မၠၣ်ဝတံၣ်ဝ့ၢ်နုာ်လီၤ သ့ၣ်ခါညံၣ်နီၣ် ပယီၤသုးစုတီၤဖီလာ်လီၢ်ကဝီၤသုးတြဲၤလီၢ်ဘၣ်တၢ်ခးအီၤအဃိသံ၃ဂၤ

လါစဲးပထ့ဘၢၣ် ၉သီ၊၂၀၂၃နံၣ်

ကညီကီၢ်စဲၣ် မၠၣ်ဝတံၣ်ဝ့ၢ်နုာ်လီၤ သ့ၣ်ခါညံၣ်နီၣ် သဝီ ပယီၤသုးစုတီၤဖီလာ် လီၢ်ကဝီၤသုးတြဲၤလီၢ်ဘၣ်တၢ်နုာ်လီၤခးအဃိ သုးဖိသံသၢဂၤန့ၣ်သ့ၣ်ညါဘၣ်လၢလီၢ်ကဝီၤဖိတဖၣ်အိၣ်န့ၣ်လီၤ

လါစဲးပထ့ဘၢၣ် ၉သီဂီၤခီ ၉ နီၣ်ထိၣ် ၃၀မံးနံးဆၢကတီၢ် သ့ၣ်ခါညံၣ်နီၣ်ပူၤပယီၤသုးလီၢ်ကဝီၤသုးအိၣ်ခိးတြဲၤ ဘၣ်တၢ်နုာ်လီၤခးအီၤခီဖျိ ကရူၢ်ကရၢလၢတသ့ၣ်ညါအမံၤတဖုအဃိ ပယီၤသုးစုဖီလာ် လီၢ်ကဝီၤသုၤသံသၢဂၤဒီးပှၤလၢဟဲခးတၢ်တဖၣ်အသိလ့ၣ် အိၣ်တ့ၢ်တခိၣ်န့ၣ် လီၢ်ကဝီၤပိၣ်မုၣ်လၢထံၣ်တၢ်ကဲထီၣ်သးအံၤဒီဂးအမဲာ်တဂၤစံးဝဲလီၤ

“ပၢၤကီၢ်ဝဲၤဒၢးကပၤ ဖဲလီၢ်ကဝီၤသုးတြဲၤန့ၣ်ပှၤဟဲခးဒီးကျိလီၤ လၢဂီၤခီန့ၣ်ပထ့ၣ်ပှၤကညီတဖၣ်လီၤ ပှၤနုာ်လိၤခးဖဲ၉နၣ်ရံၣ်ဃၣ်ဃၣ်န့ၣ်လီၤပှၤဟဲခးတၢ်တကပၤ အသိလ့ၣ်အိၣ်တ့ၢ်ဒီးပယီၤသုးသံ၃ဂၤန့ၣ်”အဝဲစံးဝဲန့ၣ်လီၤ

သ့ၣ်ခါညံၣ်နီၣ် တြဲၤဘၣ်တၢ်ခးလီၤဝံၤအလီၢ်ခံ ကးတံာ်ဃးကျဲတစိၤဖိနာ်က့ ဆၢကတီၢ်ခဲအံၤ ပှၤဟးထီၣ်က့ၤလီၤဒ်ညီနုာ်န့ၣ်လီၢ်ကဝီၤပိၣ်ခွါတဂၤစံးဝဲန့ၣ်လီၤ

“အခဲပှၤဟးထီၣ်က့ၤလီၤန့ၣ်လံ ကျဲအိးထီၣ်က့ၤသးလံ ဖဲမဂီၤအဝဲသ့ၣ်အသုးတြဲၤပှၤဟဲခးဒီးသိလ့ၣ်အဃိ အဲၣ်ဒိးဒိဝဲသိလ့ၣ်ဂီၤဒီးကးတံာ်ဃးဝဲကျဲလီၤ အခဲပှၤလဲၤန့ၣ်လံ”အဝဲစံးဝဲန့ၣ်လီၤ

လါအီကူး ၇သီဟါခီ ၆ နီၣ်ထိၣ် မံးနံး၃၀ ဆၢကတီၢ်နာ်က့ မၠၣ်ဝတံၣ်ဝ့ၢ်နုာ်လီၤ သ့ၣ်ခါညံၣ်နီၣ် တၢ်သမံသမိးတြဲၤဘၣ်တၢ်တ့ၢ်လီၤမ့ၣ်ပိၢ်ဒီးဒြိအဃိ ပယီၤသုးစုဖီလာ်ပှၤမၤတၢ်ဖိသံတဂၤန့ၣ်လီၤ

ကညီကီၢ်စဲၣ်လီၢ်ကဝီၤတဖၣ်အပူၤ လါယူၤလံ ၊လါအီကူးဒီး တုၤလၢလါစဲးပထ့ဘၢၣ်အတီၢ်ပူၤကီၢ်ဆၣ်တဖၣ်ပူၤ ပယီၤသုးဆီလီၤလီၢ်တဖၣ် ၊ဝဲၤကျိၤဝဲၤဒၢးတဖၣ်၊ပယီၤသုးသိလ့ၣ်ကျိၤတဖၣ် ဘၣ်တၢ်ခးအီၤသတူၢ်ကလၤဒီးဘၣ်တၢ်ခးလီၤမ့ၣ်ပိၢ်ဒီးဒြိအဃိKNLAသုးဂံၢ်ခီၣ်ထံးတဖၣ်စံးဝဲန့ၣ်လီၤ

တကးဒံးဘၣ် ဖဲလါစဲးပထ့ဘၢၣ်၃သီအနံၤခါနာ်က့ ပယီၤသုးစုတီၤဖီလာ် ပၢၤကီၢ်ဝဲၤဒၢးဒီးပၢပြးရူဘၣ်တၢ်ခးလီၤမ့ၣ်ပိၢ်ဒီးဒြိအဃိ သုးခိၣ်တဖၣ်ဒီးပှၤအဂုၤအဂၤသံ ၆ဂၤဘၣ်ဒိ အဂၤ ၁၀တကးဒံးဘၣ် ပၢၤကီၢ်ဝဲၤဒၢးပူၤ ပၢၤကီၢ်ဒူၣ်ဖိထၢဖိတဖၣ်နာ်က့ ဘၣ်လဲၤအိၣ်ဆိးက့ၤဝဲလၢမၠၣ်ဝတံၣ်ဝ့ၢ်ပူၤ ဘူးတံၤတဖၣ်ဟံၣ်န့ၣ်ပှၤဘူးဒီးပၢၤကီၢ်ဝဲၤလီၢ်တဖၣ်စံးဝဲအသိးသ့ၣ်ညါဘၣ်န့ၣ်လီၤ