လါအီကူး ၈ သီ၊၂၀၂၃နံၣ်
ကညီကီၢ်စဲၣ် မၠၣ်ဝတံၣ်-ကီးတရံးအ့ရှါကျဲဟီၣ်ခိၣ်လာ်အဃိ သိလ့ၣ်ကျဲဟးဂီၤဒီး ဘၣ်ပတုၤဃးသိလ့ၣ် လ့ၢ်ထီၣ်လ့ၢ်လိၤန့ၣ်သ့ၣ်ညါဘၣ်လၢပှၤနီသိလ့ၣ်ဖိတဂၤအိၣ်န့ၣ်လီၤ
ဖဲလါအီကုး ၇သီ ဂီၤ ၁၁နၣ်ရံၣ်ဃၣ်ဃၣ်ဆၢကတီၢ် လၢအ့ရှါကျဲမုၢ်ဖးဒိၣ် ဟီၣ်ခိၣ်လာ်အဃိ သိလ့ၣ်ကျဲဟးဂီၤတကးဒံးဘၣ် ထိၣ်ကီကိၤကျဲဒီး ကစၢၢ်လီၤကျဲတကပၤနာ်က့ ဟီၣ်ခိၣ်လာ်ဒီးကျဲဟးဂီၤအဃိ ဘၣ်ပတုၤဃးသိလ့ၣ် ဟးထီၣ်က့ၤလီၤန့ၣ်ပှၤနီသိလ့ၣ်ဖိတဂၤစံးဝဲလီၤ
“လဲၤတန့ၣ်ဘၣ် အခဲထံဒိၣ်အဃိသိလ့ၣ်ယီၢ်မးလဲၤတန့ၣ်ဘၣ် ကျဲဟးဂီၤ ကစၢၢ်ဟီၣ်ခိၣ်လာ်အဃိ သိလ့ၣ်လဲၤတန့ၣ်ဘၣ် ကျဲလီၢ်လံၤတကပၤနာ်က့လဲၤတန့ၣ်ဘၣ် ထံဒိၣ်ထံအီၣ်အဃိ ဟးဂီၤလၢၤလံ အခဲလဲၤတန့ၣ်ဘၣ် ပှၤဘီဂ့ၤထီၣ်က့ၤတန့ၣ်ဒံးဘၣ် တၢ်စူၤတပတုၤအဃိ “န့ၣ်အဝဲစံးဝဲလီၤ
ပှၤနီသိလ့ၣ်ဖးဒိၣ်တဂၤနာ်က့စံးဝဲလၢ”ကျဲလၢန့ၣ်တကပၤနာ်က့ ဘၣ်တၢ်ပံးဃးအီအဃိလဲၤတန့ၣ်ဘၣ်”န့ၣ်လီၤ
ထိၣ်ကီကိၤကျဲတကပၤ ကျဲဟးဂီၤတဖၣ်ဘီဂ့ၤထီၣ်မ့ၢ်ဝံၤ လါအီကူး ၈သီ ဟါခီမ့တမ့ၢ် ၉သီအနံၤ မ့ၢ်နာ်န့ဝဲလၢလဲၤန့ၣ်မး ကမၢလဲၤဝဲန့ၣ်သ့ၣ်ခါညံၣ်နီၣ် ပှၤဘၣ်မူဘၣ်ဒါတဂၤစံးဝဲလီၤ
“အဝဲသ့ၣ်တဲဖဲမဟါန့ၣ် တနံၤအံၤ ၈သီဟါခီမ့တမ့ၢ် ခဲမုၢ်ဆ့ၣ် မးလဲၤကန့ၣ် ကပာ်လီၤဟီၣ်ခိၣ်ဒံး အဝဲသ့ၣ်ပျဲဝဲမ့ၢ်သ့မးကပျဲလဲၤဝဲလီၤ ထိၣ်ကီကိၤကျဲဝဲန့ၣ်”အဝဲစံးဝဲလီၤ
တကးဒံးဘၣ် မၠၣ်ဝတံၣ်-ကီးတရံးအ့ရှါကျဲ ဟီၣ်ခိၣ်လာ်တဘျီအံၤအပူၤ ပှၤကညီဘၣ်ဒိတဂၤဒီးဘၣ်တၢ်ဆှၢအီဆူ ကီးတရံးတၢ်ဆါဟံၣ်န့ၣ်အဝဲတဲအါထီၣ်ဝဲလီၤ
မၠၣ်ဝတံၣ်ဝ့ၢ်ပူၤနာ်က့ ပယီၤသုးဒီးKNLAသုးပာ်ဖှိၣ်တဖၣ်အဘၢၣ်စၢၤ တၢ်ဒုးလၢကဲထီၣ်တဖၣ်၊ထံဒိၣ်တကးဒံးဘၣ်တၢ်ပီးတၢ်လီတဖၣ်အပှ့ၤထီၣ်အဃိ ဟီၣ်ကဝီၤကမျၢၢ်တဖၣ် ဘၣ်ကီဘၣ်ခဲလၢကိးမုၢ်နံၤအီၣ်အီအိၣ်ဆိးအဂီၤန့ၣ် သ့ၣ်ညါဘၣ်လၢဟီၣ်ကဝီၤဖိအိၣ်န့ၣ်လီၤ
တကီၢ်ခါခဲအံၤ သိလ့ၣ်လၢကလဲၤလီၤ မၠၣ်ဝတံာ်ဆူကီးတရံးကအိၣ်လၢ အကယၤဃၣ်ဃၣ်ဒီး ပယီၤသုး သ့ၣ်ခါညံၣ်နီၣ် တၢ်သမံသမိးတြဲၤလီၢ် သိလ့ၣ်လဲၤတန့ၣ်အဃိ သိလ့ၣ်တဖၣ် ကတာ်ထီသးန့ၣ် ပှၤနီသိလ့ၣ်တဖၣ်စံးဝဲလီၤ
ကညီကီၢ်စဲၣ်ပူၤ ဟီၣ်ကဝီၤတဖၣ်လၢအမ့ၢ်ဝဲ ဖၣ်အၣ်၊မၠၣ်ဝတံာ်၊ကၠူၤတုၤဒီးနိၣ်တကီဝ့ၢ်တကပၤ ပယီၤသုးဒီးKNLAသုးပာ်ဖှိၣ်တဖၣ်အဘၢၣ်စၢၤခံခီခံကပၤထံၣ်လိာ်သးတၢ်ဒုးကဲထီၣ်အိၣ်န့ၣ် သ့ၣ်ညါဘၣ်လၢ KNLAသုးဂံၢ်ခီၣ်ထံးတၢ်ကစီၣ်တဖၣ်အိၣ်န့ၣ်လီၤ