လါအီးကထိဘၢၣ် ၂သီ၊၂၀၂၃နံၣ်
ကညီကီၢ်စဲၣ် မၠၣ်ဝတံၣ်ဝ့ၢ်ပူၤ ကရူၢ်လၢမၤဒြိတၢ်ထီၣ်ဒုးလၢအမ့ၢ်ဝဲ Federal Wind ဒြိသုးဖိတဖၣ် NUG ဂၢၤသးဝဲၤဒၢးဟ့ၣ်မၤလၤကပီၤဝဲ စ့ပယီၤ အကလီၢ်၁၀၀ ဝံၤအလီၢ်ခံ ကသုက့ၤဝဲစ့ဝဲအံၤလၢတၢ်မၤတၢ်ထီၣ်ဒုးအဂီၤန့ၣ်သ့ၣ်ညါဘၣ်န့ၣ်လီၤ
Federal Wind ဒြိကရူၢ်အံၤ ခးလီၤမ့ၣ်ပိၢ်ဒီးဒြိဆူ မၠၣ်ဝတံၣ်ဝ့ၢ်ပူၤ ပယီၤသုးစုတီၤဖီလာ် ပၢၤကီၢ်ဝဲၤဒၢးဒီးပၢပြးဝဲၤဒၢးတဖၣ်ဝံၤ ဖဲလါစဲးပထ့ဘၢၣ်၁၂သီအနံၤဘၣ်တၢ်ဟ့ၣ်လၤကပီၤအီၤ စ့ပယီၤအကလီာ် ၁၀၀ဒီးစ့လၢမၤန့ၣ်ဝဲတဖၣ်အံၤ ကသုဝဲလၢသုးဖိတဖၣ်အတၢ်ပီးတၢ်လီလၢအလိၣ်တဖၣ်အဂီၤန့ၣ် Cobraသုးကျိၤ Federal Windဒြိကရူၢ် ပှၤဘၣ်မူဘၣ်ဒါ သုးဖိ န့ၤမ့ထိ စံးဝဲလီၤ
“ခိၣ်ဖးတခါအံၤပမၤန့ၣ်ဖဲလါစဲးပထ့ဘၢၣ်၁၂သီအခါန့ၣ်လီၤ အဝဲအခီၣ်ထံးတဘျီလီၤ စ့လၢပမၤန့ၣ်အံၤပကသုလၢသုးဖိတဖၣ်အတၢ်ပီးတၢ်လီလၢအလိၣ်အဂီၤလီၤ”န့ၣ်အဝဲစံးဝဲလီၤ
တဆိကမိၣ်ဝဲလၢကဘၣ်တၢ်မၤလၤကပီၤဒ်အံၤဒီးစ့လၢဘၣ်တၢ်မၤလၤကပီၤတဖၣ်အံၤနာ်က့ ကဲဘျူးကဲဖှိၣ်လၢ Federal Windသုးကရူၢ်အဂီၤဒီး NUG-MOD အတၢ်မၤတဘျီအံၤအဖီခိၣ် ပပာ်ကဖၢလၢပသးန့ၣ်အဝဲတဲအါထီၣ်ဝဲလီၤ
“ခီဖျိပမၤ missionအံၤဖျိထီၣ်အဖီခိၣ် ဘၣ်တၢ်မၤလၤကပီၤအံၤကမ့ၢ်ပဝဲတၢတဖုလီၤ လၢအမဲာ်ညါတၢ်မၤလၤကပီၤဒ်အံၤတအိၣ်အဃိ ပတဆိကမိၣ်ဘၣ် လၢပဝဲသုးဖိတဖၣ်အဂီၤကကဲဘျူးကဲဖှိၣ်လီၤ NUG-MODအတၢ်မၤတဘျီအံၤအဖီခိၣ်ပသးမံသးမုာ်လီၤ”န့ၣ်အဝဲစံးဝဲလီၤ
မၠၣ်ဝတံၣ်ဝ့ၢ်ပူၤ ပယီၤသုးကီၣ်ကးစုတီၤဖီလာ်ဝဲၤကျိၤဝဲဒၢးတဖၣ် ဘၣ်တၢ်တ့ၤလီၤမ့ၣ်ပိၢ်ဒီးဒြိအဃိ ပယီၤသုးဖိတဖၣ်ဘၣ်ဒိဆါဒီး လၢတၢ်မၤတခါအံၤအဖီခိၣ်သးမံယဲန့ၣ်မၠၣ်ဝတံၣ်ဝ့ၢ်လီၢ်ကဝီၤဖိတဂၤစံးဝဲလီၤ
“ဘၣ်ဃးဒီးအဝဲသ့ၣ်သံန့ၣ်ပသးမံလီၤ သံအါမးလီၤ လၢခံမ့ၢ်ကဲထီၣ်ဒ်အံၤနာ်က့ကဂ့ၤသၢၣ်အဝဲသ့ၣ်ဘၣ်ဒိနးလီၤ အခဲပၢၤကီၢ်ဝဲၤဒၢးန့ၣ်ပတထံၣ်ပှၤကညီအါအါဂီၢ်ဂီၢ်ဘၣ် ဘံၣ်လၢနီၢ်ဂံၢ်တအိၣ်အါအါဘၣ် အဝဲသ့ၣ်ပံးဃးကျဲမီ”န့ၣ်အဝဲစံးဝဲလီၤ
တကးဒံးဘၣ် လၢခံ Dron Mission တဖၣ်နာ်က့ ကမၤဝဲလၢEROs၊NUG-MOD အတၢ်သုးတၢ်ကျဲၤအဖီလာ် ကမၤဝဲ ဝ့ၢ်ခိၣ်တၢ်ထီၣ်ဒုးတဖၣ်Mission တဖၣ် န့ၣ် Cobraသုးကျိၤ Federal Windဒြိကရူၢ် ပှၤဘၣ်မူဘၣ်ဒါ သုးဖိ န့ၤမ့ထိ စံးဝဲလီၤ
တကီၢ်ခါခဲအံၤနာ်က့ Federal Wind ဒြိကရူၢ်အံၤ မၤဝဲဒြိ missionလၢကညီကီၢ်စဲၣ်ပူၤလီၢ်ကဝီၤတဖၣ် တလၢၤကီၢ်စဲၣ် ဒီးစက့ကီၢ်ခီဒိၣ်တဖၣ်န့ၣ်လီၤ
ဖဲအပူၤကွံာ် လါစဲးပထ့ၢဘၣ် ၃သီ ဟါခီဆၢကတီၢ်နာ်က့ ပယီၤသုးစုတီၤဖီလာ် ဝဲၤကျိၤဝဲၤဒၢးတဖၣ်လၢအမ့ၢ်ဝဲ ပၢၤကီၢ်ဝဲၤဒၢးဒီးပၢပြးရူတဖၣ် Federal Wind ဒြိသုးကရူၢ်လဲၤခးလီၤမ့ၣ်ပိၢ်ဒီးဒြိအဃိ သုးခိၣ်နၣ်တဖၣ်ဒီးသံ၆ဂၤဘၣ်ဒိအဂၤ၁၀ဃၣ်ဃၣ်န့ၣ် လီၢ်ကဝီၤဂံၢ်ခီၣ်ထံးတၢ်ကစီၣ်စံးဝဲအသိးသ့ၣ်ညါဘၣ်န့ၣ်လီၤ