မတ်လ ၂၁ရက် ၂၀၂၄ ခုနှစ်
ကရင်ပြည်နယ်၊ ကော့ကရိတ်မြို့၊ချောင်းတောင်ရပ်ကွက်မှာ စစ်ကောင်စီတပ်က ဒရုန်းနဲ့ မီးလောင်ဗုံးကြဲချတိုက်ခိုက်တာကြောင့် နေအိမ်တွေ ထပ်မံမီးလောင်ပျက်စီးခဲ့တယ်လို့ ဒေသခံတွေဆီက သိရပါတယ်။
မတ်လ ၂၀ရက်နေ့ နေ့လည် ၁၂ နာရီကျော်လောက်က ချောင်းတောင်အောက်စုရပ်ကွက်ကို စစ်တပ်လက်အောက်ခံ စကခ ၁၂ ကနေ ဒရုန်းနဲ့မီးလောင်ဗုံးကြဲချတိုက်ခိုက်ခဲ့တာကြောင့် နေအိမ် ၁၀ လုံးနီပါး မီးလောင်ပျက်စီးခဲ့ပြီ ညနေ ၄ နာရီကျော်လောက်မှာ မီးငြိမ်းသွားတယ်လို့ ဒေသခံတွေဆီက သိရပါတယ်။
“ သူတို့ကြဲလိုက်တဲ့ ဗုံးကနေ မီးလောင်တာပါ၊ လက်နက်ကြီးပစ်လို့လည်း မဟုတ်ဘူး၊ ရှို့မီးကြောင့်လည်းမဟုတ်ဘူး၊ ဒရုန်းနဲ့ကြဲလို့ မီးလောင်တာပါ ” လို့ကော့ကရိတ် ဒေသခံတစ်ဦးက ပြောပါတယ်။
အခုရက်ပိုင်း စစ်ကောင်စီတပ်က ဒရုန်းနဲ့ မီးလောင်ဗုံးကြဲတာတွေ၊ လက်နက်ကြီးပစ်ခတ်တာတွေနဲ့ စစ်တပ်သတင်းပေးတွေရဲ့ မီးရှို့ဖျက်ဆီးတာတွေကြောင့် ချောင်တောင်၊ တံတားဦး၊ ဝင်းကြီးနဲ့ ကြာအင်းကုန်းရပ်ကွက်ထဲက ဒေသခံနေအိမ် အလုံး ၄၀၀ ကျော် မီးလောင်ပျက်စီးနေပြီး ဖြစ်ပါတယ်။
ဒါ့အပြင် မတ်လ ၁၈ရက်နေ့ ည၁၁နာရီနဲ့ မတ်လ ၁၉ ရက် မနက် ၅ နာရီ ကလည်း စစ်တပ်က Y12 လေယာဉ်နဲ့ ဒေသခံတော်လှန်ရေး တပ်ဖွဲ့တွေ ရှိနိုင်မဲ့ နေရာတွေကို ဗုံးကြဲတိုက်ခိုက်ခဲ့တာမျိုးတွေ ပြုလုပ်ခဲ့တယ်လို့လဲ နဂါးဖြူစစ်ကြောင်းက ကိုဂျပန်ကြီးက ပြောပါတယ်။
“ အခုထိတော့ ညတိုင်း နေ့တိုင်း သူပစ် ကိုယ်ပစ်ဆော်နေကြတုန်းပါ၊ ကျွန်တော်တို့ရှိမယ်ထင်တဲ့ နေရာတော်တော်များများကို ဗုံးကြဲချသွားပါတယ်၊ လူထိခိုက်မှုတော့မရှိဘူး” လို့ သူကပြောပါတယ်။
လက်ရှိ ကရင်ပြည်နယ်ထဲက မြဝတီ၊ ကော့ကရိတ်၊ ဖာပွန်၊ သံတောင်ကြီးနဲ့ ကျိုက်ဒုံမြို့ဘက်တွေမှာ စစ်တပ်နဲ့ KNLA ပူးပေါင်းတပ်ဖွဲ့တွေကြား နှစ်ဖက်ထိတွေ့တိုက်ပွဲတွေ နေ့စဥ်ရက်ဆက် ဖြစ်ပွားနေကြောင်း သိရပါတယ်။
သတင်း-ကိုဖြိုး
ဓာတ်ပုံ-Social Media
Phar Si Than (People’s Radio Myanmar)