လါအီးကထိဘၢၣ် ၂သီ၊၂၀၂၃နံၣ်
ကညီကီၢ်စဲၣ် မၠၣ်ဝတံၣ်ကီၢ်ဆၣ် ရွှ့ၣ်အ့မၠ့ၤ ဃိၣ်ခိၣ်ပယီၤသုးလၢဆီလီၤသးတဖၣ် ဘၣ်တၢ်ခးအီၤခီဖျိ KNLAသုးပာ်ဖှိၣ်တဖၣ်န့ၣ် Cobra Column 2 Venomသုးကျိၤထုးထီၣ်တၢ်ကစီၣ်န့ၣ်လီၤ
ဖဲအပူၤကွံာ်လါအီးကထိဘၢၣ်၁သီ မုၣ်ထူၣ်၂နၣ်ရံၣ်မံးနံး၁၀ဆၢကတီၢ် KNLAသုးပာ်ဖှိၣ်တဖၣ်၊KTLAသုးပာ်ဖှိၣ်တဖၣ်ဒီး Cobra Column 2 Venomသုးကျိၤတဖၣ်လဲၤထီၣ်ခးဝဲ ပယီၤသုးကီၣ်ကးလၢအိၣ်ဆီလီၤသးဖဲရွှ့ၣ်အ့မၠ့ၣ် ဃိၣ်ခိၣ်တဖၣ် တခီနၣ်ရံၣ်ဃၣ်ဃၣ်န့ၣ်လီၤ
ဖဲတၢ်လဲၤထီၣ်ခးတဘျီအံၤ KNLAသုးပာ်ဖှိၣ်တဖၣ်ထီၣ်န့ၣ်ဝဲတုၤလၢပယီၤသုး သုးကရၢၤအဃၢၢ်ဃိ ပယီၤသုးတကပၤတၢ်ဘၣ်ဒိဘၣ်ထံးအိၣ်နာ်က့ တၢ်ဘၣ်ဒိဘၣ်ထံးနီၢ်ဂံၢ်တသ့ၣ်ညါလီၤတံၤဒံးဘၣ်န့ၣ် Cobra Column 2 Venomသုးကျိၤပှၤဘၣ်မူဘၣ်ဒါတဂၤစံးဝဲန့ၣ်လီၤ
“ပလဲၤခးဒီးကျိဖိဒါလီၤ ပလဲၤခးတုၤလၢအဝဲသ့ၣ်ကရၢၤကပၤတခီနၣ်ရံၣ်ဃၣ်ဃၣ်လီၤ တၢ်ဘၣ်ဒိဘၣ်ထံးဃုသ့ၣ်ညါအဖၢမုၢ်လီၤ ပယီၤသုးတကပၤက့ၤခးကဒါက့ၤပှၤတစဲးလီၤ အဝဲသ့ၣ်ဆိကမိၣ်ဝဲပလဲၤထီၣ်သုးကလၢၤဧါသၢၣ်”န့ၣ် Cobra Column 2 Venomသုးကျိၤပှၤဘၣ်မူဘၣ်ဒါတဂၤစံးဝဲန့ၣ်လီၤ
တကီၢ်ခါခဲအံၤ ပယီၤသုးကျိၤမၤတၢ်ထီၣ်ဒုးလၢ မၠၣ်ဝတံၣ်ကီၢ်ဆၣ် စုးကလံး၊ဝီၤလ့ၤသဝီတကပၤတပယူာ်ဃီအသိး KNLAသုးပာ်ဖှိၣ်တကပၤနာ်က့ ဒ်သိးကထီၣ်ဟံန့ၣ်ပယီၤသုးကီၣ်ကးသုးကလၢၤအဂီၤကဂုၤကျဲးစၢးဝဲန့ၣ်အဝဲစံးအါထီၣ်ဝဲလီၤ
“တကီၢ်ခါခဲအံၤ ပယီၤသုးတကပၤတၢ်ဟူးတၢ်ဂဲၤအိၣ်အသိး ပဝဲနာ်က့ ပကပာ်ဖှိၣ်မၤသကိးတၢ်ဒီး KNLAသုးပာ်ဖှိၣ်ဒီးKTLAသုးပာ်ဖှိၣ်တဖၣ်လီၤ တယံၤဘၣ်ဆၢကတီၢ်ဒ်သိးပကထီၣ်မၤန့ၣ်ပယီၤသုးကလၢၤအဂီၤပကဂုၤကျဲးစၢးဒီးပတဒုးအိၣ်ဘှံးပယီၤသုးဘၣ်”န့ၣ်အဝဲစံးဝဲလီၤ
မၠၣ်ဝတံၣ်ကီၢ်ဆၣ် စုးကလံးဒီးဝီၤလ့ၤတကပၤ တၢ်ဒုးကဲထီၣ်ဒိၣ်ဒိၣ်မုၢ်မုၢ်တအိၣ်ဒံးအဃိ ကမျၢၢ်ဃ့ၢ်တၢ်ဒုးတအိၣ်ဒံးသနာ်က့ ပယီၤသုးကျိၤဟဲထီၣ်ဒီးခးဝဲလီၢ်ကဝီၤကမျၢၢ်တဖၣ်တပယူာ်ဃီအဃိ ဘၣ်ဒိအိၣ်န့ၣ်လီၢ်ကဝီၤဖိတဂၤစံးဝဲလီၤ
“အခဲတၢ်ဒုးတကဲထီၣ်ဒံးဘၣ် ပှၤဃ့ၢ်တၢ်ဒုးတအိၣ်ဒံးဘၣ် သုးကျိၤဟဲထီၣ်ဒီယူၤလီၤ ဖဲမဟိတလါအခါသုးကျိၤဟဲထီၣ်ဒီးခးဝဲဘုခ့ကျီးပူၤပှၤမၤတၢ်ဖိတဖၣ်အဃိဘၣ်ဒိအိၣ်လီၤ ဖဲမနၤနာ်က့ခးဝဲဒီး ၄၀မမလီၤ”န့ၣ်လီၢ်ကဝီၤဖိလၢစုးကလံးတဂၤစံးဝဲလီၤ
ဖဲမၠၣ်ဝတံၣ်ဝ့ၢ်ပူၤ စးထီၣ်လၢလါစဲးပထ့ဘၢၣ်နုာ်လီၤန့ၣ် ပယီၤသုးစုတီၤဖီလာ် ဝဲၤကျိၤဝဲၤဒၢးတဖၣ်ဒီးပယီၤသုးဆီလီၤသးလီၢ်တဖၣ် လီၢ်ကဝီၤကမျၢၢ်ဒီသဒၢသုးတဖၣ်နုာ်လီၤခးဝဲ၊ခးလီၤဝဲမ့ၣ်ပိၢ်ဒီးဒြိအဃိ ပယီၤသုးဖိသံအဂၤ၁၀ဃၣ်ဃၣ်န့ၣ်လီၤ
ဖဲအပူၤကွံာ်လါစဲးပထ့ဘၢၣ် အသီ၂၀အနံၤခါနာ်က့ ရွှ့ၣ်အ့မၠ့ၤ ဃိၣ်ခိၣ် ပယီၤသုးတဖၣ်ဘၣ်တၢ်ခးအီၤအဃိ ပယီၤသုး သုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် ဟ့စီၤလဲး တီခိၣ်ရိၤမဲ ၅၅၉သုးရ့ၣ် သုးရ့ၣ်ခိၣ်၂ ဝ့ကၠီၣ် ဘၣ်ဒိန့ၣ်လီၤ