နိုဝင်ဘာလ ၈ရက်၊ ၂၀၂၃ ခုနှစ်
ကရင်ပြည်နယ်၊ကော့ကရိတ်မြို့၊ ဇိနသုခကျောင်းရှေ့မှာ တပ်စွဲနေထိုင်နေတဲ့ စစ်ကောင်စီတပ် ဒရုန်းနဲ့ ဗုံးကြဲတိုက်ခိုက်ခံရပြီး စစ်ကောင်စီတပ်ဘက်က လက်နက်ကြီးတွေနဲ့ ရမ်းသမ်းပစ်ခတ်တာတွေ ပြုလုပ်ခဲ့တယ်လို့ ကော့ကရိတ်မြို့ဒေသခံတွေဆီက သိရပါတယ်။
နိုဝင်ဘာလ ၇ရက်နေ့ ညနေ ၅ နာရီလောက်က ဇိနသုခကျောင်းရှေ့မှာရှိတဲ့ စစ်ကောင်စီတပ်ကို အမည်မသိအဖွဲ့တစ်ခုက ဒရုန်းနဲ့ ဗုံးကြဲတိုက်ခိုက်ခဲ့တာပါ။
အခုလို ဗုံးကြဲတိုက်ခိုက်ခံခဲ့ရတာကြောင့် စစ်ကောင်စီတပ်ဘက်က ထိခိုက်ဒဏ်ရာရတွေရှိခဲ့ပြီး စစ်ကောင်စီတပ်ဘက်က လက်နက်ကြီးတွေနဲ့ ရမ်းသမ်းပစ်ခတ်ခဲ့တယ်လို့ ကော့ကရိတ်မြို့ဒေသခံတွေဆီက သိရပါတယ်။
” ကော့ကရိတ်အဝင်ဝက ဘုရားရှေ့က ဂိတ်ဗုံးချခံထိတာ၊ သူတို့လူတွေ ထိသွားတယ်ကြားတယ်၊ သေချာတော့မသိရသေးဘူး၊ အဲ့ဒါပြီးတော့ ၉၇ ကနေလက်နက်ကြီးတွေနဲ့ပစ်တယ်၊ ညကလည်း ၈နာရီလောက်က လက်နက်ကြီးတွေနဲ့ ပစ်တယ်၊” လို့ ကော့ကရိတ်မြို့ဒေသခံတစ်ဦးက ပြောပါတယ်။
လက်ရှိအချိန် ကော့ကရိတ်မြို့အနီးတစ်ဝိုက်မှာ စစ်ကောင်စီတပ်တွေနဲ့ KNLA ပူးပေါင်းတပ်ဖွဲ့တွေကြား နှစ်ဖက်စစ်ရေးအခြေအနေတင်းမာနေကာ မြို့တော်ဦးရပ်ကွက်ထဲရှိ အိမ်ခြေ ၆၀ ကျော်က ဒေသခံ ၅၀၀ ကျော်လောက်ဟာ ဘေးလွတ်ရာကို ပြောင်းရွှေ့နေထိုင်နေကြရတဲ့အပြင် စစ်ကောက်စီတပ်ကလည်း အစစ်အဆေးတွေ တင်းကြပ်ထားတယ်လို့ ကော့ကရိတ်မြို့ဒေသခံအမျိုးသမီးတစ်ဦးက ဆိုပါတယ်။
” အခုသူတို့အသင့်အနေအထားမှာရှိနေတယ်၊ မြို့တော်ဦးမှာ pdfတွေရောက်နေတာ မနေ့က သတင်းရလို့၊ သူတို့ ကင်းအရမ်းကျပ်နေတာ၊ ခရင်းကုန်းက စကတွေကလည်း ကင်းအရမ်းကျပ်နေတယ်၊ အခုအဲ့နားက ဟာတွေအကုန်ပြောင်းတာ ၃ ရက်ရှိပြီး၊” လို့ ကော့ကရိတ်မြို့ဒေသခံအမျိုးသမီးတစ်ဦးက ဆိုပါတယ်။
ဒါ့အပြင် နှစ်ဖက်တိုက်ပွဲတွေအပြင်းအထန်ဖြစ်ပွားနေတဲ့ ကော့ကရိတ်မြို့အနီးတစ်ဝိုက်မှာရှိတဲ့ ဒေသခံတော်လှန်ရေးတပ်ဖွဲ့တွေဟာ ကော့ကရိတ်မြို့ကို ဝန်းရံပိတ်ဆို့ထားပြီး တိုက်ပွဲတွေ အချိန်မရွေးဖြစ်ပွားလာနိုင်တယ်လို့ KNLA ပူးပေါင်းတပ်ဖွဲ့တွေဆီက သိရပါတယ်။
ကရင်ပြည်နယ်ထဲက မြဝတီ၊ကော့ကရိတ်၊ကျုံဒိုး၊ကြာအင်းဆိပ်ကြီး၊ဖာပွန်၊သံတောင်နဲ့ ဘုရားသုံးဆူမြို့တွေမှာ စစ်ကောင်စီတပ်လက်အောက်ခံ ဌာနဆိုင်ရာရုံးတွေ၊ စစ်ကောင်စီတပ်ဂိတ်တွေနဲ့ စစ်ကောင်စီတပ်ယာဥ်တန်းတွေ မကြာခန ဒရုန်းနဲ့ဗုံးကြဲတိုက်ခိုက်ခံနေရတာပါ။
ပြီးခဲ့တဲ့ နိုဝင်ဘာလ ၃ရက်နေ့နဲ့ ၄ ရက်နေ့ကလည်း ကော့ကရိတ်မြို့ ခလရ (၉၇) အနားရှိစစ်ကောင်စီတပ် ကင်းတွေ ဒရုန်းနဲ့ တိုက်ခိုက်ခံခဲ့ရတာကြောင့် စစ်ကောင်စီတပ်ဘက်က ထိခိုက်ဒဏ်ရာရရှိတာတွေ ရှိခဲ့တယ်လို့ ဒေသတွင်း သတင်းအရင်းမြစ်တွေရဲ့ပြောစကားအရ သိရပါတယ်။
သတင်း – ကိုဖြိုး
ဓာတ်ပုံ – ပုံဟောင်း
Phar Si Than (People’s Radio Myanmar)