လါအီကူး ၈ သီ၊၂၀၂၃နံၣ်
ကညီကီၢ်စဲၣ် မၠၣ်ဝတံၣ်ဝ့ၢ်အဃၢၢ် လဲးခဲးတီၣ်ဖိခိၣ် စးထိၣ်ဖဲလါအီကူး ၇သီ ဂီၤ၆နၣ်ရံၣ်တုၤ တနံၤအံၤဂီၤဆၢကတီၢ် တၢ်ဒုးကဲထီၣ်တပယူာ်ဃီန့ၣ် မၠၣ်ဝဝံၣ်ဝ့ၢ်ဟီၣ်ကဝီၤဖိတဖၣ်စံးဝဲလီၤ
မၠၣ်ဝတံၣ်အဃၢၢ် လဲးခဲးတီၣ် ဟီၣ်ကဝီၤပူၤ စးထီၣ်ဖဲအပူၤကွံာ်လါယူၤလံ၉သီအနံၤ ပယီၤသုးမီၤစိရိၤဒီး KNLAသုးပာ်ဖှိၣ်တဖၣ်အဘၢၣ်စၢၤတၢ်ဒုးကဲထီၣ်ကိးမုၢ်နံၤဃၣ်ဃၣ်ဒီး ဖဲလါယူၤလံ၂၁သီအနံၤန့ၣ် KNLAသုးပာ်ဖှိၣ်တဖၣ်ထီၣ်န့ၣ်ဝဲ ပယီၤသုးမီၤစိရိၤအသုးကလၢၤန့ၣ်လီၤ
တကီၢ်ခါခဲအံၤ ပယီၤသုးတဖၣ် ဒ်သိးကဒုးန့ၣ်က့ၤဝဲ လဲးခဲးတီၣ်သုးကလၢၤအဂီၤ ထဲးဂံၢ်ထဲးဘါဂုၤကျဲးစၢးဝဲအဃိတၢ်ဒုးကဲထီၣ်ဒီး လဲးခဲးတီၣ်အဃၢၢ် Cobra Column ၊နဂဖၠူၣ်သုးကျိၤန့ၣ် မၠၣ်ဝတံၣ်ဝ့ၢ်ဟီၣ်ကဝီၤဖိစံးဝဲအသိးသ့ၣ်ညါဘၣ်န့ၣ်လီၤ
“ခးဝဲတုၤဟါခီလီၤ ခးဝဲဒီးကျိဖးဒိၣ်၁၀၀ဘျဲၣ်ညါ နဂဖၠူၣ်သုးကျိၤနာ်က့ ပာ်လီၤ ဖဲမဟါလၢတီတိၤတကပၤနာ်က့ကဲထီၣ် လၢသုးလီၢ်လံၤ ကျဲတကပၤနာ်က့ကဲထီၣ်”န့ၣ်မၠၣ်ဝတံၣ်ဝ့ၢ်ဟီၣ်ကဝီၤဖိတဂၤစံးဝဲလီၤ
တကီၢ်ခါခဲအံၤ ဖဲလဲးခဲးတီၣ်ဟီၣ်ကဝီၤပူၤ တၢ်ဒုးကဲထီၣ်တပယူာ်ဃီဒီး မၠၣ်ဝတံၣ်ဝ့ၢ်ခိၣ် ပယီၤသုးကလၢၤတဖၣ် ခးလီၤကျိဖးဒိၣ်တပယူာ်ဃီန့ၣ် Cobra Column ပှၤတဲတၢ်ပၢတဂၤစံးဝဲလီၤ
“ဆၢကတီၢ်ခဲအံၤ တၢ်ဒုးကဲထီၣ်တပယူာ်ဃီလီၤ မၠၣ်ဝတံၣ်ဝ့ၢ်ပူၤ ပယီၤသုးကလၢၤတဖၣ်ခးလီၤကျိဖးဒိၣ်လီၤ ပနၣ်ဟူလၢပယီၤသုးတကပၤသံအါလီၤ တလီၤတံာ်ဒံးဘၣ်”န့ၣ်အဝဲစံးဝဲလီၤ
ခီဖျိတၢ်ဒုးကဲထီၣ်လၢမၠၣ်ဝတံၣ်ဝ့ၢ်ဃၢၢ်အဃိ မဲၣ်ကနဲဟီၣ်ကဝီၤ၊မၠ့ၣ်တၣ်လ့မၠ့ၤ၊ပွ့းလ့အ့မၠ့ၤ၊ကၠီးလိကၠံသီခါဖၠၣ်အဃၢၢ်ဒီးလဲးခဲးတီၣ်ဟီၣ်ကဝီၤပူၤ ကမျၢၢ်၆၀၀ဘျဲၣ်အံၤ ဘၣ်လဲၤဃ့ၢ်တၢ်ဒုးဆူ မၠၣ်ဝတံၣ်ဝ့ၢ်ပူၤ သီခါဖၠၣ်တဖၣ်အိၣ်န့ၣ် ပှၤမၤစၢၤတၢ်ကရူၢ်ဖိတဂၤစံးဝဲန့ၣ်လီၤ
“လၢတီယးကၠိန့ၣ်ကအိၣ် ၁၇၀ဃၣ်ဃၣ်လီၤ လၢကၠခဲးတီတကပၤအိၣ်၁၀၀ဘျဲၣ်လီၤ ပှၤဃ့ၢ်တၢ်ဒုးဖိတဖၣ် လၢကၠိအဂုၤအဂၤနာ်က့အဝဲသ့ၣ်နီၣ်ဖးအိၣ်ဝဲလီၤ အခဲခီဖျိတၢ်စူၤအဃိဘၣ်အိၣ်ဝဲကတံာ်လီၤ မ့ဝံၤဘၣ်ဃ့ၢ်တၢ်ဒုးအိၣ်ထီၣ်တလါဃၣ်ဃၣ်လံအဃိ ပှၤဟ့ၣ်မၤဘူၣ်တၢ်တဖၣ်လီၤစှၤလီၤ”န့ၣ်အဝဲစံးဝဲလီၤ
ကညီကီၢ်စဲၣ်ပူၤ မၠၣ်ဝတံၣ်၊ကီးတရံး၊နိၣ်တကီ၊ဖၣ်ပူၣ်၊သၣ်တီၣ်ဝ့ၢ်သ့ၣ်တဖၣ်အပူၤ တၢ်ဒုးကဲထီၣ်ကိးမုၢ်နံၤဃၣ်ဃၣ်ဒီး မူခိၣ်စူၤတပတုၤအဃိ ထံဒိၣ်ဒီးတၢ်ကီတၢ်ခဲအိၣ်ထီၣ်လီၤ
