နိးတကီကီၢ်ဆၤပူၤ ပယီၤသုးဟဲခးလီၤတၢ်ဒီးကဘီယူၤတကးဒံးဘၣ် ခးလီၤကျိဖးဒိၣ်အဃိ ကမျၢၢ်သံ၄ဂၤ

လါယူၤ ၂သီ၊၂၀၂၃နံၣ်

ကညီကီၢ်စဲၣ် နိးတကီကီၢ်ဆၤပူၤ ပယီၤသုးဟဲခးလီၤမ့ၤပိၣ်ဒီး ကဘီယူၤ Mi35 တကးဒံးဘၣ်ခးလီၤကျိဖးဒိၣ်ကျိဖိအဃိ ဟီၣ်ကဝီၤကမျၢၢ်သံ၄ဂၤ ဘၣ်ဒိ၅ဂၤန့ၣ်သ့ၣ်ညါဘၣ်လၢဟီၣ်ကဝီၤဖိအိၣ်န့ၣ်လီၤ

နိးတကီကီၢ်ဆၤအပူၤ တနံၤညါအံၤလါယူၤ၂သီ ဂီၤ ၈နၣ်ရံၣ် ၅ မံးန့းဆၢကတီၢ် ပယီၤသုးဟဲခးလီၤမ့ၤပိၣ်ဒီးကဘီယူၤ Mi35အဃိ သဝီအဃၢၢ်တဖၣ်လၢအမ့ၢ်ဝဲ ချီဝ သဝီပူၤ ဟီၣ်ကဝီၤဖိဘၣ်ဒိဒီးမ့ၤပိၣ်က့တကးဒံးဘၣ် ကမျၢၢ်လၢဟးထီၣ်က့ၤလီၤလၢဝ့ၢ်ပူၤတဖၣ် ပယီၤသုးခးကျိဖးဒိၣ်ကျိဖိအဃိ ဘၣ်ဒိ၄ ဂၤ သံ၄ဂၤန့ၣ်ဟီၣ်ကဝီၤဖိတဲဝဲအသိးသ့ၣ်ညါဘၣ်န့ၣ်လီၤ

“လၢ ချီဝ န့ၣ် ဘၣ်ဒိဒီးကဘီယူၤမ့ၤပိၣ်အက့တဂၤ အခဲတသံဒံးဘၣ် ဘၣ်ဒိလၢအဆံၣ်ဒၢခိၣ် သံသ့ခီဖျိလၢဘၣ်ဒိဆံၣ်ဒၢခိၣ်အဃိ ဝ့ၢ်ပူၤအဝဲသ့ၣ်ခးလီၤန့ၣ်သံ၄ဂၤဘၣ်ဒိ၄ဂၤလီၤ”အဝဲတဲန့ၣ်လီၤ

တကီၢ်ခါခဲအံၤနာ်က့ ပယီၤသုး ခလရ ၃၂ ၊နီၢ်ဂံၢ် ၁ ဒူၣ်ယာ်လုၣ် ခလရ ၂၈၄ သုးတဖၣ်ခးလီၤကျိဖးဒိၣ်ဆူ သဝီတဖၣ်အပူၤတကးဒံးဘၣ် ကမျၢၢ်လၢဟးထီၣ်က့ၤလီၤလၢဝ့ၢ်ပူၤတဖၣ်ခးဝဲဒီးကျိဖိန့ၣ်လီၤ

စးထီၣ်ဖဲဖဲလါယူၤ ၁သီဖးဖီမုၤဆၢကတီၢ်ပယီၤသုးခးလီၤကျိဖးဒိၣ်ဆူနိးတကီဝ့ၢ်ပူၤဒီး တနံၤအံၤလါယူၤ ၂သီ ဂီၤခီ၄နၣ်ရံၣ်အဆၢကတီၢ်နာ်က့ ဟီၣ်ကဝီၤဒီသဒၢသုးပာ်ဖှိၣ်တဖၣ်ဒီး ပယီၤသုးတၢ်ဒုးကဲထီၣ် ၃နၣ်ရံၣ်ဃၣ်ဃၣ်ဝံၤအလီၢ်ခံ ဟဲခးလီၤတၢ်ဒီးကဘီယူၤဒ်အံၤန့ၣ်လီၤ