ပယီၤသုးစုဖီလာ်ကရူၢ်ကရၢတဖၣ် ဘိးဘၣ်ရၤလီၤဝဲလၢမၠၣ်ဝတံၣ်ဝ့ၢ်ပူၤဒ်သိး တတီၢ်ထီၣ်ဆါဂံၢ်ခီၣ်ထံးတၢ်အီၣ်အပှ့ၤ

လါအီကူး ၁၄သီ၊၂၀၂၃နံၣ်

ကညီကီၢ်စဲၣ် မၠၣ်ဝတံၣ်ဝ့ၢ်ပူၤ ဂံၢ်ခီၣ်ထံးတဖၣ်တကးဒံးဘၣ် တၢ်ဖိတၢ်လံၤတဖၣ် ဒ်သိးတတီၢ်ထီၣ်ဆါအပှ့ၤအဂီၤပယီၤသုးစုဖီလာ် ကရူၢ်ကရၢတဖၣ်ဘိးဘၣ်ရၤလီၤဝဲန့ၣ်သ့ၣ်ညါဘၣ်လၢ ဟီၣ်ကဝီၤဖိတဖၣ်အိၣ်န့ၣ်လီၤ

စးထီၣ်ဖဲလါအီကူးခံနွံတနွံ ပယီၤသုးစုဖီလာ်ကရူၢ်ကရၢတဖၣ် ဒ်သိးတတီၢ်ထီၣ်ဆါတၢ်ဖိတၢ်လံၤတဖၣ်အပှ့ၤအဂီၤ ဘိးဘၣ်ရၤလီၤဝဲဖဲ မၠၣ်ဝတံၣ်ကျးသ့ၣ်တဖၣ်အပူၤန့ၣ် ပှၤဆါတၢ်အီၣ်ဃ့(ကုန်ခြောက်)ဖဲ နီၢ်ဂံၢ် ၅ ကၠိတီကျးတဂၤစံးဝဲန့ၣ်လီၤ

“အဝဲသ့ၣ်ဟးကိးဝဲလၢကျဲဟးဂီၤဝံၤလၢခံတသီန့ၣ်ဟးဘိးဘၣ်ရၤလီၤဝဲဖဲကျးပူၤလီၤတမ့ၢ်တဲဝဲလၢကျးဖးဒိၣ်တဖၣ်အဃိ တလီၤဆီဘၣ်”န့ၣ်အဝဲစံးဝဲလီၤ

တကီၢ်ခါခဲအံၤ ပှၤတီၢ်ထီၣ်ဆါတၢ်ပှ့ၤအံၤ မ့ၢ်လၢကျးဖးဒိၣ်တဖၣ်ဒီးခီဖျိအဝဲသ့ၣ်တီၢ်ထီၣ်တၢ်ပှ့ၤအဃိ ပှၤက့ၤဟံးန့ၣ်ဆါတဆီတဖၣ်နာ်က့ ဘၣ်တီၢ်ထီၣ်ဆါဝဲအပှ့ၤန့ၣ်အဝဲတဲအါထီၣ်ဝဲလီၤ

“အဝဲသ့ၣ်ပာ်ဖှိၣ်ဆိဃးတၢ်အီၣ်တဖၣ်လီၤ ဃုးသးတထၢၣ် ၁၂၀၀၀၀ဘးနာ်က့ ကျဲဟးဂီၤဝံၤလၢခံတနံၤကဲထီၣ် ၁၇၀၀၀၀ဘး အပှ့ၤထီၣ်၅၀၀၀၀ဘးလီၤ ဆီဒံၣ်တကးန့ၣ် လၢညါ၉၀၀၀အခဲကဲထီၣ် ၁၃၀၀၀လီၤ အဝဲသ့ၣ်ကဘၣ်တဲဝဲလၢဃုသးကျး၊သိကျး၊ပသဲကျးဖးဒိၣ်တဖၣ်မီနီ နသူဆါဖဲညီနုာ်အပှ့ၤလၢနသုပှ့ၤအသီတဖၣ်န့ၣ်မးဆီတလဲအပှ့ၤကဘၣ်တဲဝဲဒ်န့ၣ်ခီ အခဲတၢ်ပှ့ၤန့ၣ်အိၣ်လၢအဝဲသ့ၣ်အထးခိၣ်ပူၤလီၤ”န့ၣ်အဝဲစံးဝဲလီၤ

ပယီၤသုးစုဖီလာ်ကရူၢ်ကရၢတဖၣ်ဟးဘိးဘၣ်ရၤလီၤဝဲဒ်အံၤသနာ်က့ တၢ်ဟံးန့ၣ်အရ့လၢပှၤီၢ်ထီၣ်ဆါတၢ်ပှ့ၤတဖၣ်တအိၣ်ဒံးန့ၣ်မၠၣ်ဝတံၣ်ဝ့ၢ်ဟီၣ်ကဝီၤပိာ်မုၣ်တဂၤစံးဝဲလီၤ

“တၢ်ပှ့ၤန့ၣ်အိၣ်ထဲအထီၣ်လီၤ အလီၤန့ၣ်တအိၣ်ဘၣ် အဝဲသ့ၣ်ဟးဘိးဘၣ်ရၤလီၤဝဲဒီးသိလ့ၣ်သနာ်က့ မးတဖှီၣ်ဝဲလၢးတၢ်ဖိးသဲစးအပူၤန့ၣ် ဖှီၣ်ကွာ်တဂၤမီ မတဂၤထီၣ်ကဘူၣ်လဲၣ် ဃုသး(ပေါ်ဆန်း)တထၢၣ်န့ၣ် ၁၉၀၅၀၀ တၢ်ပှ့ၤန့ၣ်ထၢအဖၢမုၢ်လီၤ ဘဲစံၣ်တကဒိၣ် ၅၀၀ဘး”န့ၣ်အဝဲစံးဝဲလီၤ

ခီဖျိတၢ်ပှ့ၤထီၣ်လၢမၠၣ်ဝတံၣ်ဝ့ၢ်ပူၤဒ်အံၤအဃိ ပှၤမၤအီၣ်မုၢ်ဆ့ၣ်မုၢ်ဂီၤတဖၣ်ကအီၣ်ဘၣ်အီဘၣ်အဂီၤကီခဲထီၣ်န့ၣ်ဒံးလၢညါန့ၣ်ဟီၣ်ကဝီၤဖိစံးဝဲလီၤ

ဖဲလါအီကူး ၁၃သီအနံၤနာ်က့ ဖၣ်အၣ်ဝ့ၢ်ပူၤတၢ်ဖိတၢ်လံၤတဖၣ် ဒ်သိးတတီၢ်ထီၣ်ဆါအပှ့ၤအဂီၤပယီၤသုးစုဖီလာ် ကရူၢ်ကရၢတဖၣ်ဘိးဘၣ်ရၤလီၤဝဲန့ၣ်ဖၣ်အၣ်ဝ့ၢဟီၣ်ကဝီၤဖိတဖၣ်စံးဝဲန့ၣ်လီၤ

မၠၣ်ဝတံၣ်-ဝ့ၢ်တကူၣ်သိလ့ၣ်ကျဲဖီခိၣ် ပယီၤသုးအိၣ်ခိးထၢစ့တြဲၤတဖၣ်အိၣ်အါမးဒီး ပှၤဆါတၢ်ဖိတဖၣ်နာ်က့ဒ်သိးအဝဲသ့ၣ်ကအီၣ်ဘၣ်ဝဲအဂီၤဘၣ်တီၢ်ထီၣ်ဆါတၢ်ပှ့ၤအဃိ တၢ်ဖိတၢ်လံၤတဖၣ်အပှ့ၤထီၣ်န့ၣ်လီၤ

ကညီကီၢ်စဲၣ်ပူၤ ကီးတရံး၊မၠၣ်ဝတံၣ်၊ကၠူၤတူၤ၊ဖၣ်ပူၣ်၊သၣ်တီၣ်ကၠံဒီးနိၣ်တကီဝ့ၢ်သ့ၣ်တဖၣ်အပူၤပယီၤသုးဒီးKNLAသုးပာ်ဖှိၣ်အဘၢၣ်စၢၤတၢ်ဒုးကဲထီၣ်ကိးမုၢ်နံၤဃၣ်ဃၣ်ဒီးဟီၣ်ကဝီၤပူၤနာ်က့ တၢ်ပီးတၢ်လီတဖၣ်အပှ့ၤထီၣ်တပယူာ်ဃီန့ၣ်ဟီၣ်ကဝီၤဖိတဲဝဲအသိးသ့ၣ်ညါဘၣ်န့ၣ်လီၤ