ချၢၣ်-တကူၣ်တၢၣ် သဝီကရူၢ်ပူၤ ကမျၢၢ်ဒီသဒၢသုးဒီးပယီၤသုးအဘၢၣ်စၢၤ သုးအတၢ်ဖ့ၣ်ဆၢအိၣ်ထီၣ်

လါယူၤလံ ၁၇သီ၊၂၀၂၃နံၣ်

ကညီကီၢ်စဲၣ် နိၣ်တကီကီၢ်ဆၣ် ချၢၣ်-တကူၣ်တၢၣ် သဝီကရူၢ်ပူၤ ဟီၣ်ကဝီၤကမျၢၢ်ဒီသဒၢသုးဒီးပယီၤသုးအဘၢၣ်စၢၤ သုးအတၢ်ဖ့ၣ်ဆၢအိၣ်ထီၣ်ဒံးန့ၣ်သ့ၣ်ညါဘၣ်န့ၣ်လီၤ

စးထီၣ်ဖဲလါယူၤလံ ၁၁သီ ချၢၣ်-တကူၣ်တၢၣ် သဝီကရူၢ်ပူၤ KNLA နဂနံၣ်သုးကျိၤ၊ဟီၣ်ကဝီၤကမျၢၢ်ဒီသဒၢသုး တဖၣ်တၢ်ဒုးကဲထီၣ်ဝံၤ တုၤတနံၤအံၤ လါယူၤလံ ၁၇သီ ခံခီခံကပၤ သုးအတၢ်ဖ့ၣ်ဆၢအိၣ်န့ၣ် နဂနံၣ် သုးကျိၤ သုးကျိၤခံ ကိၣ်ဟ့ တဲလီၤ

“ခံခီခံကပၤ သုးအတၢ်ဖ့ၣ်ဆၢအိၣ်လီၤ တၢ်ဒုးကဲထီၣ်တကဲထီၣ်န့ၣ် ပတဲတန့ၣ်ဒံးဘၣ် တၢ်ဒုးတၢ်အိၣ်သပတဒုးသ့ၣ်ညါလၢတၢ်ချၢဒံးဘၣ်”န့ၣ်အဝဲစံးဝဲလီၤ

ဖဲလါယူၤလံ ၁၄သီအနံၤနာ်က့ စကခ၁၉ စုဖီလာ် ခလရ ၁၆၊ခမရ ၅၈၈၊သုးကျိၤ၂၂ စုဖီလာ် ခမရ ၂၁၀၊ခမရ ၂၀၉ ၊သုးကျိၤ ၄၄စုဖီလာ် ခလရ ၂ တဖၣ် မၤတၢ်ထီၣ်ဒုးသုးလၢ မၠးစ့ရီၣ်ကျဲ (ပလ့ၣ်-ခလဲၣ်)ကျဲအဃိ တၢ်ဒုးကဲထီၣ်န့ၣ်လီၤ

တၢ်ဒုးကဲထီၣ်ဆၢကတီၢ် သိလ့ၣ်လၢလဲၤဖဲန့ၣ်တခိၣ် ပယီၤသုးခးတုၤအိၣ်ပတုာ်ဒီးကမျၢၢ်လဲၤတၢ်သံခံဂၤ ဖှီၣ်ဝဲ၁၇ဂၤဒီး ၂ဂၤန့ၣ်ဃၣ်ပူၤဖျဲးသးန့ၣ်လီၤ တကးဒံးဘၣ်ဖဲလါယူၤလံ ၁၅သီအနံၤနာ်က့ ပလ့ၣ်သဝီပှၤမၤကျီးဖိခံဂၤက့ၤဖှီၣ်ဝဲအဃိ ပာ်ဖှိၣ်အိၣ်၁၉ဂၤလံန့ၣ်အဝဲတဲအါထီၣ်လီၤ

“အိၣ်တခါ ပှၤလၢဘၣ်တၢ်ဖှီၣ်ဃးအကျါ တနီအိၣ်ဒီး ကျိပူၤလီၢ်လၢတၢ်ဘၣ်ယိၤအိၣ်လီၤ တုၤခဲအံၤပှၤတပျဲဟဲက့ၤဘၣ် လၢအကျါပာ်ဃုၣ်ဒီးပိာ်မုၣ်ဖိ၄ဂၤလီၤ”န့ၣ်အဝဲစံးန့ၣ်လီၤ

တကးဒံးဘၣ် ချၢၣ်-တခူၣ်တၢၣ်သဝီပူၤနာ်က့ ဘၣ်တၢ်ပတုၤဃး internet ကျိၤန့ၣ် တခူၣ်တၢၣ် သဝီပူၤ ပိာ်မုၣ်တဂၤတဲန့ၣ်လီၤ

“ဖဲမဟါန့ၣ် internet ကျိၤတန့ၣ်ဘၣ် တနံၤညါတၢ်ခးလိၣ်သးတအိၣ်ဘၣ်”န့ၣ်အဝဲတဲလီၤ

ပယီၤသုးဒီးဟီၣ်ကဝီၤကမျၢၢ်ဒီသဒၢသုကရူၢ်တဖၣ်တၢ်ဒုးကဲထီၣ်၊ပယီၤသုးဟဲခးလီၤတၢ်ဒီးကဘီယူၤ၊အမတ ၃၁၈ (အဘံး)ခးလီၤကျိဖးဒိၣ်တဖၣ်အဃိ ချၢၣ်-တခူၣ်တၢၣ် သဝီကရူၢ် သဝီ၇ဖျၢၣ်အပူၤ ဟီၣ်ကဝီၤဖိ၃၀၀၀ဘျဲၣ်အံၤ ဘၣ်ဃ့ၣ်စံၣ်အိၣ်ဆူကပၤသဝီတဖၣ်ဒီးဘူးတံၤတဖၣ်အိၣ်န့ၣ်သ့ၣ်ညါဘၣ်န့ၣ်လီၤ

တၢ်ဒုးကဲထီၣ်ဒ်အံၤ တမ့ၢ်ထဲနိၣ်တကီကီၢ်ဆၣ်အပူၤဒီး ကညီကီၢ်စဲၣ်ပူၤ ကီၢ်ဆၣ်သ့ၣ်တဖၣ်လၢအမ့ၢ်ဝဲ မၠၣ်ဝတံၣ်၊ကီးတရံး၊ကြုၤတုၤ၊ဖၣ်ပူၣ်ကီၢ်ဆၣ်တဖၣ်အပူၤပယီၤသုးဒီးဟီၣ်ကဝီၤကမျၢၢ်ဒီသဒၢသုးတဖၣ်အဘၢၣ်စၢၤ ခံခီခံကပၤ သုးအတၢ်ဖ့ၣ်ဆၢတဖၣ်အိၣ်န့ၣ်လီၤ