လါစဲးပထ့ဘၢၣ် ၂၃သီ၊၂၀၂၃နံၣ်
ကညီကီၢ်စဲၣ် ဖၣ်အၣ်-ဒူသထူကျဲဖီခိၣ် တိၤတဘီဘၣ်တၢ်မၤပိၢ်ထီၣ်ဒီးမ့ၣ်ပိၢ်အဃိ တိၤဖီလာ် အခၢၣ်သးလၢၢ်ထူၣ်တၢၣ် သ့ၣ်ဖးဟးဂီၤန့ၣ် သ့ၣ်ညါဘၣ်လၢဖၣ်အၣ်ဝ့ၢ်လီၢ်ကဝီၤဖိတဖၣ်အိၣ်န့ၣ်လီၤ
ဖဲအပူၤကွံာ်လါစဲးပထ့ဘၢၣ် ၂၂သီ ဂီၤခီ၁နၣ်ရံာ် ၃၅မံးနံးဆၢကတီၢ် ဖၣ်အၣ်-ဒူသထူကျဲဖီခိၣ် တိၤနီၢ်ဂံၢ်(၂/၁၃)ဘၣ်တၢ်မၤပိၢ်ထီၣ်မ့ၣ်ပိၢ်အဃိ တိၤခီၣ်ထံးတၢၣ်ဟးဂီၤဒီးသိလ့ၣ်ဟးထီၣ်က့ၤလီၤကီခဲန့ၣ်ဖၣ်အၣ်ဝ့ၢ်လီၢ်ကဝီၤဖိတဖၣ်စံးဝဲန့ၣ်လီၤ
“ဟးဂီၤန့ၣ် လၢဖၣ်အၣ်တကပၤလီၤ တၢၣ်အဖီလာ်ဟးဂီၤတခီ မ့ၣ်ပိၢ်ဒိၣ်ဧါတသ့ၣ်ညါဘၣ် နၣ်ဟူဘၣ်တၢ်ကလုာ်သီၣ်ဖးဒိၣ်လီၤ”န့ၣ်ဖၣ်အၣ်ဝ့ၢ်လီၢ်ကဝီၤဖိစံးဝဲန့ၣ်လီၤ
ခီဖျိတိၤခီၣ်ထံးတၢၣ်ဟးဂီၤအဃိတိၤဟးဂီၤတဆံးတက့ၢ်အဃိ ဘၣ်ကွာ်တၢ်အိၣ်သးဘၣ်လဲၤဝဲန့ၣ်ပှၤနီသိလ့ၣ်တဂၤစံးဝဲန့ၣ်လီၤ
“တိၤန့ၣ်တဟးဂီၤခဲလၢာ်ဘၣ် လၢအခီၣ်ထံးတၢၣ်ဟးဂီၤအဃိ တိၤကၣ်လီၤတစဲးလီၤ သိလ့ၣ်ကျဲတပံးဘၣ် လဲၤတဘျီဃီအါအါဂီၢ်ဂီၢ်တန့ၣ်ဘၣ်”န့ၣ်အဝဲစံးဝဲလီၤ
တၢ်ပိၢ်ဖးထီၣ်ဝံၤအလီၢ်ခံ ပယီၤသုးကီၣ်ကးတကပၤလဲၤသမံသမိးတၢ်ဒီးတဲဝဲထံၣ်ဝဲ ဝၣ်ဃီသွါတဘိဒီးKNU/KNLA ခိၣ်ဖျီၣ်တဖျၢၣ်န့ၣ်သ့ၣ်ညါဘၣ်န့ၣ်လီၤ
ဖၣ်အၣ်-ဒူသထူ ကျဲတကပၤ တၢ်ပိၢ်ဖးထီၣ်အိၣ်တပယူာ်ဃီဒီးဖဲအပူၤကွံာ်လါယူၤလံ အသီ၁၀ခါနာ်က့ ဖၣ်အၣ်-ဒူသထူသိလ့ၣ်ကျဲ ဘရ့းညံၣ်လ့ဃၢၢ်တိၤတဘိဘၣ်တၢ်မၤပိၢ်ဖးထီၣ်အဃိတိၤဟးဂီၤတဆံးတက့ၢ်ဒီးသိလ့ၣ်ကျဲကးတံၢ်သးအိၣ်န့ၣ်လီၢ်ကဝီၤဂံၢ်ခီၣ်ထံးတၢ်ကစီၣ်စံးဝဲအသိးသ့ၣ်ညါဘၣ်န့ၣ်လီၤ