လါယူၤ ၁၅ သီ၊၂၀၂၃နံၣ်
ကညီကီၢ်စဲၣ်နိးတကီကီၢ်ဆၤပူၤ ဟီၣ်ကဝီၤကမျၢၢ်လၢဃ့ၣ်တၢ်ဒုးတဖၣ် ဘၣ်သဂၢၢ်ဒီးအီၣ်အီအိၣ်ဆိးတၢ်ကီတၢ်ခဲတဖၣ်န့ၣ် သ့ၣ်ညါဘၣ်လၢပှၤဃ့ၣ်တၢ်ဒုးဖိတဖၣ်အိၣ်န့ၣ်လီၤ
နိးတကီကီၢ်ဆၤပူၤဖဲအပူၤကွံာ်လါယူၤ ၂သီအနံၤန့ၣ် ပယီၤသုးစုဖီလာ်ရူတဖၣ်ဘၣ်တၢ်နုာ်လီၤခးအီၤဝံၤအလီၢ်ခံ ပယီၤသုးဒီးKNLAသုးပာ်ဖှိၣ်တဖၣ်အဘၢၢ်စၢၢ်တၢ်ဒုးကဲထီၣ်န့ၣ်လီၤ
တၢ်ဒုးကဲထီၣ်ဒ်အံၤဝံၤအလီၢ်ခံ ပယီၤသုးမၢနိးတကီကီၢ်ဆၤကဝီၤဒ့၆ပူၤ ကမျၢၢ်တဖၣ်သုးအလီၢ်ဒီးတကီၢ်ခါခဲအံၤ ပှၤလၢဘၣ်ဃ့ၣ်တၢ်ဒုးတဖၣ်ဘၣ်သဂၢၢ်ဒီးအီၣ်အီအိၣ်ဆိးတၢ်ကီတၢ်ခဲတဖၣ်န့ၣ်ပှၤဃ့ၣ်တၢ်ဒုးဖိတဲဝဲန့ၣ်လီၤ
“အခဲလၢကဝီၤဒ့၆ပူၤ ပှၤကညီအိၣ်တ့ၢ်ဒၣ်တစဲးလီၤ အါတက့ၤပှၤလဲၤဃ့ၣ်ဆူတလၢၤကီၢ်ပူၤ တနီကဃ့ၣ်အဂီၤစ့မးတအိၣ်ဘၣ် ဘၣ်ဃ့ၣ်ဒ်အံၤအဃိတၢ်ကီတၢ်ခဲအိၣ်အါမးလီၤ တမ့ၢ်ပလီၢ်ပကျဲန့ၣ်ပအိၣ်တမုာ်စ့ၢ်ကီးဘၣ် ပအီၣ်နာ်က့ပအီၣ်ဒ်သိးပဟံၣ်တန့ၣ်ဘၣ်မီ အခဲပဘၣ်အိၣ်လၢ မီၤလမၠ့ၣ်ပူၤပဘူးပတံၤတဖၣ်အိၣ်လီၤ ပှၤကညီနီၢ်ဂံၢ်အိၣ် ၁၅ ဂၤဃၣ်ဃၣ်လီၤ “န့ၣ်ပှၤဃ့ၣ်တၢ်ဒုးဖိတဂၤတဲဝဲန့ၣ်လီၤ
နိးတကီကီၢ်ဆၤပူၤပှၤဃ့ၣ်တၢ်ဒုးတဖၣ်အါတက့ၤဃ့ၣ်ဆူ တလၢၤကီၢ်စဲၣ်ဒီးတနီန့ၣ်ဃ့ၣ်ဆူ ဃိၣ်သၢဖျၢၣ်ဒီးမူးဒိၤတကပၤန့ၣ်ဟီၣ်ကဝီၤဖိတဲဝဲလီၤ
“အါတက့ၤပှၤဃ့ၣ်နိးတကီဆူမီၤလမၠ့ၤလီၤ ဘၣ်လဲၤလၢကျဲအဂၤန့ၣ်တၢ်ကီအိၣ်လီၤ မ့ၢ်လဲၤလၢမီၤလမၠ့ၤမးန့ၣ်လၢကျဲပယီၤသုးသမံသမိးတၢ်အတြဲၤအိၣ်၅ခါလီၤ တြဲၤတခါန့ၣ်ဘၣ်ဟ့ၣ် ၁၀၀၀ဘးလီၤ ပဃ့ၣ်ဆူချီနခွးတကပၤတန့ၣ်ဘၣ် တိၤကၤအဃိ တနိဃ့ၣ်ဆူဃိၣ်သၢဖျၢၣ်အိၣ်န့ၣ်လီၤ ပှၤဃ့ၣ်ဆူမူးဒိၤနာ်က့အိၣ် “န့ၣ်နိးတကီကီၢ်ဆၤပူၤဟီၣ်ကဝီၤဖိတဲတဲန့ၣ်လီၤ
တကးဒံးဘၣ် တၢ်ကစီၤဟးထီၣ်လၢနိးတကိးဝ့ၢ်ပူၤတၢ်ဒုးကကဲထီၣ်ဒီးနိးတကီဝ့ၢ်ခိၣ်ကမျၢၢ်တဖၣ်တကးဒံးဘၣ် သဝီတဖၣ်လၢအမ့ၢ်ဝဲ ကၠီးခဲကိသဝီ၊မ့ၣ်ဂလၣ်ကိသဝီ၊အူချိၤကိသဝီ၊ဂျိးကိသဝီ၊ရွှ့ၤကိသဝီဒီးသၢတၢၢ်သဝီပူၤကမျၢၢ် ၅၀၀ဘျဲၣ်အံၤဘၣ်ဃ့ၣ်ဆူသဝီကပၤဘူးတံၤတဖၣ်အိၣ်န့ၣ်လီၤ
တကီၢ်ခါခဲအံၤနာ်က့ တုၤလၢလါယူၤ ၁၄ သီန့ၣ်ပယီၤသုးခးလီၤကျိဖးဒိၣ်ကျိဖိဆူ နိးတကီဝ့ၢ်ကပၤကိးမုၢ်နၤန့ၣ်သ့ၣ်ညါဘၣ်လၢနိးတကီဝ့ၢ်ဟီၣ်ကဝီၤဖိအိၣ်န့ၣ်လီၤ
