ပကိကီၢ်စဲၣ်ဒီးတလၢၤကီၢ်စဲၣ်ကျဲတကပၤ စးထီၣ်ဖဲ တၢ်ဘိးဘၣ်ရၤလီၤမုၢ်နၤတဘၣ်ဟးထီၣ်ဝံၤအလီၢ်ခံ သိလ့ၣ်ဟးထီၣ်က့ၤလီၤစှၤ

လါယူၤလံ ၄သီ ၊၂၀၂၃နံၣ်

ပကိကီၢ်စဲၣ်ဒီးတလၢၤကီၢ်စဲၣ်ပူၤကျဲမုၢ်ဖးဒိၣ်လၢပှၤသူအါတဖၣ်အဖီခိၣ် ကလံၤစိးသုးတၢ်ပၢ နီၢ်ဂံၢ်၂ သုးလီၢ် ထုးထီၣ်မုၢ်နၤတဘၣ်ဟးထီၣ်တၢ်ကလုာ်လၢ ဂီၤ ၆ နၣ်ရံၣ်တုၤဟါ၆နၣ်ရံၣ်ဖဲလါယူၤလံ၁သီဝံၤအလီၢ်ခံ ပှၤဟးထီၣ်က့ၤလီၤစှၤန့ၣ် သ့ၣ်ညါဘၣ်လၢပှၤနီသိလ့ၣ်ဖိတဂၤအိၣ်န့ၣ်လီၤ

စးထီၣ်ဟါခီ ၆ နၣ်ရံၣ်တုၤလၢဂီၤခီ ၆ နၣ်ရံၣ်န့ၣ် တၢ်တဘၣ်ဟးထီၣ်က့ၤလီၤလၢ ၀့ၢ်တကူၣ်–မါတလ့ ကျဲလီၢ်လံၤႇ ၀့ၢ်တကူၣ်–မါတလ့ကျဲမုၢ်ဖးဒိၣ်စံၣ်တၢ်ယံၤႇ ပကိ–စ့ၣ်တီကျဲဒီး တလၢၤကီၢ်ဆၣ်ပူၤ ၀့ၢ်တကူၣ်–မိၣ်တမးကျဲႇ ၀့ၢ်တကူၣ်–ဖၣ်အၣ်ကျဲသ့ၣ်တဖၣ်အံၤဘၣ်အဂ့ၢ်န့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ
ကမျၢၢ်ဒီသဒၢသုးကရူၤထုးတၢ်ကလုာ်အံၤဝံၤအလီၢ်ခံ စးထီၣ်ဟါခီ ၆ နၣ်ရံၣ်တုၤလၢဂီၤခီ ၆ နၣ်ရံၣ်န့ၣ် သိလ့ၣ်ဟးထီၣ်က့ၤလီၤစှၤဒီးပယီၤသုးမၤဃံးထီၣ်တၢ်သမံသမိးနာ်က့ ကမျၢၢ်ဒီသဒၢသုးကရူၤတကပၤတုၤခဲအံၤသမံသမိးတၢ်လၢကျဲမုၢ်ဖးဒိၣ်တအိၣ်ဒံးဘၣ်န့ၣ် ပှၤနီသိလ့ၣ်ဖးဒိၣ်လၢဝ့ၢ်တကူၣ်-ဖၣ်အၣ်၊ဝ့ၢ်တကူၣ်-မါတလ့တဂၤတဲဝဲန့ၣ်လီၤ

“ပှၤနီသိလ့ၣ်တဖၣ်လူၤပိၣ်ထွဲဝဲလီၤ ၆နၣ်ရံၣ်အလီၢ်ခံကျဲဖီခိၣ်သိလ့ၣ်တအိၣ်လၢၤဘၣ်၀့ၢ်တကူၣ်–မါတလ့ကျဲမုၢ်ဖးဒိၣ်နာ်က့လီၤ တုၤခဲအံၤ ပတထံၣ်ဘၣ်PDFဟဲထီၣ်ဆူကျဲမုၢ်ခိၣ်ဒံးဘၣ် လၢကျဲဖီခိၣ်န့ၣ်အိၣ်ဒၣ်ပယီၤသုးလီၤ အဝဲသ့ၣ်န့ၣ်အဲၣ်ဒိးဃ့စ့အဃိအိၣ်လၢကျဲဖီခိၣ်လီၤ တသမံသမိးတၢ်အါအါဘၣ် သမံသမိးဒၣ်ဝဲကွဲာ်ဒီနၣ်ဒ်ညီနုၤလီၤ တချုးလၢတၢ်ပရၢဟးထီၣ်န့ၣ်အိၣ်ဒၣ်ဝဲဖဲ ဝ့ၢ်နုာ်လီၤဒီးဟးထီၣ်အလီၢ်လီၤ အခဲအံၤအိၣ်ဝဲကျဲဒီဘိလီၤ”န့ၣ်အဝဲတဲလီၤ

ဘၣ်ဃးဒီးကမျၢၢ်ဒီသဒၢသုးကရူၤထုးထီၣ်လံာ်အံၤ ကမ့ၢ်ဝဲခီဖျိလၢပယီၤသုးဃ့စ့ဖဲကျဲဖီခိၣ်အဃိလီၤန့ၣ် ပှၤနီသိလ့ၣ်ဖိတဂၤပာ်ဖျါထီၣ်အတၢ်ထံၣ်ဒ်အံၤန့ၣ်လီၤ

“သိလ့ၣ်စှၤလီၤ ဟါခီန့ၣ်တလဲၤအါအါလၢၤဘၣ် ၇နၣ်ရံၣ်မ့ဘျဲၣ်န့ၣ်မံလီၤ အဝဲသ့ၣ်ဃ့စ့အါအါဂီၢ်ဂီၢ်လီၤ ကျဲဖီခိၣ်ပှၤသမံသမိးတၢ်တဖၣ်တဲအါတဲစှၤတၢ်အဃိလီၤ ဝ့ၢ်တကူၣ်-မၠၣ်ဝတံၣ်မ့ၢ်လဲၤဒၣ်လဲၣ်န့ၣ်လၢာ်၂၂၀၀၀၀လီၤ လၢညါဘၣ်ဟ့ၣ်ဒၣ် ၅၀၀/၁၀၀၀လီၤ လဲၤဟဲက့ၤန့ၣ် ဘၣ်ဟ့ၣ်ဒၣ်၃၀၀၀၀/၄၀၀၀၀လီၤ”န့ၣ် အဝဲတဲန့ၣ်လီၤ
ဘၣ်ဃးဒီးတၢ်ထုးထီၣ်လံာ်ပရၢတဘျီအံၤဒ်သိးမ့ၢ်ရဲၤကျဲၤတၢ်ဒုးသုးကမျၢၢ်ဘၣ်ဒိကစှၤအဂီၤ ကမျၢၢ်တဖၣ်ဒ်သိးတအိၣ်ဖဲပယီၤသုးအဃၢၢ်အဂီၤ သိလ့ၣ်ဟံၣ်တဖၣ်နာ်က့ဒ်သိးတတီၤဝဲဘၣ်ဃးဒီးပယီၤသုးဖိဒီးတၢ်ပီးတၢ်လီတဖၣ်အဂီၤ တၢ်ထုးထီၣ်လံာ်ပရၢတဘ့ၣ်အံၤအရ့အိၣ်တုၤလၢတၢ်ပရၢအသီတဟးထီၣ်အဆၢကတီၢ်လီၤန့ၣ် ကလံၤစိးသုးတၢ်ပၢ နီၢ်ဂံၢ်၂ သုးလီၢ်ပှၤဘၣ်မူဘၣ်ဒါ တ့ၣ်အူတဲဝဲဒၣ်န့ၣ်လီၤ
တကးဒံးဘၣ်ဖဲလါယူၤ အသီ ၁၀နာ်က့တလၢၤကီၢ်စဲၣ်ဒီးတနီသရံၣ်ကီၢ်စဲၣ်ပူၤ သိလ့ၣ်လၢဟးလ့ၣ်လိၣ်ဖဲနီၢ်ဂံၢ်၈ကျဲမုၢ်ဖးဒိၣ်ဖီခိၣ်တဖၣ် ဘၣ်တၢ်ထုးထီၣ်လံာ်ပရၢခိဖျီ KNU သုးက့၆ဝံၤအလီၢ်ခံ စးထီၣ်ဖဲလါယူၤ ၁၈သီတုၤတနံၤအံၤလါယူၤလံ ၄သီအတီၤပူၤ ဟီၣ်ကဝီၤကမျၢၢ်ဒီသဒၢသုးကရူၤတဖၣ်သမံသမိးဝဲသိလ့ၣ်လၢနီၢ်ဂံၢ် ၈ကျဲမုၢ်ဖးဒိၣ်န့ၣ်လီၤ