လါအီကူး ၃၁သီ၊၂၀၂၃နံၣ်
ကညီကီၢ်စဲၣ် မၠၣ်ဝတံၣ်-ကီးတရံး အ့ရှါကျဲ ပယီၤသုးမီၤစိရိၤ ပာ်ပနီာ်ဃးဝဲသိလ့ၣ်ဒီးဒုးလဲၤဝဲသိလ့ၣ်ဒီးနီၢ်ဂံၢ်အဃိ ကျဲကးတံာ်သးဒီးသိလ့ၣ်ဖီခိၣ်တၢ်ဖိတၢ်လံၢ်တဖၣ်ဟးဂီၤန့ၣ်သ့ၣ်ညါဘၣ်လၢပှၤနီသိလ့ၣ်ဖိအိၣ်န့ၣ်လီၤ
မၠၣ်ဝတံၣ်-ကီးတရံး အ့ရှါကျဲ တီနီၢ်ထံလီၤဆှူကပၤ ဟီၣ်ခိၣ်လာ်ဒီးကျဲဟးဂီၤအဃိ ဘၣ်သူဝဲ(ဘေလီ)တိၤဒီး တိၤလၢဘၣ်တၢ်ဘှီဃးအီၤလၢဟီၣ်ခိၣ်လာ်အံၤအဖီခိၣ်တကျၢၤအါအါအဃိ သိလ့ၣ်ကျဲကးတံာ်သးကဲထီၣ်အၢအၢသီသီန့ၣ်လီၤ
မၠၣ်ဝတံၣ်-ကီးတရံးအ့ရှါကျဲ ဖီခိၣ်သိလ့ၣ်ကးတံာ်သးအိၣ်အခိၣ်လၢအကယၤဒီးယံာ်ထီၣ်သၢသီလံအဃိ သိလ့ၣ်ဖီခိၣ်တၢ်ပီးတၢ်လီတဖၣ်ဟးဂီၤအိၣ်န့ၣ်ပှၤနီသိလ့ၣ်ဖးဒိၣ်တဂၤစံးဝဲလီၤ
“အခဲလၢကီးတရံးတကပၤသိလ့ၣ်ဖးဒိၣ်ကးတံာ်သးအိၣ်သၢသီလံ အဃိ တၢ်ဒိးတၢ်လာ်တဖၣ်ဟးဂီၤအိၣ်လီၤ သိလ့ၣ်ဟ့က့ၤလီၤလၢမၠၣ်ဝတံၣ်တဖၣ်နာ်က့ ဟးဂီၤအိၣ်လီၤ ပှၤဆှၢထီၣ်ဆူမၠၣ်ဝတံၣ်အါတက့ၤန့ၣ်ဒၣ်ဘုခ့လီ ပှၤပျဲလဲၤအဝဲသ့ၣ်လၢညါလီၤ”န့ၣ်ပှၤနီသိလ့ၣ်တဂၤစံးဝဲလီၤ
သိလ့ၣ်ကျဲကးတံာ်သးန့ၣ် မ့ၢ်ဝဲဘုခ့သိလ့ၣ်လၢကဆှၢထီၣ်ဝဲဆူကီၢ်ကၠီၤတဲာ်တဖၣ်ပျဲလဲၤဝဲလၢညါအဃိ လီၤန့ၣ်လီၢ်ကဝီၤဖိတဂၤစံးဝဲလီၤ
“စးထီၣ်လၢခဲမုၢ်ဆ့ၣ်န့ၣ်ယိၤကီၢ်ပံးဝဲဘုခ့နုာ်လီၤလံ ပှ့ၤဝဲလၢ တီၣ်ကၠံ၊မဲတလ့ တကပၤဒီးဆှၢထီၣ်ဝဲ exportဆူ ယိၤကီၢ်လီၤ ဘုခ့ခီန့ၣ်လၢပှ့ၤဆါန့ၣ်လၢအဆၢကတီၢ်ဒၣ်ဝဲလီၤ ဒ်သိးတချူးတၢ်ပံးန့ၣ်ကလဲၤဘၣ်ဝဲအဂီၤပှၤပျဲလဲၤဝဲအဃီ သိလ့ၣ်ဟ့က့ၤလီၤတဖၣ်ပံးအသးလီၤ”န့ၣ်အဝဲစံးဝဲလီၤ
ခီဖျိကျဲကးတံာ်သးဒ်အံၤအဃိ သိလ့ၣ်ဟးထီၣ်လၢမၠၣ်ဝတံၣ် ဂီၤ၆နၣ်ရံၣ်သိလ့ၣ်တဖၣ်တုၤမုၢ်ဟါတတုၤဆူကီးတရံးအဃိ ဘၣ်မံဖဲကျဲတဖၣ်အိၣ်တကးဒံးဘၣ် ဘၣ်ပျံၤဝဲတၢ်ဒုးကကဲထီၣ်န့ၣ်ပှၤနီသိလ့ၣ်တဂၤစံးဝဲလီၤ
“အဝဲသ့ၣ်ပျဲလဲၤဝဲအခိၣ်သၢဆံန့ၣ်တဘျီ သိလ့ၣ်တဖၣ်ဟးထီၣ်လၢမၠၣ်ဝတံၣ်ဖဲဂီၤခီ၆နၣ်ရံၣ်တဖၣ်နာ်က့ တုၤမုၢ်ဟါတတုၤလၢကီးတရံးဘၣ် အိၣ်လၢကစၢၢ်ခိၣ်လီၤ ဘၣ်ပျံၤလၢတၢ်ဒုးဒံး အဃိဘၣ်ကီဘၣ်ခဲသၢၣ်”န့ၣ်ပှၤနီသိလ့ၣ်တဂၤစံးဝဲလီၤ
တကးဒံးဘၣ် ပယီၤသုးတဖၣ်နာ်က့ စးထီၣ်လၢဟါခီ ၆နၣ်ရံၣ်ကးတံာ်ကွံာ်ဝဲကျဲအဃိ မၠၣ်ဝတံၣ်-ကီးတရံး အ့ရှါကျဲ ပှၤနီသိလ့ၣ်တဖၣ်ဒီးပှၤလဲၤတၢ်ဖိတဖၣ်အီၣ်အီအိၣ်ဆိးအဂီၤတၢ်ကီတၢ်ခဲအိၣ်န့ၣ်ပှၤနီသိလ့ၣ်တဂၤစံးဝဲလီၤ