စက်တင်တာလ ၂၃ ရက်၊ ၂၀၂၃ ခုနှစ်
ကရင်ပြည်နယ်၊ ကျုံဒိုးမြို့နယ်၊ တောင်ကြာအင်းကျေးရွာအုပ်စုရှိ ကျေးရွာတစ်ရွာကို စစ်ကောင်စီတပ်က လက်နက်ကြီးနဲ့ ပစ်ခတ်ခဲ့တာကြောင့် ဒေသခံ ၁ ဦးသေဆုံးခဲ့တယ်လို့ ဒေသခံတွေထံမှသိရပါတယ်။
စက်တင်ဘာလ ၂၃ ရက်နေ့ မနက် ၆ နာရီဝန်းကျင်အချိန်က လှိုင်ဝအမြှောက်ကုန်းကနေ လက်နက်ကြီး နဲ့ဆက်တိုက်ပစ်ခတ်နေတာကြောင့် နောင်တလာကျေးရွာက အသက် ၃၀ ဝန်းကျင်အရွယ် ဒေသခံအမျိုးသားတစ်ဦးသေဆုံးခဲ့တယ်လို့ ဒေသခံအမျိုးသားတစ်ဦးကပြောပါတယ်။
“ဒီနေ့ မနက် နောင်တလာမှာ လက်ကြီးအစမှန် လူတစ်ယောက်သေတယ် ယောင်္ကျားလေးပဲ လက်နက်ကြီး အိမ်ပေါ်ကျလို့ မဟုတ်ဘူး ဇက်နား ကနေလည်မျိုကို ထုတ်ချင်းပေါက်သွားတယ်” လို့ သူကပြောပါတယ်။
စစ်ကောင်စီတပ်ရဲ့လှိုင်ဝအမြှောက်တပ်ကနေ မနက်အစောပိုင်းကတည်းက နေ့လည် ၁ နာရီဝန်းကျင် လောက်ထိကို လက်နက်ကြီးပစ်ခတ်သံတွေကြားနေရသလို နောင်တလာကျေးရွာကဒေသခံတစ်ချို့မှာလည်း အနီးနားကတောတွေ၊ ရာဘာခြံတွေမှာ သွားရောက်နေထိုင်နေကြတယ်လို့ တိမ်းရှောင်နေသူ အမျိုးသားတစ်ဦးကပြောပါတယ်။
“မနက်ကတည်းကပစ်နေတာ ခုထိပဲ လက်နက်ကြီးတွေနဲ့ အမြှောက်တပ်ကနေ လက်ကုန်ပစ်နေတယ် အသေးရော အကြီးရော အခုထိလည်းကြားနေရတုန်းပဲ ကျွန်တော်တို့တော့ ရှောင်နေရပြီအခု ရွာနဲ့ နည်းနည်းဝေးတဲ့ ရော်ဘာခြံတို့ တောဘက်မှာ ရှောင်နေကြတယ်” လို့သူကပြောပါတယ်။
ပြီးခဲ့တဲ့ စက်တင်ဘာလ ၁၆ ရက်နေ့တုန်းကလည်း တောင်ကြာအင်းကျေးရွာက စာသင်ကျောင်းမှာ တပ်စွဲထားတဲ့ စစ်ကောင်စီတပ်ဘက်မှ ၆၀ မမနဲ့ ပစ်ခတ်ခဲ့တာကြောင့် အသက် ၁၅ နှစ်အရွယ်တစ်ဦး လက်နက်ကြီးကျည်ထိမှန်ခဲ့တာကြောင့် ဒဏ်ရာရရှိခဲ့ပါသေးတယ်။
ပြီးခဲ့တဲ့ သြဂုတ်လကနေ အခုစက်တင်ဘာလအထိ ကျုံဒိုးမြို့နယ်နဲ့ ကော့ကရိတ်မြို့နယ်က ကျေးရွာတွေကို စစ်ကောင်စီတပ်က လက်နက်ကြီးနဲ့ပစ်ခတ်ခဲ့တာကြောင့် ကလေးငယ် ၂ ဦး အပါအဝင် ဒေသခံပြည်သူ ၄ ဦး ထိခိုက်ဒဏ်ရာရရှိခဲ့သလို ၁ ဦး သေဆုံးကာ နေအိမ် ၁ လုံး ပျက်စီးခဲ့တယ်လို့ ဒူးပလာယာခရိုင်ရဲ့ ထုတ်ပြန်ချက်အရသိရပါတယ်။
သတင်း – နော်ဖူးဖူး
ဓါတ်ပုံ – CJ
Phar Si Than (People’s Radio Myanmar)