လါအီကူး၁၀သီ၊၂၀၂၃နံၣ်
ကညီကီၢ်စဲၣ် မၠၣ်ဝတံၣ်-ကီးတရံး ကစၢၢ်ကျဲတြဲၤအိၣ်ခိးထၢစ့အိၣ်အတီၤ၁၀ဃၣ်ဃၣ်န့ၣ်သ့ၣ်ညါဘၣ်လၢ ပှၤနီသိလ့ၣ်တဖၣ်အိၣ်န့ၣ်လီၤ
လါအီကူး ၇သီဂီၤဆၢကတီၢ် မၠၣ်ဝတံၣ်-ကီးတရံးအ့ရှါကျဲဟီၣ်ခိၣ်လာ်အဃိ ကျဲဟးဂီၤဒီး သိလ့ၣ်ဒိးလဲတဖၣ်ဘၣ်လဲၤက့ၤဝဲလၢကျဲလီၢ်လံၤတကပၤန့ၣ်သ့ၣ်ညါဘၣ်န့ၣ်လီၤ
ကစၢၢ်ကျဲဖီခိၣ်သိလ့ၣ်လၢဟးထီၣ်လ့ၢ်လိၣ်တဖၣ် ပတုၤတၢ်ခးDKBAဒီးPC၊ပယီၤသုးစုဖီလာ်BGF ၊ပယီၤသုးဒီးသဝီပူၤKNUတဖၣ်ထၢစ့တြဲၤအိၣ်အတီၤ၁၀ဃၣ်ဃၣ်ဒီးကျဲဒီဘိဘၣ်ဟ့ၣ်ကအိၣ်၄၀၀၀၀ဘျဲၣ်န့ၣ်ပှၤနီသိလ့ၣ်တဖၣ်စံးဝဲလီၤ
“ကစၢၢ်ကျဲခဲလၢာ်ပာ်ဖှိၣ်ဘၣ်ဟ့ၣ်ကအိၣ်လၢ၄၀၀၀၀လီၤ တြဲၤအိၣ်အါမးလီၤ တလီၢ်န့ၣ်ဘၣ်ဟ့ၣ်၅၀၀၀၊၃၀၀၀လီၤ ပလဲၤလၢကျဲလီၢ်လံၤတကပၤမီ ခဲလၢာ်အိၣ် ၁၁ လီၢ် တၢ်ကရၢကရိကအိၣ်ခဲလၢာ်ဃၣ်ဃၣ်လီၤ BGFအိၣ် PDFနာ်က့မ့ၢ်အိၣ်ကအိၣ်သၢၣ်တလိၣ်လံာ်နီတမံၤဘၣ်မ့ဟ့ၣ်ကိၣ်ပှ့ၤန့ၣ်ကဲလံ”န့ၣ်အဝဲစံးဝဲလီၤ
မၠၣ်ဝတံၣ်-ကီးတရံးအ့ရှါကျဲတချူးဟးဂီၤခါနာ်က့ သိလ့ၣ်ဖးဒိၣ်တဘၣ်မ့ၢ်ဟးထီၣ်က့ၤလီၤန့ၣ်ကီးတရံး တုၤမူကျိၤဝဲၢ်ကွၣ်လီၢ်ဘၣ်ဟ့ၣ်တြဲၤပှ့ၤကအိၣ်လၢ ၁၈၀၀၀၀ဃၣ်ဃၣ်ဒီးမ့ၢ်လဲၤဝဲဒီး(ပွဲစား)န့ၣ်ဘၣ်ဟ့ၣ်ဒၣ်ဝဲ ၁၂၀၀၀၀န့ၣ်ပှၤနီသိလ့ၣ်ဖးဒိၣ်တဂၤစံးဝဲလီၤ
“သိလ့ၣ်အါတက့ၢ်န့ၣ်လဲၤဝဲဒီးအ့ဂၠ့းလီၤ ဖယါလ့ကွ့း တုၤကျဲလီၢ်လံၤကျဲသီပာ်ဖှိၣ်လီၢ်န့ၣ်၁၀၀၀၀၀၊ကီးတရံးတကပၤဖယါလ့တုၤမၠၣ်ဝတံၣ် ၁၂၀၀၀၀၊ပမ့ၢ်တဒိးလဲအ့ဂၠ့း ဖယါလ့တုၤ (ဇုံ)န့ၣ်ဘၣ်ဟ့ၣ် ၁၈၀၀၀၀လီၤ”န့ၣ်အဝဲစံးဝဲလီၤ
တကးဒံးဘၣ် မၠၣ်ဝတံၣ် မူကျိၤဝဲၢ်ကွၣ်တုၤ နုာ်လီၤမၠၣ်ဝတံၣ်ဝ့ၢ်ပူၤန့ၣ် တြဲၤအိၣ်၄တီၤဒီး တြဲၤတလီၢ်န့ၣ်ဘၣ်ဟ့ၣ် ၅၀၀၀တုၤ ၁၅၀၀၀န့ၣ်အဝဲစံးဝဲလီၤ
မၠၣ်ဝတံၣ်-ကီးတရံးကျဲဟးဂီၤတကးဒံးဘၣ် ဘၣ်ဟ့ၣ်စ့တြဲၤအိၣ်အါဒီးတၢ်ဒုးကဲထီၣ်သ့ၣ်တဖၣ်အဃိပှၤနီသိလ့ၣ်ဖးဒိၣ်တဖၣ်လဲၤတၢ်တန့ၣ်ဘၣ်အိၣ်ပတုၤဃးတၢ်လဲၤတၢ်က့ၤန့ၣ်ပှၤနီသိလ့ၣ်ဖိစံးဝဲဒၣ်လီၤ
ကီးတရံးကီၢ်ဆၣ်ပူၤ ပယီၤသုးဒီးKNLAသုးပာ်ဖှိၣ်တဖၣ်အဘၢၣ်စၢၤတၢ်ဒုးကဲထီၣ်ကိးမုၢ်နံၤဃၣ်ဃၣ်ဒီးပယီၤသုးခးလီၤကျိဖးဒိၣ်အဃိ ဟီၣ်ကဝီၤကမျၢၢ်တဖၣ်ဘၣ်ဒိတပယူာ်ဃီန့ၣ်လီၤ ကညီကီၢ်စဲၣ်ပူၤ ကီးတရံး၊မၠၣ်ဝတံၣ်၊နိၣ်တကီဒီးဖၣ်ပူၣ်ဟီၣ်ကဝီၤတဖၣ်အပူၤတၢ်ဒုးကဲထီၣ်ကိးမုၢ်နံၤဃၣ်ဃၣ်ဒီးဟီၣ်ကဝီၤပူၤထံဒိၣ်ထီၣ်အဃိ ဟီၣ်ကဝီၤကမျၢၢ်တဖၣ်ဘၣ်သဂၢၢ်ဒီးတၢ်ကီတၢ်ခဲန့ၣ်သ့ၣ်ညါဘၣ်လၢKNLAဂံၢ်ခီၣ်ထံးတၢ်ကစီၣ်ပာ်ဖျါထီၣ်ဝဲအသိးန့ၣ်လီၤ