လဲးခးတီၣ် (လက်ခတ်တောင်)လီၢ်ကဝီၤ တၢ်ဒုးကဲထီၣ်အဃိ ဟီၣ်ကဝီၤကမျၢၢ်၇၀၀ဘျဲၣ်ဘၣ်ဃ့ၣ်တၢ်ဒုး

လါယူၤလ့ ၂၂သီ၊၂၀၂၃နံၣ်

ကညီကီၢ်စဲၣ် မၠၣ်ဝတံၣ်ကီၢ်ဆၣ် လဲးခးတီၣ်အဃၢၢ် ပယီၤသုးမီၤစိရိၤဒီးKNLAသုးပာ်ဖှိၣ်တဖၣ်အဘၢၣ်စၢၤ တၢ်ဒုးကဲထီၣ်အဃိ ပွ့လ့အ့မၠ့ၣ်သဝီ၊မၠ့းတၣ်လ့မၠ့ၣ်သဝီ၊ကၠီးလိကၠံသဝီအဃၢၢ်ကမျၢၢ် ၇၀၀ဃၣ်ဃၣ်ဘၣ်ဃ့ၣ်ပူၤဖျဲးသးန့ၣ်သ့ၣ်ညါဘၣ်လၢဟီၣ်ကဝီၤဖိတဖၣ်အိၣ်န့ၣ်လီၤ

စးထီၣ်ဖဲ လါယူၤလံ၉သီအနံၤပယီၤသုးမီၤစိရိၤဒီးKNLAသုးပာ်ဖှိၣ်တဖၣ်အဘၢၣ်စၢၤ တၢ်ဒုးကဲထီၣ်တကးဒံးဘၣ် ပယီၤသုးမီၤစိရိၤခးလီၤကျိဖးဒိၣ်ကိးမုၢ်နံၤအဃိ ပွ့လ့အ့မၠ့ၣ်သဝီ၊မၠ့းတၣ်လ့မၠ့ၣ်သဝီ၊ကၠီးလိကၠံသဝီအဃၢၢ်ကမျၢၢ် ၇၀၀ဃၣ်ဃၣ်ဘၣ်ဃ့ၣ်ပူၤဖျဲးသးဆူ မၠၣ်ဝတံၣ်ဝ့ၢ်ခိၣ် တီရးသီခါဖၠါ၊ဘူးတံၢ်တဖၣ်အိၣ်န့ၣ် ဟီၣ်ကဝီၤပိာ်မုၣ်တဂၤစံးဝဲန့ၣ်လီၤ

“လၢသီခါဖၠါန့ၣ်ပှၤကညီနီၢ်ဂံၢ်ကအိၣ်၅၀၀ဘျဲၣ် ကမျၢၢ်တဖၣ်ဟဲဟ့ၣ်ဝဲဃု၊ကိာ်(ပေါင်မုန့်)လၢကၠိဖီလာ်မီနီ အခဲန့ၣ်ပယီၤသုးမၢသုးလီၢ်သုးကျဲလီၤ ဖီအီၣ်သကိးဖဲန့ၣ်လီၤ ဖဲမဟါလဲၤမၤဘူၣ်ဃုသးတဖၣ်လီၤ ကဝီၤဒ့ပူၤကမျၢၢ်ပာ်ဖှိၣ်ထီၣ်သးဒီးဟဲဟ့ၣ်ဝဲလီၤ”န့ၣ်အဝဲစံးဝဲလီၤ

ကမျၢၢ်လၢဘၣ်ဃ့ၣ်တၢ်ဒုးတဖၣ်အဂီၤ လိၣ်ဘၣ်တၢ်အီၣ်တၢ်အီတကးဒံးဘၣ် တၢ်ကူတၢ်ကာ်တဖၣ်လိၣ်န့ၣ် ပှၤလၢမၤစၢၤတၢ်တဂၤစံးဝဲလီၤ

မၠၣ်ဝတံၣ်ဝ့ၢ်ပူၤ ပှၤမၤစၢၤတၢ်ကရူၢ်ကရၢတဖၣ်နာ်က့ ပတုာ်ဃးတၢ်မၤစၢၤပှၤဃ့ၣ်တၢ်ဒုးဒီးခဲအံၤမၠၣ်ဝတံၣ်ကီၢ်ဆၣ် ကီၢ်ရ့ၤပၢပြးရူပဒိၣ်မၤစၢၤဝဲန့ၣ်ပှၤမၤစၢၤတၢ်ဖိတဂၤစံးဝဲန့ၣ်လီၤ

တကးဒံးဘၣ်မၠၣ်ဝတံၣ်ဝ့ၢ်ပူၤပယီၤသုးမီၤစိရိၤဒီးKNLAသုးပာ်ဖှိၣ်တဖၣ်အဘၢၣ်စၢၤ ခံခီခံကပၤတၢ်ဒုးကဲထီၣ်တုၤလါယူၤလ့ ၂၁သီဒီးပယီၤသုးမီၤစိရိၤတကပၤ မၤအါထီၣ်သုးဂံၢ်ဘါလၢ မၠးတၣ်လ့မၠ့ၣ်သဝီတကပၤအဃိ ကမျၢၢ်တဖၣ်က့ၤဆူဟံၣ်တန့ၣ်ဒံးဘၣ်န့ၣ်သ့ၣ်ညါဘၣ်န့ၣ်လီၤ

တၢ်ဒုးကဲထီၣ်ဒ်အံၤတမ့ၢ်ထဲ မၠၣ်ဝတံၣ်ဝ့ၢ်တဖျၢၣ်ဘၣ် ကညီကီၢ်စဲၣ်ပူၤ ကီၢ်ဆၣ်တဖၣ်လၢအမ့ၢ်ဝဲ ကီးတရံး၊ကြုၤတုၤ၊နိၣ်တကီ၊သၣ်တီၣ်ဒီးဖၣ်ပူၣ်ကီၢ်ဆၣ်တကပၤနာ်က့ ပယီၤသုးမီၤစိရိၤဒီးKNLAသုးပာ်ဖှိၣ်တဖၣ်အဘၢၣ်စၢၤခံခီခံကပၤတၢ်ဒုးဆူၣ်န့ၣ်သ့ၣ်ညါဘၣ်န့ၣ်လီၤ