လါအီကူး ၁၂သီ၊၂၀၂၃နံၣ်
ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢဘိးဘၣ်ရၤလီၤဝဲ ထံကီၢ်ဒီဘ့ၣ်တၢ်ပတုာ်တၢ်ခး(NCA)လံာ်ဃံးဃာ်ဟးဂီၤ၀ဲလံအဂ့ၢ်ဝံၤအလီၢ်ခံ တနီသရံၣ်ကီၢ်စဲၣ် ဟီၣ်ကဝီၤကမျၢၢ်ဒီသဒၢသုးတဖၣ် တၢ်ထံၣ်ကွဲလွဲအိၣ်ထီၣ်န့ၣ် သ့ၣ်ညါဘၣ်ခီဖျိဟီၣ်ကဝီၤကမျၢၢ်ဒီသဒၢသုးတဖၣ်စံးဝဲအသိးန့ၣ်လီၤ
ဖဲအပူၤကွံာ်လါအီကူးအသီ၁၀ ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢဘိးဘၣ်ရၤလီၤဝဲ ထံကီၢ်ဒီဘ့ၣ်တၢ်ပတုာ်တၢ်ခး(NCA)လံာ်ဃံးဃာ်ဟးဂီၤ၀ဲလံအဖီခိၣ် ဘျံးသုးရ့ၣ်တူာ်လိာ်ဝဲဒီးကဖှီၣ်ထီၣ်စုဒီးကဒုးဆၢက့ၤပယီၤသုးန့ၣ် ဘျံးကီၢ်ရ့ၣ်သုးရ့ၢ်၁ ပှၤဘၣ်မူဘၣ်ဒါစံးဝဲဒ်အံၤလီၤ
“အဝဲသ့ၣ်တကပၤတဲဝဲဒ်အံၤအဃိပသးခူဒီးပတူၣ်လိာ်အီလီၤဘျံးကီၢ်ရ့ၣ် သုးရ့ၢ်၁ကပာ်ဖှိၣ်ထီၣ်သးဒီးKNUပကဒုးတၢ်တပယူာ်ဃီလီၤ”န့ၣ်လီၤ
ဘၣ်ဃးဒီး KNUဘိးဘၣ်ရၤလီၤNCAဟးဂီၤလံအဖီခိၣ် တၢ်ပၢၢ်ဆၢသုးတဖၣ်ဒီးပယီၤသုးအဘၢၣ်စၢၤတၢ်ဒုးကဆူၣ်ထီၣ်အဂီၤတၢ်အိၣ်သးအိၣ်ဒီးကမျၢၢ်တဖၣ်ကဘၣ်အိၣ်ဒီးတၢ်ပလီာ်သး ဒီးခီဖျိလၢတၢ်ဒုးအဃိ ဟီၣ်ကဝီၤကမျၢၢ်လၢဘၣ်ဃ့ၢ်တၢ်ဒုးတဖၣ်ကဘၣ်သဂၢၢ်အါထီၣ်တၢ်ကီတၢ်ခဲတဖၣ်ကအါထီၣ်န့ၣ်KNU သုးက့ ၄ဟီၣ်ကဝီၤပူၤကမျၢၢ်တဂၤစံးဝဲလီၤ
“ပသးခူလၢKNUဆၢထၢၣ်တဲာ်တဲာ်ဖျူဖျူအဃိလီၤ တၢ်ဒုးကကဲထီၣ်တၢ်အိၣ်သးတၢ်အိၣ်သးတဖၣ်အိၣ်ထီၣ်လ့အဃိ ပကမျၢၢ်တဖၣ် တၢ်လဲၤတၢ်က့ၤတၢ်အိၣ်တၢ်ဆိးအဖီခိၣ်ကဘၣ်ပလီာ်သးလီၤ မ့ၢ်ဘၣ်ဃ့ၢ်တၢ်ဒုးန့ၣ်တၢ်ကီတၢ်ခဲကအါထီၣ်န့ၣ်လၢညါလီၤ လၢတၢ်ခဲလၢာ်န့ၣ်တၢ်ဂ့ၤတၢ်အၢလူၢ်ပိာ်ထွဲလိာ်သးအဃိ ပကဘၣ်သဂၢၢ်လီၤ”န့ၣ်အဝဲစံးဝဲလီၤ
တကီၢ်ခါခဲအံၤ KNUတၢ်ဘိးဘၣ်ရၤလီၤအဖီခိၣ်တနီသရံၣ်ကီၢ်စဲၣ်ပူၤ ဟီၣ်ကဝီၤကမျၢၢ်ဒီသဒၢသုးဒီးKNUအဘၢၣ်စၢၤ တၢ်ဂ့ၢ်လိာ်တဖၣ်အိၣ်အဃိ ဟီၣ်ကဝီၤဒီသဒၢသုးအကျါပှၤဘၣ်မူဘၣ်ဒါတဂၤစံးဝဲ တၢ်နၤတအိၣ်လၢKNUအဖီခိၣ်ဘၣ်န့ၣ်စံးဝဲလီၤ
ဟီၣ်ကဝီၤဒီသဒၢသုးလၢတအဲၣ်ဒိးပာ်ဖျါအမံၤတဂၤစံးဝဲ”တမ့ၢ်ပတဲခဲလၢာ်ဘၣ် ပှၤတဂ့ၤတဂၤအဃိ တၢ်နၤတအိၣ်ဘၣ်ခီ ကရူၢ်ကရၢတဖၣ်မ့ၢ်ကလဲၤဝဲဒ်လဲၣ်န့ၣ်တသ့ၣ်ညါဒံးဘၣ် ပမ့ၢ်ဒုးခးတၢ်နာ်က့ ပကလဲၤဒီး Local PDFတဖၣ်လီၤ လၢKNUပလဲၤတကဲဘၣ် အဝဲသ့ၣ်န့ၣ်ကဆဲးပလီၢ်ခံဒီးဒီလီၤ”န့ၣ်အဝဲစံးဝဲလီၤ
တၢ်ဘိးဘၣ်ရၤလီၤ NCAဟးဂီၤအံၤ မ့ၢ်ဝဲခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ အတၢ်ဆၢတဲၢ်လၢ ၁၇ဝီတဝီ ခီကရဲးန့ၣ် ပှၤဘၣ်မူဘၣ်ဒါတဂၤစံးဝဲလီၤ
“NCAအံၤ ဖဲပယီၤသုးဟံးန့ၣ်ထံကီၢ်စိကမီၤတလၢကွံာ် ၂၀၀၈ တၢ်သူၣ်ထီၣ်တဘျီအံၤန့ၣ်ဟးဂီၤပာ်လံ အခဲအံၤဒုးသ့ၣ်ညါက့ၤကမျၢၢ်လၢ ခီကရဲးအပူၤKNUအတၢ်ဆၢတဲၢ်လီၤ”န့ၣ်အဝဲစံးဝဲလီၤ
တနီသရံၣ် ကီၢ်စဲၣ်ပူၤ ဟီၣ်ကဝီၤကမျၢၢ်ဒီသဒၢသုးတနီ မၤသကိးတၢ်ဒီးKNUသုးက့အိၣ် တနီဒီး ဖဲအပူၤကွံာ်လါယူၤလံ လၢဟီၣ်ကဝီၤပူၤ KNUဒီးKTLAအဘၢၣ်စၢၤ တၢ်ခးလိာ်သးကဲထီၣ်န့ၣ်သ့ၣ်ညါဘၣ်န့ၣ်လီၤ ဖဲလါယူၤလံ ၁၉သီ သုးက့၄ သုးရ့ၢ် ၁၀ သုးခိၣ်တဂၤသုးဖိသံခံဂၤ ဒီးဘၣ်ဒိ၅ဂၤန့ၣ် သ့ၣ်ညါဘၣ်ခီဖျိ KNUဂံၢ်ခီၣ်ထံးတၢ်ကစီၤတဖၣ်အိၣ်န့ၣ်လီၤ
ပယီၤသုးဟံးန့ၣ်ထံကီၢ်စိကမီၤဝံၤအလီၢ်ခံ KNU သုးက့၄ဟီၣ်ကဝီၤပူၤKNUတကပၤဟံးန့ၣ်တၢ်လီၢ်ခူသူၣ်ဒီး ခးဝဲဟီၣ်ကဝီၤကမျၢၢ်ဒီသဒၢသုးတဖၣ်ဒီး ခီဖျိတၢ်ဂ့ၤတဘျီအံၤအဃိ KNU ဒီးKTLAအဘၢၣ်စၢၤ တၢ်ဒုးကဲထီၣ်အိၣ်န့ၣ် သ့ၣ်ညါဘၣ်ခီဖျိဟီၣ်ကဝီၤတၢ်ကစီၤဂံၢ်ခီၣ်ထံးတဖၣ်စံးဝဲအသိးန့ၣ်လီၤ