လါယူၤ ၅ သီ၊၂၀၂၃နံၣ်
ကညီကီၢ်စဲၣ် ပူၤ မၠၣ်ဝတံၣ် ဝ့ၢ်အဃၢၢ်ဟီၣ်ကဝီၤတဖၣ် ယိၤပဒိၣ်ပာ်ပနီၤဝဲလါယူၤ ၅သီအလီၢ်ခံကတၢၢ်ဒီးကပတုၤကွံာ် internetကျိၤဒီး လီမ့ၣ်အူကျိၤန့ၣ် သ့ၣ်ညါဘၣ်လၢဟီၣ်ကဝီၤဖိအိၣ်န့ၣ်လီၤ
မၠၣ်ဝတံၣ်ကီၢ်ဆၤပူၤ စွ့ၣ်ကိကိၣ်၊အ့ၣ်ကၠ့မၠ့ၣ်၊မ့လ့းပဲၣ်၊ကၠီးခဲးဒီးမၠ့းတာ်လ့မၠၣ်ဟီၣ်ကဝီၤတဖၣ် ယိၤပဒိၣ်ကပတုၤကွံာ် လီမ့ၣ်အူန့ၣ်သ့ၣ်ညါဘၣ်န့ၣ်လီၤ ကတီၢ်ခဲအံၤစွ့ၣ်ကိကိၣ်ဝ့ၢ်သီလၢသူဝဲယိၤလီမ့ၣ်အူန့ၣ်တပတုၤခဲအံၤနာ်က့ ဖဲမုၢ်နၤ၁၂နၣ်ရံၣ်န့ၣ်ကပတုၤကွံာ်တၢ်ဟ့ၣ်လီမ့ၣ်အူန့ၣ်ဟီၣ်ကဝီၤဖိတဂၤတဲဝဲန့ၣ်လီၤ
“ယိၤလီမ့ၣ်အူန့ၣ်အခဲဟ့ၣ်ဝဲဒံး သနာ်က့ပနၣ်ဟူ၁၂နၣ်ရံၣ်အလီၢ်ခံကပတုၤဝဲလီၤ စွ့ၣ်ကိိကိၣ်တကပၤန့ၣ်ပတနၣ်ဟူလၢကပတုၤကွံာ်ယိၤ internetကျိၤတဖၣ်ဘၣ်”န့ၣ်အဝဲတဲန့ၣ်လီၤ
အ့ကၠ့မၠ့ၣ်သဝီအဃၢၢ်သဝီတဖၣ်အပူၤနာ်က့ ပာ်ပနီာ်ဝဲလါယူၤ ၅သီအလီၢ်ခံ ကပတုၤကွံာ် ယိၤလီမ့ၣ်အူန့ၣ်ဟီၣ်ကဝီၤဖိတဲဝဲန့ၣ်လီၤ ကီၢ်ပယီၤလီမ့ၣ်အူတဟဲ၊ယိၤကပတုၤကွံာ်တၢ်ဟ့ၣ်လီမ့ၣ်အူအဃိ ဟီၣ်ကဝီၤသဝီဖိတဖၣ်ကဘၣ်ပာ်ဂံၢ်ပာ်ဘါဝဲမ့ၣ်အူစဲးဒီးတၢ်လိမုၤသ့ၣ်တဖၣ်န့ၣ်လီၤ
“ပနၣ်ဟူစးထီၣ်လၢခဲဂီၤန့ၣ်ကပတုၤကွံာ်တၢ်ဟ့ၣ်လီမ့ၣ်အူလီၤ ယိၤ internetကျိၤန့ၣ်ကပတုၤဧါကဟ့ၣ်ဝဲဧါန့ၣ်တလီၢ်တံၢ်ဒံးဘၣ် လၢညါခါန့ၣ်အ့ကၠ့မၠ့ၣ်အဃၢၢ်သဝီတဖၣ်န့ၣ်သူဝဲမ့ၣ်အူစဲးဒီးတၢ်လိမုၤန့ၣ်လီၤ အခဲအံၤယိၤမ့ၢ်တဟ့ၣ်လီမ့ၣ်အူန့ၣ်ပကဘၣ်သူက့ၤဒၣ်တၢ်လိမုၤဒီးမ့ၣ်အူစဲးလီၤသၢၣ်”န့ၣ်အ့ကၠ့ၣ်မၠ့ၣ်အဃၢၢ်သဝီပူၤကမျၢၢ်တဂၤစံးဝဲန့ၣ်လီၤ
မၠးဝတံၣ်ဝ့ၢ်နီၢ်ဂံၢ်၁ကဝီၤဒ့ ကၣ်စံၣ်နိၣ်အဃၢၢ်တၢ်လီၢ်တဖၣ်အပူၤစးထီၣ်ဖဲလါယူၤ ၄သီန့ၣ် ယိၤလီမ့ၣ်အူဟးဂီၤန့ၣ်လီၤ မၠၣ်ဝတံၣ်ဟီၣ်ကဝီၤတဖၣ်အပူၤ ယိၤကွဲၤဒီနၣ်ကျိၤတဖၣ်လၢအမ့ၢ်ဝဲ AIS၊DTACဒီး True move တဖၣ်သူတန့ၣ်အဃိဟီၣ်ကဝီၤဖိတဖၣ်ဘၣ်သူဝဲ MytelဒီးATOMတဖၣ်န့ၣ်လီၤ
