တၢ်ဒုးကဲထီၣ်လၢကီးတရံးကီၢ်ဆၣ်ဃၢၢ်အဃိ ဟီၣ်ကဝီၤပိၣ်မုၣ်ဘၣ်ဒိတဂၤ

လါယူၤ ၂၂သီ ၊၂၀၂၃နံၣ်

ကညီကီၢ်စဲၣ် ကီးတရံးကီၢ်ဆၣ်အဃၢၢ် ဖဲအပူၤကွံာ်လါယူၤ ၂၁သီမုၢ်ထူၢ်၁နၣ်ရံၣ်ဃၣ်ဃၣ်ဆၢကတီၢ် တၢ်ဒုးလၢကဲထီၣ်သးအဃိ ဟီၣ်ကဝီၤဖိသၣ်တဂၤဘၣ်ဒိဒီးကျိချံန့ၣ်သ့ၣ်ညါဘၣ်လၢဟီၣ်ကဝီၤဖိအိၣ်န့ၣ်လီၤ

ကီးတရံးကီၢ်ဆၣ် ကမဲၢ်ကိသဝီအဃၢၢ် KNLAသုးပာ်ဖှိၣ်တဖၣ်ဒီးပယီၤသုးဘၢၢ်စၢၢ်တၢ်ဒုးလၢကဲထီၣ်သးအဃိ ဖိသၣ်ပိၣ်မုၣ်သးနံၣ် ၁၀ဘျဲၣ်လၢအိၣ်ဖဲချီတီၢ်သဝီတဂၤ ဘၣ်ဒိဒီးကျိချံဖဲအခီၣ်အဃိ ဘၣ်လဲၤကူစါယါဘျါဖဲကီးတရံးတၢ်ဆါဟံၣ်န့ၣ်သ့ၣ်ညါဘၣ်ခီဖျိ ချီတီၢ်ဟီၣ်ကဝီၤဖိတဂၤတဲဝဲန့ၣ်လီၤ

“ဖိသၣ်ပိၣ်မုၣ်ဖိ မၠးအ့လၢအိၣ်ဖဲ မခ့ၤ လၣ်ဖးထံကျးအဃၢၢ်ချီတီၢ်တိၣ်ဘၣ်ဒိဖဲအခီၣ်လီၤ ဖိသၣ်န့ၣ်အညါဘီၣ်ဒံး အခဲဘၣ်အိၣ်လၢတၢ်ဆါဟံၣ် ဖိသၣ်သၢဂၤန့ၣ် လိၣ်ကွဲဖဲ မၠးအ့ အဟံၣ်လီၢ်ခံဒီးဘၣ်ဒိလီၤ ဘၣ်ကွဲးထုးကျိချံလီၤ”န့ၣ်အဝဲတဲလီၤ

တၢ်ဒုးကဲထီၣ်ဒ်အံၤဝံၤအလီၢ်ခံ ပယီၤသုးစုဖီလာ် ခလရ၉၇ဒီးလ့ၣ်ဝကျိဖးဒိၣ်လုၣ်ခးလီၤကျီဖးဒိၣ်တပယူၤဃီအဃိ လီၤတဲၢ်ပိၣ်ဖးဖဲကီးတရံးကီၢ်ဆၣ်ပူၤန့ၣ် ဟီၣ်ကဝီၤဖိတဲလီၤ

“ဖဲမဟါခးလီၤဝဲညါန့ၣ် ကျိဖးဒိၣ် ကျီဖိ စးထီၣ်ဖဲမုၢ်ထူၣ် ၁နၣ်ရံၣ်န့ၣ်ခးဝဲပတုၤဖဲ ၃နၣ်ရံၣ် ပယီၤသုးတကပၤတပတုၤဘၣ် ပှၤအိၣ်လၢပှၢ်ပူၤတဖၣ်န့ၣ်ခးဝံၤက့ၤလီၤပယီၤသုးခီန့ၣ်ခးဝဲတုၤမုၢ်နၤလီၤ လီၤဖဲကီးတရံးကီၢ်ဆၤပူၤနာ်က့အိၣ်လီၤ”န့ၣ်ကီးတရံးဟီၣ်ကဝီၤဖိတဲန့ၣ်လီၤ

တၢ်ဒုးကဲထီၣ်ဒ်အံၤဝံၤအလီၢ်ခံ ပယီၤသုးဂံၢ်ဘါအါအါဂီၢ်ဂီၢ်ဟံးန့ၣ်ခူသူၣ်တၢ်လီၢ်ဖဲ ကျးကျဲမုၢ်ဖးဒိၣ်ဒီးပၢၢ်ကီၢ်ဝဲၤလီၢ်အဃၢၢ်ဒီးဟံးန့ၣ်ဃးတၢ်ဘံၣ်တၢ်ဘၢန့ၣ်ကီးတရံးဟီၣ်ကဝီၤဖိတဲဝဲန့ၣ်လီၤ