မၠၣ်ဝတံၣ်ဝ့ၢ်နုာ်လီၤ သ့ၣ်ခါညံၣ်နီၣ်(သင်္ကန်းညီနောင်)သုးတၢ်သမံသမိးတြဲၤလီၢ် ဘၣ်တၢ်ခးလီၤမ့ၣ်ပိၢ်ဒီးဒြိအဃိ ပယီၤသုးစုဖီလာ် ပှၤမၤတၢ်ဖိသံတဂၤ

လါစဲးပထ့ဘၢၣ် ၈သီ၊၂၀၂၃နံၣ်

ကညီကီၢ်စဲၣ် မၠၣ်ဝတံၣ်ဝ့ၢ်နုာ်လီၤ သ့ၣ်ခါညံၣ်နီၣ်သုးတၢ်သမံသမိးတြဲၤအလီၢ် ဘၣ်တၢ်တ့ၤလီၤမ့ၣ်ပိၢ်ဒီးဒြိအဃိ ပယီၤသုးစုဖီလာ် ပှၤမၤတၢ်ဖိသံတဂၤန့ၣ်သ့ၣ်ညါဘၣ်လၢလီၢ်ကဝီၤဖိအိၣ်န့ၣ်လီၤ

စးထီၣ်ဖဲလါစဲးပထ့ဘၢၣ်အထီၣ် ကညီကီၢ်စဲၣ်ပူၤ ပယီၤသုးမီၤစိရိၤစုတီၤဖီလာ် ဝဲၤကျိၤဝဲၤဒၢးရူတဖၣ်ဒီး ပယီၤသုးဆီလီၤသးလီၢ်တဖၣ် ဘၣ်တၢ်တ့ၤလီၤမ့ၣ်ပိၢ်ဒီးဒြိတပယူာ်ဃီန့ၣ်လီၤ

ဖဲအပူၤကွံာ်လါစဲးပထ့ဘၢၣ်၇သီ စးထီၣ်လၢဟါခီ၆နၣ်ရံၣ်တခီဆၢကတီၢ်မၠၣ်ဝတံၣ်ဝ့ၢ်နုာ်လီၤ သ့ၣ်ခါညံၣ်နီၣ် တၢ်သမံသမိးတြဲၤအလီၢ် ဘၣ်တၢ်တ့ၤလီၤမ့ၣ်ပိၢ်ဒီးဒြိအဃိ ပယီၤသုးစုဖီလာ် ပှၤမၤတၢ်ဖိသံတဂၤန့ၣ်သ့ၣ်ညါဘၣ်လၢသ့ၣ်ခါညံၣ်နီၣ်လီၢ်ကဝီၤဖိအိၣ်န့ၣ်လီၤ

“နၣ်ဟူတၢ်ကလုာ်သီၣ်လၢ ၆နၣ်ရံၣ်တခီန့ၣ်လီၤ သီၣ်ဖးဒိၣ်ဖိညါ ဖဲန့ၣ်သံတဂၤ ဘၣ်ဒိအိၣ် ၃/၄ဂၤ တၢ်ကဲထီၣ်သးဝံၤပှၤဟးထီၣ်က့ၤလီၤ ဆှၤလီၤလီၤ”န့ၣ်အဝဲစံးဝဲလီၤ

ဘၣ်တၢ်ခးလီၤမ့ၣ်ပိၢ်ဒီးဒြိဝံၤအလီၢ်ခံ ပယီၤသုးတကပၤမၤဝဲတၢ်သမံသမိးတဖၣ်န့ၣ်သ့ၣ်ညါဘၣ်န့ၣ်လီၤ

ဘၣ်တၢ်ခးလီၤမ့ၣ်ပိၢ်ဒီးဒြိဝံၤအလီၢ်ခံ ကျဲဖီခိၣ်ပှၤဟးထီၣ်က့ၤလီၤ ဆှၤလီၤသနာ်က့ တနံၤအံၤလါစဲးပထ့ဘၢၣ် ၈သီဂီၤခီဆၢကတီၢ် ဒ်ညီနုာ်အသိးပှၤဟးထီၣ်က့ၤလီၤန့ၣ်ရွၣ်သ့းသဝီဖိတဂၤစံးဝဲန့ၣ်လီၤ

“တဂီၤညါအံၤပှၤဟးထီၣ်က့ၤလီၤဒ်ညီနုာ်အသိးလီၤ လၢသ့ၣ်ခါညံၣ်နီၣ်တကပၤန့ၣ် လၢမၠၣ်ဝတံၣ်တကပၤ မူကျိၤဝဲၢ်ကွာ်န့ၣ်တၢ်လဲၤတၢ်က့ၤ ပံးသးတစဲး”န့ၣ်အဝဲစံးဝဲလီၤ

ပယီၤသုးတၢ်သမံသမိးတြဲၤလီၢ်လၢဘၣ်တၢ်တ့ၤလီၤမ့ၣ်ပိၢ်တဘျီအံၤ ပယီၤသုးဒီးပယီၤသုးစုတီၤဖီလာ် သုးခိးကီၢ်ဆၢBGFတဖၣ်အိၣ်ခိးထၢစ့ အါအါဂီၢ်ဂီၢ်လၢ သိလ့ၣ်ဟးထီၣ်က့ၤလီၤတဖၣ်အိၣ်န့ၣ်လီၤ

ဖဲအပူၤကွံာ် လါစဲးပထ့ဘၢၣ် ၃သီ မုၢ်နၤခီ ၇နၣ်ရံၣ်ဆၢကတီၢ်နာ်က့ မၠၣ်ဝတံၣ်ဝ့ၢ် ပၢၤကီၢ်ဝဲၤဒၢးဘၣ်တၢ်တ့ၤလီၤမ့ၣ်ပိၢ်ဒီးဒြိအဃိ မၠၣ်ဝတံၣ်တၢ်မဲာ်ညါသုးရူ သုးခိၣ်ဒိၣ်ဂီၢ်ဂ့ၢ် အီၣ်ကၠီၤမ့ဒီး အဂုၤအဂၤသံ၅ဂၤ ဘၣ်ဒိ ၁၃ဂၤန့ၣ်လီၤ