လါယူၤလံ ၃၁သီ၊၂၀၂၃နံၣ်
ကညီကီၢ်စဲၣ် ဖၣ်အၣ်ကီၢ်ဆၣ်ပူၤ ဃိၣ်လိၣ်တိၤတၢ်သမံသမိးတြဲၤလီၢ် တနံၤအံၤ လါယူၤလံ ၃၁သီ ဂီၤ ၆နၣ်ရံၣ်၄၅မံးနံးဆၢကတီၢ် သိလ့ၣ်မ့ၣ်ပိၢ် ပိၣ်ဖးထီၣ်ဝံၤ ပှၤကညီဘၣ်ဒိ အဂၤ၁၀ဃၣ်ဃၣ်န့ၣ်သ့ၣ်ညါဘၣ်လၢဟီၣ်ကဝီၤဖိတဖၣ်အိၣ်န့ၣ်လီၤ
မ့ၣ်ပိၢ် ပိၣ်ဖးထီၣ်ဝံၤလီၢ်ခံ ပယီၤသုးမီၤစိရိၤတၢ်သမံသမိးလီၢ်တြဲၤဟးဂီၤဝံၤ ပယီၤသုးဒီးဟီၣ်ကဝီၤဖိဘၣ်ဒိဒီးသံတဂၤန့ၣ် ပှၤမၤစၢၤတၢ်ကရူၢ်ဖိတဂၤလၢတအဲၣ်ဒိးပာ်ဖျါအမံၤတဂၤစံးဝဲဒၣ်န့ၣ်လီၤ
“အဝဲသ့ၣ်အတၢ်သမံသမိးတြဲဟးဂီၤလၢၤလီၤ သံတဂၤ အဂုၤအဂၤတဖၣ်ဘၣ်ဒိဖဲအခိၣ်၊အခီၣ်လီၤ သၢဂၤန့ၣ်ဘၣ်ဒိဝဲ CDလီၤ ခဲလၢာ်ပာ်ဖှိၣ်၁၂ဂၤအကျါသံတဂၤ ကမျၢၢ်ကျါသံတဂၤ ဘၣ်ဒိခံဂၤ ပိၣ်ဖးထိၣ်န့ၣ်ပသ့ၣ်ညါဘၣ်လၢသိလ့ၣ်ပူၤလီၤ ပနၣ်ဟူပှၤဆဲလီၤဃးဖဲသိလ့ၣ်ပူၤဒီးပှၤပျဲသိလ့ၣ်လဲၤလီၤ ပတအိၣ်လၢတၢ်ကပၤအဃိပတသ့ၣ်ညါဘၣ်”န့ၣ်အဝဲစံးဝဲလီၤ
ပှၤဘၣ်ဒိခီဖျိတၢ်ပိၣ်တဘျီအံၤတဖၣ် ဘၣ်တၢ်ဆှၢအီဆူ ပယီၤသုးစုဖီလာ် တီၣ်ကလ့ သုးတၢ်ဆါဟံၣ်န့ၣ်အဝဲတဲအါထီၣ်ဝဲလီၤ
“ပှၤဘၣ်ဒိတဖၣ်န့ၣ်အိၣ်ဖဲတီၣ်ကလ့သုးတၢ်ဆါဟံၣ် (ကုတင်၁၀၀)န့ၣ်လီၤ”အဝဲစံးဝဲလီၤ
ဃိၣ်လိၣ်တိၤ တၢ်သမံသမိးတြဲၤသိလ့ၣ်မ့ၣ်ပိၢ် ပိၣ်ဖးထီၣ်ဝံၤအလီၢ်ခံ ဖၣ်အၣ်ဝ့ၢ်ပူၤ ပှၤမၤစၢၤတၢ်ကရူၢ်သိလ့ၣ်တဖၣ်လဲၤဆူဃိၣ်လိၣ်တိၤတကပၤန့ၣ်ဟီၣ်ကဝီၤပိာ်မုၣ်တဂၤစံးဝဲန့ၣ်လီၤ
“Ambulance သိလ့ၣ်တဖၣ်ဒီဒူၣ်ဒီထၢလဲၤလီၤဖဲန့ၣ်လီၤ ပနၣ်ဟူလၢဘၣ်ဒိဘၣ်ထံးအါလီၤ”န့ၣ်အဝဲစံးဝဲလီၤ
တကးဒံးဘၣ်ပယီၤသုးမီစိရိၤတဖၣ်တပျဲဟးထီၣ်က့ၤလီၤဖဲဃိၣ်လိၣ်တိၤဘၣ်န့ၣ်သ့ၣ်ညါဘၣ်လၢဖၣ်အၣ်ဝ့ၢ်ဟီၣ်ကဝီၤဖိတဖၣ်အိၣ်န့ၣ်လီၤ
တကီၢ်ခါခဲအံၤ ဖၣ်အၣ်ဝ့ၢ်တၢ်နုာ်လီၤဟးထီၣ်လီၢ်တဖၣ်လၢအမ့ၢ်တဲ အ့ၣ်ဒြူး(တိုးဂိတ်)၊လဲဂွး၊တီၣ်ကလ့နုာ်လီၤတၢ်သမံသမိးတြဲၤ၊ဖၣ်အၣ်-မီၣ်လမၠ့ၤကျဲဖီခိၣ်စၣ်သပြ့ၣ်တိၤတဖၣ်ပယီၤသုးမၤအါထီၣ်သုးဂံၢ်ဘါဒီးသမံသမိးဃံးထီၣ်တၢ်န့ၣ်သ့ၣ်ညါဘၣ်န့ၣ်လီၤ
