ပယီၤသုးကျိၤလၢဟဲထီၣ်ဆူ ချၢၣ်-တကူၣ်တၢၣ်သဝီကရူၢ်ပူၤတဖၣ် ဘၣ်တၢ်ခးလီၤမ့ၣ်ပိၢ်ဒီးဒြိအဖျၢၣ်အကယၤဘျဲၣ်

လါစဲးပထ့ဘၢၣ် ၂၅သီ ၊၂၀၂၃နံၣ်

ကညီကီၢ်စဲၣ် နိၣ်တကီကီၢ်ဆၣ် ချၢၣ်-တကူၣ်တၢၣ်သဝီကရူၢ်ပူၤ ပယီၤသုးကျိၤလၢဟဲထီၣ်တဖၣ် ဘၣ်တၢ်တ့ၢ်လီၤဝဲမ့ၣ်ပိၢ်ဒီးဒြိအဖျၢၣ်လၢအကယၤန့ၣ် Cloud wings drone ထုးထီၣ်ရၤလီၤတၢ်ကစီၣ်အသိးသ့ၣ်ညါဘၣ်န့ၣ်လီၤ

စးထီၣ်လၢလါစဲးပထ့ဘၢၣ် ၁၆သီတုၤ ၂၂သီအတီၢ်ပူၤ တနွံဂီၤတၢ်ဒုးအပူၤပယီၤသုးကျိၤဟဲထီၣ်ဆူချၢၣ်-တကူၣ်တၢၣ်သဝီကရူၢ်ပူၤလၢအမ့ၢ်ဝဲ ပယီၤသုးဒီး ပယီၤသုစုတီၤဖိလာ် သုးခိးကီၢ်ဆၢ BGF တဖၣ် တၢ်ပၢၢ်ဆၢသုးပာ်ဖှိၣ်တဖၣ်ခးလီၤဝဲဒီး ၈၁မမ၊၆၀မမ မ့ၣ်ပိၢ်အဖျၢၣ်လၢအကယၤန့ၣ် Cloud wings drone ပှၤဘၣ်မူဘၣ်ဒါကိၣ်ဟ့စံးဝဲလီၤ

“Drone mission စးထီၣ်လၢအဝဲသ့ၣ်သုးကျိၤဟးထီၣ်အနံၤတုၤလၢပရၤလီၤတၢ်ကစီၣ်အနံၤမီနီ အဝဲသ့ၣ်အိၣ်တၢ်လီၢ်ခဲလၢာ်အပူၤလီၤ အဝဲသ့ၣ်ဆီလီၤလီၢ်ပၢၤကီၢ်ဝၤဒၢး၊(မီးသတ်)တကးဒံးဘၣ်တုၤလၢဃိၣ်တၢ်ဘါတၢ်လီၢ်သ့ၣ်တဖၣ်အပူၤလီၤ လၢကၠိသ့ၣ်တဖၣ်အပူၤနာ်က့အိၣ် သဝီဖိတဖၣ်အဝဲသ့ၣ်မ့နုာ်လီၤန့ၣ်တအိၣ်လၢသဝီပူၤဘၣ် ပဝဲဒၣ်န့ၣ်ပဒုးဒၣ်ပယီၤသုးအဃိ မ့အိၣ်ဃါဃုာ်လိာ်သးဒီးကမျၢၢ်န့ၣ်ပတမၤ mission ဘၣ်”န့ၣ်အဝဲစံးဝဲလီၤ

တကးဒံးဘၣ် Cloud wings drone သုးပူၤ ဒြိတခိၣ်နာ်က့ ဖဲမၤတၢ်ထီၣ်ဒုးအခါဟးဂီၤအဃိပယီၤသုးဟံန့ၣ်ဝဲန့ၣ်အဝဲစံးဝဲလီၤ

“ဒြိတဖၣ်အိၣ်တလါဘျဲၣ်လံ တအိၣ်ဘှံးဘၣ်နီတသီဘၣ် ကီးတရံး၊နိၣ်တကီ၊ကွံာ်လၢၤသီအခဲ ချၢၣ်-တကူၣ်တၢၣ် မုၢ်နၤမုၢ်ဆါအဃီဒြိတဖၣ်လီၤဘှံးလၢၤလံ အဝဲသ့ၣ်ဟဲထီၣ်အခဲအံၤတဘျီ ကတဲၤကတီၤသးဘၣ်ဃးဒီးဒြိလီၤ လၢတၢ်အိၣ်သးအဃိ ဒြိဟးဂီၤတခိၣ် ပအိၣ်တၢ်တကပၤ Errorထီၣ်နာ်က့ပၣ် ဒြိလၢလီၤတဲၤန့ၣ်ပယီၤသုးဟံန့ၣ်ဝဲလီၤ”န့ၣ်အဝဲစံးဝဲလီၤ

ပယီၤသုးကျိၤ ဟဲထီၣ်ဆူ ချၢၣ်-တကူၣ်တၢၣ်သဝီကရူၢ်ပူၤဝံၤအလီၢ်ခံ ပယီၤသုးတဖၣ်ဟံန့ၣ်ဝဲချၢၣ်သဝီပူၤကမျၢၢ်တၢ်ပီးတၢ်လီလၢအပှ့ၤဒိၣ်တဖၣ်တကးဒံးဘၣ်ဖှီၣ်ဘၣ်ဆူၣ်မၤဆိးဝဲကမျၢၢ်လီၢ်ကဝီၤဖိတဖၣ်အိၣ်န့ၣ်လီၢ်ကဝီၤဖိစံးဝဲန့ၣ်လီၤ

“ပယီၤသုးတဖၣ်အံၤအိၣ်လၢသဝီပူၤလီၤ ဟ့န့ၣ်ဝဲခိၣ်ပၠူထၢၣ်တဖၣ်သိလ့ၣ်ယီၢ်တဖၣ်ခဲလၢာ်လီၤ ဟံၣ်လၢစ့အိၣ်တ့ၤတဖၣ် မ့ၣ်အူစဲးခဲလၢာ်လီၤ သဝီဖိနာ်က့မၤဒၢၣ်ဝဲ တဂၤန့ၣ်ဘၣ်ဒိနးလီၤ က့ၤဒူအီၣ်ထိးဆၣ်ဒီးကဲထီၣ်သးဒ်န့ၣ်လီၤ”န့ၣ်အဝဲစံးဝဲလီၤ

ပယီၤသုးတကပၤဘၣ်တၢ်ခးလီၤဒီးဒြိအဃိ ပယီၤသုးသံအဂၤ၁၀ဃၣ်ဃၣ်ဒီး ဘၣ်ဒိအါအါဂီၢ်ဂီၢ်န့ၣ်လၢလံာ်တၢ်ပာ်ဖျါအပူၤပာ်ဖျါထီၣ်ဝဲလီၤ

တကးဒံးဘၣ် ပယီၤသုးလၢဘၣ်ဒိတဖၣ်ဘၣ်ဟံန့ၣ်တၢ်မၤစၢၤလၢBGFသုးတဖၣ်အိၣ်ဒီးဘၣ်ဆှၢက့ၤဝဲဆူ မီၣ်လမၠ့ၣ် (ကုတင် ၃၀၀)သုးတၢ်ဆါဟံၣ်ဒီးသိလ့ၣ်သၢခိၣ်န့ၣ်လီၤ

ချၢၣ်-တကူၣ်တၢၣ်သဝီကရူၢ်ပူၤပယီၤသုးဒီးKNLAသုးတဖၣ်အဘၢၣ်စၢၤ ခံခီခံကပၤထံၣ်လိာ်သးတၢ်ဒုးကဲထီၣ်အဃိ ချၢၣ်သဝီဖးဒိၣ်၊ချၢၣ်သဝီဖိ၊မၠီၣ်ဟီ၊တကူၣ်တၢၣ်၊ပလဲၣ်ဒီးသဝီ၇ဖျၢၣ်ပူၤ လီၢ်ကဝီၤဖိ ၁၅၀၀၀ဘျဲၣ် ဘၣ်လဲၤဃ့ၢ်စံၣ်အိၣ်ဝဲဆူ မူးဒိၣ် ဝ့ၢ်ဒီးအဃၢၢ်သဝီတဖၣ်အပူၤန့ၣ်ကညီဒီကလုာ်စၢဖှိၣ်ကရၢထုးထီၣ်တၢ်ကစီၣ်အသိးသ့ၣ်ညါဘၣ်န့ၣ်လီၤ