံးဝဲန့ၣ်လီၤ
မၠၣ်ဝတံၣ်ဝ့ၢ်အဃၢၢ် လဲးခဲးတီၣ်အံၤ KNLAသုးပာ်ဖှိၣ်တဖၣ်ထီၣ်မၤန့ၣ်ယံၤထီၣ်တလါဘျဲၣ်လံဒီး ပယီၤသုးမၤဝဲတၢ်ထီၣ်ဒုးအိၣ်အဝီ၁၀ဘျဲၣ်လံန့ၣ်လီၤ
တကီၢ်ခါခဲအံၤ လဲးခဲးတီၣ်အဃၢၢ်တၢ်ဒုးတကဲထီၣ်အိၣ်အသီ၂၀ဘျဲၣ်လံဒီးပယီၤသုးတကပၤခးလီၤကျိဖးဒိၣ် တ့ၢ်လီၤမ့ၣ်ပိၢ်ဒီးကဘီယူၤကိးမုၢ်နံၤဃၣ်ဃၣ်အဃိ လဲးခဲးတီၣ်ဖီခိၣ် ဃိၣ်ဒီးတၢ်ဘူၣ်တၢ်ဘါတၢ်သူၣ်ထီၣ်တဖၣ်ဟးဂီၤဝဲအါမးန့ၣ်ကၠသ့းနဲး သုးကျိၤပှၤဘၣ်မူဘၣ်ဒါတဂၤစံးဝဲလီၤ
“ပမ့ၢ်ဘၣ်တဲဃိၣ်ဟးဂီၤနီၢ်ဂံၢ်န့ၣ် ပဂံၢ်တွးမးတသ့လၢၤဘၣ် ကၠိတဖၣ်နာ်က့ဟးဂီၤ ဃိၣ်တဖၣ်နာ်က့ဟးဂီၤ အခဲအဝဲသ့ၣ်ခးလီၤဃိၣ်တဖၣ်ဒ်အံၤန့ၣ် ကမ့ၢ်ဆိမိၢ်ဝဲပအိၣ်ဖဲန့ၣ်ဧါသၢၣ် လ့အံၤတကပၤနာ်က့ ဒ်သိးအဝဲသ့ၣ်ကဟံန့ၣ်ဃးလီၢ်သဒၢအဂီၤအဝဲသ့ၣ်ဘှီဃးဝဲမီနီ”န့ၣ်အဝဲစံးဝဲလီၤ
လၢညါပယီၤသုးစုတီၤဖီလာ် BGFသုးတဖၣ်ဟံန့ၣ်ဃးတၢ်လီၢ်လဲးခဲးတီၣ်ဖီခိၣ် ပယီၤသုးတဖၣ်ဘှီထီၣ်ဃးဃိၣ်တဖၣ်ဒ်သိးကဟံန့ၣ်ဃးအလီၢ်ဒီးဆၢကတီၢ်ခဲအံၤအဝဲသ့ၣ်မၤဟးဂီၤက့ၤဝဲန့ၣ်အတဲတဲအါထီၣ်ဝဲန့ၣ်လီၤ
အဝဲစံးဝဲ”ဘၣ်ဃးဒီးလဲးခဲးတီၣ်ပယီၤသုးခးလီၤတၢ်ဒီးကဘီယူၤအိၣ်လီၤ ကျိဖးဒိၣ်၊ဟၣ်ဝ့ၣ်စၣ်တဖၣ်ခးလီၤဝဲတပယူာ်ဃီလီၤ အဝဲသ့ၣ်သူၣ်ထီၣ်ဃးတၢ်ဘါတၢ်သူၣ်ထီၣ်တဖၣ်အါမးလီၤ သူၣ်ထီၣ်ဝဲမၤဟးဂီၤက့ၤဝဲလီၤ”န့ၣ်လီၤ
ဖဲအပူၤကွံာ် လါစဲးပထ့ဘၢၣ် ၄သီ မုၣ်ထူၣ် ၂နၣ်ရံၣ်ဃၣ်ဃၣ်ဆၢကတီၢ်ပယီၤသုး Jet Fighter ခံဘ့ၣ်တ့ၢ်လီၤမ့ၣ်ပိၢ်န့ၣ်မၠၣ်ဝတံၣ်လီၢ်ကဝီၤဖိစံးဝဲန့ၣ်လီၤ
“ကဘီယူၤတ့ၢ်လီၤတၢတၢတဖျၢၣ်န့ၣ်ဟံၣ်ဟူးဝးဘၣ်မါသးလီၤ မ့ဝံၤယူၤဝ့ာ်ဝီာ်ဝဲတဘျး အိၣ်တစိၤဖိကဘီယူၤလၢခံတဘ့ၣ်ထးဟဲခးလီၤဝဲခံဖျၢၣ်လီၤ”န့ၣ်မၠၣ်ဝတံၣ်ဝ့ၢ်လီၢ်ကဝီၤဖိစံးဝဲန့ၣ်လီၤ
ခီဖျိလၢပယီၤသုးတ့ၢ်လီၤမ့ၣ်ပိၢ်ဒီးကဘီယူၤအဃိ လဲးခဲးတီၣ်ဖီခိၣ် တၢ်ဘါတၢ်သူၣ်ထီၣ်တဖၣ်ဟးဂီၤနာ်က့ ကမျၢၢ်ဒီသဒၢသုးတကပၤတၢ်ဘၣ်ဒိဘၣ်ထံးတအိၣ်န့ၣ်ကၠသ့းနဲးသုးကျိၤထုးထီၣ်ရၤလီၤတၢ်ကစီၣ်န့ၣ်လီၤ
ကညီကီၢ်စဲၣ်ပူၤ မၠၣ်ဝတံၣ်၊ကီးတရံး၊ကြုၤတုၢ်၊ဖၣ်ပူၣ်၊သၣ်တီၣ်ဒီးနိၣ်တကီဝ့ၢ်သ့ၣ်တဖၣ်အပူၤ ပယီၤသုးဒီးKNLAသုးပာ်ဖှိၣ်တဖၣ်အဘၢၣ်စၢၤ တၢ်ဒုးကဲထီၣ်ကိးမုၢ်နံၤဃၣ်ဃၣ်ဒီးပယီၤသုးခးလီၤကျိဖးဒိၣ် တ့ၢ်လီၤမ့ၣ်ပိၢ်ဒီးကဘီယူၤအဃိ လီၢ်ကဝီၤကမျၢၢ်ဟံၣ်တဖၣ်၊တၢ်ဘူၣ်တၢ်ဘါတၢ်သူၣ်ထီၣ်ဟးဂီၤအိၣ်န့ၣ်လီၢ်ကဝီၤဂံၢ်ခီၣ်ထံးတဖၣ်ပာ်ဖျါဝဲအသိးသ့ၣ်ညါဘၣ်န့ၣ်လီၤ