ပယီၤသုးခးလီၤကျိဖးဒိၣ်ဆူ သၣ်တီၣ်ဝ့ၢ်ပူၤကိးမုၢ်နံၤ

လါစဲးပထ့ဘၢၣ် ၃ သီ၊၂၀၂၃နံၣ်

ကညီကီၢ်စဲၣ် သၣ်တီၣ်ဝ့ၢ်ဒီးလ့းသိၣ်ဝ့ၢ်သ့ၣ်တဖၣ်အပူၤ ပယီၤသုးခးလီၤကျိဖးဒိၣ်ကိးမုၢ်နံၤဃၣ်ဃၣ်န့ၣ်လီၢ်ကဝီၤဖိတဖၣ်စံးဝဲန့ၣ်လီၤ

စးထီၣ်ဖဲလါအီကူးအခၢၣ်သးနံၤတဖၣ်န့ၣ် လဲးသိၣ်ဝ့ၢ်ပူၤဒီးထိဘိၣ်သုးကလၢၤပယီၤသုးတဖၣ်ခးလီၤကျိဖးဒိၣ်ဆူ သၣ်တီၣ်ဝ့ၢ်အဃၢၢ်ကိးမုၢ်နံၤဃၣ်ဃၣ်န့ၣ်လီၤ

ခီဖျိလၢခးလီၤကျိဖးဒိၣ်ကိးမုၢ်နံၤဃၣ်ဃၣ်အဃိ သၣ်တီၣ်ဝ့ၢ် ကဝီၤဒ့ ၁ပူၤဟံၣ်ဟးဂီၤအဖျၢၣ် ၁၀ဃၣ်ဃၣ်န့ၣ် သၣ်တီၣ်ဝ့ၢ်လီၢ်ကဝီၤဖိတဖၣ်စံးဝဲန့ၣ်လီၤ

“လၢမုၢ်နၤခီပယီၤသုးခးလီၤကျိဖးဒိၣ်လီၤ ကျိဖးဒိၣ်န့ၣ်အိၣ်ခးလီၤဝဲလၢလဲးသိၣ်လိၤ အဝဲသ့ၣ်မ့တဘၣ်သးတၢ်လီၢ်တဖၣ်န့ၣ်ခးလီၤကျိဖးဒိၣ်လီၤ သၣ်မိတီၣ်ကပၤထိဘိၣ်သုးကလၢၤနာ်က့ဒ်န့ၣ်လီၤ အခဲသၣ်တီၣ်ဝ့ၢ်ပူၤဟံၣ်ဟးဂီၤအဖျၢၣ်၁၀ဃၣ်ဃၣ်လံ”န့ၣ်သၣ်တီၣ်ဝ့ၢ်လီၢ်ကဝီၤဖိတဂၤစံးဝဲလီၤ

ခိဖျိပယီၤသုးခးလီၤကျိဖးဒိၣ်ဒ်အံၤအဃိ သၣ်တီၣ်ဝ့ၢ်ကလံၤထံးတကပၤသဝီ၂ဖျၢၣ်ပူၤ လီၢ်ကဝီၤကမျၢၢ် ၄၂၇ဂၤ ဘၣ်ဃ့ၢ်တၢ်ဒုးဆူ ကျီးသ့ၣ်တဖၣ်အပူၤဒီး တၢ်အိၣ်ဆိးလီၢ်တၢ်အီၣ်တၢ်အီတလၢတပှဲၤအဃိ ဘၣ်သဂၢၢ်ဒီးတၢ်ကီတၢ်ခဲန့ၣ်ပှၤမၤစၢၤကမျၢၢ်ဃ့ၢ်တၢ်ဒုးတဂၤစံးဝဲန့ၣ်လီၤ

“လၢပအိၣ်တၢ်လီၢ်န့ၣ် ကရူၢ်ကရၢတဖုမးတဟဲမၤစၢၤဘၣ် တၢ်ဘူၣ်တၢ်ဘါတၢ်အိၣ်ဖှိၣ်တဖၣ်မၤစၢၤဖဲအကြၢးအကြၢးလီၤ WFP ကရူၢ်ဟဲဟ့ၣ်မၤစၢၤဝဲပှၤဃ့ၢ်တၢ်ဒုးတဖၣ်ခံဘျီလီၤ တၢ်မၤစၢၤတန့ၣ်ခဲလၢၤဘၣ် ဒူၣ်ဖိထၢဖိတနီန့ၣ် တနီတန့ၣ်ဘၣ်”န့ၣ်ပှၤမၤစၢၤကမျၢၢ်ဃ့ၢ်တၢ်ဒုးတဂၤစံးဝဲလီၤ

ဆၢကတီၢ်ခဲအံၤ ကမျၢၢ်ဃ့ၢ်တၢ်ဒုးနီၢ်ဂံၢ်အိၣ် ၁၃၇ဂၤ ၊သးနံၣ် ၆၅နံၣ်ဘျဲၣ်သးပှၢ်နီၢ်ဂံၢ် ၆၈ဂၤ ၊သးနံၣ်သၢဆံဘျဲၣ်လွံၢ်ဆံဘျဲၣ်တဖၣ်အိၣ်အဂၤ၅၀ဘျဲၣ်ဃိ လိၣ်ဘၣ်တၢ်မၤစၢၤလၢကသံၣ်ကသီအဂီၤန့ၣ်သ့ၣ်ညါဘၣ်လၢပှၤမၤစၢၤကမျၢၢ်ဃ့ၢ်တၢ်ဒုးတဂၤစံးဝဲန့ၣ်လီၤ

ကညီကီၢ်စဲၣ်ပူၤ မၠၣ်ဝတံၣ်၊ကီးတရံး၊ကြုၢ်တု၊ဖၣ်ပူၣ်၊နိၣ်တကီဒီးသၣ်တီၣ်ဝ့ၢ်သ့ၣ်တဖၣ်အပူၤပယီၤသုးဒီးKNLAသုးပာ်ဖှိၣ်တဖၣ်အဘၢၣ်စၢၤခံခီခံကပၤ ဒုးယၤအတၢ်ဖ့ၣ်ဆၢအိၣ်ဒီး ပယီၤသုးတကပၤခးလီၤကျိဖးဒိၣ်အဃိလီၢ်ကဝီၤဖိဟံၣ်တဖၣ်ဘၣ်ဒိဟးဂီၤအိၣ်န့ၣ်သ့ၣ်ညါဘၣ်လၢKNLAသုးဂံၢ်ခီၣ်ထံးတၢ်ကစီၣ်တဖၣ်အိၣ်န့ၣ်လီၤ