လါအီကူး ၁၅သီ၊၂၀၂၃နံၣ်
ကညီကီၢ်စဲၣ် မၠၣ်ဝတံၣ်ဝ့ၢ်ကပၤ လဲးခဲးတီၣ်ဖီခိၣ် ပယီၤသုးဒီးKNLAသုးပာ်ဖှိၣ်အဘၢၣ်စၢၤတၢ်ဒုးကဲထီၣ်န့ၣ်သ့ၣ်ညါဘၣ်န့ၣ်လီၤ
ဖဲလါအီကူး ၁၅သီ ဂီၤဆၢကတီၢ် ပယီၤသုးဟဲထီၣ်သုးကျိၤဒီးဂံၢ်ဘါအါအါဂီၤဂီၤအဃိ ခံခီခံကပၤတၢ်ဒုးကဲထီၣ်ဒီး ပယီၤသုး ခလရ ၂၇၅ဒီး(ထိုင်တော်မူ)အဃၢၢ်တဖၣ် ခးစၢၤလီၤကျိဖးဒိၣ်န့ၣ်Cobra Column ပှၤဘၣ်မူဘၣ်ဒါတဂၤစံးဝဲလီၤ
“ပယီၤသုးဟဲထီၣ်အဃိထံၣ်လိာ်သးတၢ်ဒုးကဲထီၣ်လီၤ ဂံၢ်ဘါအါလီၤ ခးစၢၤဝဲဒီးကျိဖးဒိၣ်အမၠိမၠိလီၤအဝဲသ့ၣ်အိၣ်ခးလီၤဝဲလၢ (ထိုင်တော်မူ)လီၤ ခးလီၤဝဲတပယူာ်ဃီလီၤ”န့ၣ်အဝဲစံးဝဲလီၤ
ခိဖျိတၢ်ဒုးအဃိ ပယီၤသုးတကပၤဘၣ်ဒိ၊သံအိၣ်နာ်က့ပာ်လီၤတံၢ်တန့ၣ်ဒံးဘၣ်န့ၣ်အဝဲစံးဝဲလီၤ
ဖဲဂီၤခီ နၣ်ရၣ်၁၀ဃၣ်ဃၣ်ဆၢကတီၢ်နာ်က့ ဟဲခးဝဲဒီးကဘီယူၤဂၠဲးခံခိၣ်တကးဒံးဘၣ်ပယီၤသုးစုဖီလာ် BGFသုးတဖၣ်ပာ်ဖှိၣ်အါထီၣ်သုးဂံၢ်ဘါန့ၣ်မၠၣ်ဝတံၣ်ဝ့ၢ်ဟီၣ်ကဝီၤဖိစံးဝဲလီၤ
“ဖဲမူကၢၣ်လီၤ ကဘီယူၤဟဲခးလီၤတၢ် အိၣ်သၢဖျၢၣ်လံ ဟံၣ်တနိးဘၣ်သးလီၤကဘီယူၤဟဲခံခိၣ်ညါ တၢ်ဒုးဆူၣ်သပှၢ်လီၤ”န့ၣ်ပိာ်မုၣ်တဂၤစံးဝဲလီၤ
ဟီၣ်ကဝီၤပိာ်ခွါတဂၤနာ်က့ စံးဝဲလၢ”လၢဝ့ၢ်ပူၤBGFသိလ့ၣ်ကအိၣ်လၢ ၄ခိၣ်ဃၣ်ဃၣ်လီၤ လဲၤထီၣ်ဖဲန့ၣ်တကပၤ သိလ့ၣ်တခိၣ်န့ၣ်ပှၤကညီအိၣ် ၈ဂၤ ၁၀ဂၤလီၤ”န့ၣ်လီၤ
တၢ်ဒုးကဲထီၣ်နာ်က့မၠၣ်ဝတံၣ်ဝ့ၢ်ပူၤ ပယီၤသုးစုဖီလာ် ပဒိၣ်ကၠိတဖၣ် တပံးကၠိဘၣ်ဆၣ် ကၠိဖိမိ/ပါအါတက့ၤ တဆှၢအဖိဆူကၠိန့ၣ်မၠၣ်ဝတံၣ်ဝ့ၢ်ဟီၣ်ကဝီၤဖိစံးဝဲလီၤ
ဖဲအပူၤကွံာ်လါယူၤလံ ၂၁သီအနံၤ KNLAသုးပာ်ဖှိၣ်တဖၣ်ဒုးန့ၣ်ဝဲလဲးခဲးတီၣ်ပယီၤသုးကျၢၤဒီးဒ်သိးကဒုးန့ၣ်က့ၤဝဲသုးကလၢၤအဂီၤပယီၤသုးတကပၤမၤတၢ်ထီၣ်ဒုးအဃိ တၢ်ဒုးကဲထီၣ်ကိးမုၢ်နံၤဃၣ်ဃၣ်န့ၣ်လီၤ
တၢ်ဒုးကဲထီၣ်ကိးမုၢ်နံၤဃၣ်ဃၣ်အဃိ မၠၣ်တၣ်လ့မၠ့ၤ၊ကၠီးလိကၠံဒီးတိတတါသဝီအဃၢၢ်ဟီၣ်ကဝီၤဖိ၆၀၀ဘျဲၣ် ဘၣ်ဃ့ၢ်တၢ်ဒုးဆူမၠၣ်ဝတံၣ်ဝ့ၢ်ပူၤသီခါဖၠၣ်တဖၣ်န့ၣ်ဟီၣ်ကဝီၤဖိတဖၣ်စံးဝဲလီၤ
ကညီကီၢ်စဲၣ် ဟီၣ်ကဝီၤတဖၣ်လၢအမ့ၢ်ဝဲ မၠၣ်ဝတံၣ်၊ကီးတရံး၊ကၠူၤတုၤ၊နိၣ်တကီ၊ဖၣ်ပူၣ်၊သၣ်တီၣ်ဝ့ၢ်သ့ၣ်တဖၣ်အပူၤ ပယီၤသုးဒီး KNLAသုးပာ်ဖှိၣ်အဘၢၣ်စၢၤခံခီခံကပၤတၢ်ဒုးကဲထီၣ်တပယူာ်ဃီဒီးဖၣ်အၣ်၊လဲဘွဲဝ့ၢ်သ့ၣ်တဖၣ်အပူၤ ဒုးယၤအတၢ်ဖ့ၣ်ဆၢအိၣ်န့ၣ်သ့ၣ်ညါဘၣ်လၢKNLAဂံၢ်ခီၣ်ထံးတၢ်ကစီၤထုးထီၣ်ရၤလီၤအသိးန့ၣ်လီၤ