နိၣ်တကီကီၢ်ဆၣ်ပူၤပယီၤသုးစုတီၤဖီလာ်ဝဲၤကျိၤဝဲၤဒၢးရူတဖၣ်ဘၣ်တၢ်ခးလီၤဒီးဒြိအဃိ ပယီၤသုးဖိသံအိၣ်

လါအီကူး၂၉သီ ၊၂၀၂၃နံၣ်

ကညီကီၢ်စဲၣ် နိၣ်တကီကီၢ်ဆၣ် ပယီၤသုးစုတီၤဖီလာ် ပဒိၣ်ဝဲၤကျိၤဝဲၤဒၢးတဖၣ်ဘၣ်တၢ်ခးလီၤဒီးဒြိအဃိ သံအိၣ်န့ၣ်သ့ၣ်ညါဘၣ်န့ၣ်လီၤ

လါအီကူး ၂၈သီ မုၢ်နၤခီ ၁၀နၣ်ရံၣ် ၃၀မံးနံးဆၢကတီၢ် နိၣ်တကီဝ့ၢ်ပူၤ ပယီၤသုးစုတီၤဖီလာ် ဝဲၤကျိၤဝဲၤဒၢးတဖၣ်လၢအမ့ၢ်ဝဲ စံၣ်ပ့ၣ်ရူ၊စရီရူ၊တၢ်သူၣ်တၢ်ဖျး(ဘဏ်)သ့ၣ်တဖၣ်အပူၤပယီၤသုးတကပၤသံ၂ဂၤ ဘၣ်ဒိ၁ဂၤန့ၣ်KNLAသုးဂံၢ်ခီၣ်ထံးတဂၤစံးဝဲလီၤ

“ဖဲမုၢ်ဒဲးနံၤမုၢ်နၤခီအနၣ်ရံၣ်၁၀ မံးနံး၂၀ဃၣ်ဃၣ်ဆၢကတီၢ် ဖဲနိၣ်တကီဒြိတၢ်ထီၣ်ဒုးန့ၣ်ပယီၤသုးသံခံဂၤဘၣ်ဒိတဂၤလီၤခးဝဲလၢစံၣ်ပ့ၣ်ရူ၊စရီရူ၊တၢ်သူၣ်တၢ်ဖျး(ဘဏ်)သ့ၣ်တဖၣ်လီၤ”န့ၣ်အဝဲစံးဝဲလီၤ

ဘၣ်တၢ်ခးလီၤမ့ၣ်ပိၢ်ဒီးဒြိဒ်အံၤဝံၤအလီၢ်ခံ ပယီၤသုးတကပၤခးကဒါက့ၤဝဲဒီးကျိဖးဒိၣ်တဖၣ်န့ၣ်လီၢ်ကဝီၤပိၣ်မုၣ်တဂၤစံးဝဲန့ၣ်လီၤ

“ဖဲမနၤန့ၣ်ခးဝဲ၄ဖျၢၣ်ဃၣ်ဃၣ်လီၤ ခးဝဲအိၣ်ခံနၤလံ တဘၣ်နီတမံၤဘၣ်မီ တနၣ်ဟူဘၣ်ဒိဟးဂီၤအိၣ်ဘၣ်”န့ၣ်အဝဲစံးဝဲလီၤ

ဘၣ်ဃးဒီးတၢ်ခးလီၤမ့ၣ်ပိၢ်ဒီးဒြိတဘျီအံၤ လီၢ်ကဝီၤကမျၢၢ်ဒီသဒၢသုးတကပၤတထုးထီၣ်ရၤလီၤဝဲတၢ်ကစီၣ်နီတမံၤဒံးဘၣ်.

နိၣ်တကီဝ့ၢ်ပူၤ ပယီၤသုးစုဖီလာ် ဝဲၤကျိၤဝဲၤဒၢးတဖၣ်အပူၤ ဘၣ်တၢ်ခးလီၤမ့ၣ်ပိၢ်ဒီးဒြိတပယူာ်ဃီဝံၤဖဲအပူၤကွံာ်လါယူၤလံ ၁၆သီအနံၤခါနာ်က့ နိၣ်တကီဝ့ၢ်ပူၤ ပယီၤသုးစုဖီလာ် ပၢၤကီၢ်ဝဲၤဒၢး၊ပၢပြးရူဒီးဟီၣ်စရီရူတဖၣ်ဘၣ်တၢ်ခးလီၤမ့ၣ်ပိၢ်ဒီးဒြိလီၤ

ခီဖျိပယီၤသုးစုဖီလၣ်ဝဲၤကျိၤဝဲၤဒၢးရူတဖၣ်ဘၣ်တၢ်ခးလီၤမ့ၣ်ပိၢ်ဒီးဒြိတပယူာ်ဃီအဃိ ပှၤမၤတၢ်ဖိတဖၣ်အိၣ်လၢရူပူၤတဘူၣ်လၢၤအဃိ ဘၣ်လဲၤအိၣ်ဝဲဆူ ဘူးတံၤတဖၣ်အိၣ်ဒီးပယီၤသုးဖိတဖၣ်စးထီၣ်လၢဟါခီ၅နၣ်ရံၣ်န့ၣ်ဟးဝ့ာ်ဝီာ်ဒီးမၤဝဲတၢ်သမံသမိးန့ၣ်လီၢ်ကဝီၤဖိတဖၣ်စံးဝဲန့ၣ်လီၤ

ကညီကီၢ်စဲၣ်ပူၤလီၢ်ကဝီၤတဖၣ်လၢအမ့ၢ်ဝဲ မၠၣ်ဝတံာ်၊ကီးတရံး၊ကြုၢ်တု၊နိၣ်တကီ၊သၣ်တီၣ်ဒီးမုၢ်တြီၤကီၢ်ဆၣ်တဖၣ်အပူၤပယီၤသုးဒီးKNLAသုးပာ်ဖိၣ်တဖၣ်အဘၢၣ်စၢၤခံခီခံကပၤထံၣ်လိာ်သးတၢ်ဒုးကဲထီၣ်ကိးမုၢ်နံၤဃၣ်ဃၣ်န့ၣ်သ့ၣ်ညါဘၣ်ခီဖျိKNLAသုးဂံၢ်ခီၣ်ထံးတၢ်ကစီၣ်စံးဝဲအသိးန့ၣ်လီၤ