လါအီကူး ၈ သီ၊၂၀၂၃နံၣ်
ကညီကီၢ်စဲၣ် မၠၣ်ဝတံၣ်ဝ့ၢ်ပူၤ တၢ်စူၤတပယူာ်ဃီဒီးထံဒိၣ်တကးဒံးဘၣ် တၢ်ဖိတၢ်လံၤတဖၣ်အပှ့ၤထီၣ်န့ၣ် သ့ၣ်ညါဘၣ်လၢဟီၣ်ကဝီၤဖိအိၣ်န့ၣ်လီၤ
စးထီၣ်ဖဲ လါယူၤလံ လၢခံကတၢၢ်တနွံမူခိၣ်စူၤတပယူၢ်ဃီဒီး ကစၢၢ်ထံလီၢ်အဃိ မၠၣ်ဝတံၣ်ဝ့ၢ် ဟီၣ်ကဝီၤတနီၤအပူၤ ထံဒိၣ်တပယူာ်ဃီဒီး ဂံၢ်ခီၣ်ထံးတၢ်အီၣ်တဖၣ်လၢအမ့ၢ်ဝဲ ဃုသး ၆တလီးတထၢၣ် လၢညါပှ့ၤဘၣ် ၃၀၀၀၀ နာ်က့ အခဲအပှ့ၤထီၣ် ၃၆၀၀၀ဘးဒီး တၢ်ပီးတၢ်လီအဂုၤအဂၤတဖၣ် နာ်က့အပှ့ၤထီၣ်န့ၣ် ဟီၣ်ကဝီၤပိာ်ခွါတဂၤစံးဝဲန့ၣ်လီၤ
“လၢညါဃုသး၆တလီးတထၢၣ်န့ၣ် ၃၀၀၀၀၊အခဲကဲထီၣ် ၃၆၀၀၀ လၢညါသိ၁ လံၣ်တၣ်၄၀၀၀၊အခဲ ၄၅၀၀ ၊၄၈၀၀ အၣ်လူတံာ် လၢညါ၄၀၀၀အခဲ ၄၅၀၀ ပသဲသၣ်န့ၣ်အပှ့ၤတထီၣ်အါဘၣ် တုၤခဲအံၤ ၃၀၀၀လီၤ ခီနီဃ့ တဖၣ်န့ၣ်လၢညါ ၁၈၀၀၀အခဲ ၂၀၀၀၀ဘျဲၣ်လ့”န့ၣ်အဝဲစံးဝဲလီၤ
မၠၣ်ဝတံၣ်ဝ့ၢ်ပူၤ ကျးလၢဆါဆီဒံၣ်အါတက့ၤ ဆီဒံၣ်တလၢအဃိ ဘၣ်ပတုၤဃးတၢ်ဆါတၢ်ပှ့ၤန့ၣ်ဟီၣ်ကဝီၤပိာ်မုၣ်တဂၤစံးဝဲလီၤ
“ကျးခဲလၢာ်ဃၣ်ဃၣ် ဆီဒံၣ်တအိၣ်ဘၣ် ထံဒိၣ်အဃိ သိလ့ၣ်ဆီဒံၣ်တဖၣ်တဟဲဘၣ်စဲ အခဲလဲၤတန့ၣ်ဘၣ်”န့ၣ်အဝဲစံးဝဲလီၤ
တကးဒံးဘၣ် မၠၣ်ဝတံၣ်ဝ့ၢ်ခိၣ် နီၢ်ဂံၢ် ၁၊နီၢ်ဂံၢ်၂၊နီၢ်ဂံၢ်၄၊နီၢ်ဂံၢ်၅ဒီး တုၤလၢမၠ့ၣ်နံၣ်ကိအ့ရှါကျဲထံဒိၣ်အဃိဘၣ်ပတုၤဃးတၢ်မၤဒီးတၢ်ပီးတၢ်လီအပှ့ၤထီၣ်အဃိ တၢ်ကီတၢ်ခဲအိၣ်ထီၣ်လၢ အီၣ်အီအိၣ်ဆိးအဂီၤန့ၣ် သ့ၣ်ညါဘၣ်လၢဟီၣ်ကဝီၤဖိအိၣ်န့ၣ်လီၤ
မၠၣ်ဝတံၣ်ဝ့ၢ်ပူၤထံဒိၣ်အဃိ ဟီၣ်ကဝီၤတနီၤအပူၤ ကမျၢၢ် ၈၀၀ဘျဲၣ် ဘၣ်တၢ်လဲၤပာ်အိၣ်အီၤဖဲ ကိနဝ့သီခါဖၠၣ်၊တီယးသီခါဖၠၣ်ဒီးကၠခဲးတီသီခါဖၠၣ်န့ၣ် ပှၤမၤစၢၤကရူၢ်ဖိတဂၤစံးဝဲန့ၣ်လီၤ
ကညီကီၢ်စဲၣ်ပူၤ ဟီၣ်ကဝီၤတဖၣ်လၢအမ့ၢ်ဝဲ မၠၣ်ဝတံၣ်၊ကီးတရံး၊ကၠူၤတုၤ၊နိၣ်တကီဝ့ၢ်ပူၤထံဒိၣ်ထီၣ်ဒီးဟီၣ်ကဝီၤပူၤနာ်က့ ပယီၤသုးဒီး KNLAသုးပၣ်ဖှိၣ်အဘၢၣ်စၢၤခံခီခံကပၤတၢ်ဒုးကဲထီၣ်န့ၣ်သ့ၣ်ညါဘၣ်လၢKNLAဂံၢ်ခီၣ်ထံးတၢ်ကစီၤထုးထီၣ်ရၤလီၤအသိးန့ၣ်လီၤ