ဒ်သိးကထီၣ်ဟံန့ၣ်ကဒါက့ၤ လဲးခဲးတီၣ်သုးကလၢၤအဂီၤပယီၤသုး ပာ်ဖှိၣ်မၤအါထီၣ်သုးဂံၢ်ဘါ

လါအီကူး ၂၂သီ၊၂၀၂၃နံၣ်

ဒ်သိးကထီၣ်ဟံန့ၣ်က့ၤ ကညီကီၢ်စဲၣ် မၠၣ်ဝတံၣ်ဝ့ၢ်အဃၢၢ် လဲးခဲးတီၣ်သုးကလၢၤအဂီၤပယီၤသုးမၤအါထီၣ်သုးဂံၢ်ဘါန့ၣ်မၠၣ်ဝတံၣ်ဝ့ၢ်လီၢ်ကဝီၤဖိစံးဝဲလီၤ

မၠၣ်ဝတံၣ်ဝ့ၢ်အဃၢၢ် လဲးခဲးတီၣ်ဖီခိၣ် ပယီၤသုးစုဖီလာ်BGFသုးကလၢၤအံၤ KNLAသုးပၣ်ဖှိၣ်တဖၣ်ဘတဒုးန့ၣ်ဝဲအိၣ်တလါဘျဲၣ်လံဒီး ပယီၤသုးတကပၤဒ်သိးကဟံန့ၣ်က့ၤသုးကလၢၤအံၤအဂီၤ အဝဲသ့ၣ်သုးကျိၤဟဲထီၣ်အိၣ်လံ အဝီ၁၀လံန့ၣ်လီၤ

မၠၣ်ဝတံၣ်ဝ့ၢ်အဃၢၢ် လဲးခဲးတီၣ်ဖီခိၣ်တၢ်ဒုးတကဲထီၣ် အိၣ်၅သီလံဒီးပယီၤသုးတဖၣ်အံၤဆှၢအပှၤသုးဖိဒီးသုးသိလ့ၣ်အခိၣ်၁၀ဆူ လဲးခဲးတီၣ်ဒီးကၠီးလိကၠံတကပၤန့ၣ်မၠၣ်ဝတံၣ်ဝ့ၢ်လီၢ်ကဝီၤဖိစံးဝဲန့ၣ်လီၤ

“တၢ်ဒုးဂၢၤအိၣ်၄သီ၅သီလံ သုးသိလ့ၣ်မ့လဲၤတဘျီန့ၣ်အခိၣ်တဆံဆူကၠီးလိကၠံဒီးလဲးခဲးတီၣ်တကပၤ လၢသိလ့ၣ်ပူၤပှၤကညီအိၣ်အဂၤ၁၀ဘျဲၣ် ကဘီယူၤန့ၣ်ဟဲကိးမုၢ်နံၤလီၤဟဲဝံၤက့ၤလီၤ တခးလီၤဝဲလဲးခဲးတီၣ်ဘၣ် “န့ၣ်မၠၣ်ဝတံၣ်ဝ့ၢ်လီၢ်ကဝီၤဖိစံးဝဲန့ၣ်လီၤ

တကးဒံးဘၣ်ပယီၤသုးစုဖီလာ်သုးခိးကီၢ်ဆၢBGFသုးတဖၣ်နာ်က့ ဟ့ၣ်စ့၂၀၀၀၀(Baht)ဒီးပာ်ဖှိၣ်သုးဖိသီန့ၣ်မၠၣ်ဝတံၣ်ဝ့ၢ်လီၢ်ကဝီၤဖိစံးဝဲန့ၣ်လီၤ

တကီၢ်ခါခဲအံၤ KNLAသုးပာ်ဖှိၣ်တဖၣ်ဟံန့ၣ်ဃးတၢ်လီၢ်လၢလဲးခဲးတီၣ်ဒီး ခီဖျိမၠၣ်ဝတံၣ်-ကီးတရံးအ့ရှါကျဲဟးဂီၤတကးဒံးဘၣ် ကီးတရံးဝ့ၢ်အဃၢၢ်နာ်က့တၢ်ဒုးကဲထီၣ်ကိးမုၢ်နံၤဃၣ်ဃၣ်အဃိ ဖဲတၢ်ပာ်ဖှိၣ်သုးဂံၢ်ဘါလၢကထီၣ်န့ၣ်က့ၤလဲးခဲးတီၣ်အလီၢ်န့ၣ် အဝဲသ့ၣ်ကဘၣ်ဟံးန့ၣ်တၢ်ဆၢကတီၢ်ဒံးအဂ့ၤန့ၣ် KNLAသုးဂံၢ်ခီၣ်ထံးစံးဝဲန့ၣ်လီၤ

“အခဲလၢလဲးခဲးတီၣ်န့ၣ်တၢ်ဒုးဂၢၤလီၤ ပဟံန့ၣ်ဃးဟီၣ်ကဝီၤတၢ်ဒိၣ်စိလီၤ လၢကီးတရံးနာ်က့တၢ်ဒုးကဲထီၣ်အဃိ အဝဲသ့ၣ်ဟဲဆူလဲးခဲးတီၣ်တချူးဒံးဘၣ် လၢအဝဲသ့ၣ်ကပာ်ဖှိၣ်အါထီၣ်ဂံၢ်ဘါလၢလဲးခဲးတီၣ်အဂီၤန့ၣ်မီ အ့ရှါကျဲဟးဂီၤအဃိ အဝဲသ့ၣ်ကဆှၢသုးဖိအဂီၤ တညီဘၣ်”န့ၣ် KNLAသုးဂံၢ်ခီၣ်ထံးတဂၤစံးဝဲန့ၣ်လီၤ

လဲးခဲးတီၣ် သုးကလၢၤလၢ KNLAသုးပာ်ဖှိၣ်တဖၣ်ထီၣ်န့ၣ်ဃးအံၤ ပယီၤသုးခးလီၤကျိဖးဒိၣ်၊တ့ၢ်လီၤမ့ၣ်ပိၢ်ဒီးကဘီယူၤတဖၣ်အဃိ လဲးခဲးတီၣ်ဖိခိၣ် တၢ်ဘူၣ်တၢ်ဘါတၢ်သူၣ်ထီၣ်တဖၣ်ဟးဂီၤအါမးန့ၣ်သ့ၣ်ညါဘၣ်ခီဖျိ Cobra သုးကျိၤထုးထီၣ်ရၤလီၤတၢ်ကစီၣ်အသိးန့ၣ်လီၤ