လါစဲးပထ့ဘၢၣ် ၂၃သီ၊၂၀၂၃နံၣ်
ကညီကီၢ်စဲၣ် ကြုၤတုၢ်ကီၢ်ဆၣ် တီၣ်ကၠၣ်အ့သဝီကရူၢ် သဝီတဖျၢၣ်ပူၤပယီၤသုးခးလီၤကျိဖးဒိၣ်အဃိ လီၢ်ကဝီၤဖိသံတဂၤန့ၣ်သ့ၣ်ညါဘၣ်လၢလီၢ်ကဝီၤဖိအိၣ်န့ၣ်လီၤ
လါစဲးပထ့ဘၢၣ် ၂၃သီအနံၤ ဂီၤခီ၆နၣ်ရံၣ်ဃၣ်ဃၣ်ဆၢကတီၢ် လဲၣ်ဝးကျိဖးဒိၣ်လုၣ်ခးလီၤကျိဖးဒိၣ်တပယူာ်ဃီအဃိ နီၣ်တလၣ်သဝီပူၤသးနံၣ်၃၀ဘျဲၣ်လီၢ်ကဝီၤပိၣ်ခွါသံတဂၤန့ၣ် လီၢ်ကဝီၤဖိစံးဝဲန့ၣ်လီၤ
“တဂီၤအံၤလၢနီၣ်တလၣ်န့ၣ်ကျိဖးဒိၣ်အက့လီၤဘၣ်အဃိသံတဂၤ ပိၣ်ခွါလီၤတမ့ၢ်ကျိဖးဒိၣ်လီၤတဲၤလၢဟံၣ်ဘၣ် ဘၣ်ဖဲအကီၤယူာ်လီၤ”န့ၣ်အဝဲစံးဝဲလီၤ
ပယီၤသုးကီၣ်ကး လဲၣ်ဝးကျိဖးဒိၣ်လုၣ်အံၤ ခးလီၤကျိဖးဒိၣ်စးထီၣ်လၢဂီၤခီဆၢကတီၢ်တုၤမုၣ်ထူၣ်၁နၣ်ရံၣ်ဒီး နီၣ်တလၣ်သဝီဖိတနီဘၣ်လဲၤအိၣ်ဝဲဆူ ကပၤရီဘၢၣ်ကျီးဒီးပှၢ်သ့ၣ်တဖၣ်အပူၤန့ၣ် ကမျၢၢ်ပိၣ်ခွါလၢဃ့ၢ်တဂၤစံးဝဲလီၤ
“စးထီၣ်ခးဝဲလၢဂီၤခီတုၤခဲအံၤလီၤ ခးလီၤကျိဖးဒိၣ်တပယူာ်ဃီလီၤ အဒိၣ်ဖဲန့ၣ်အဆံးဖဲန့ၣ် တုၤခဲအံၤနၣ်ဟူဘၣ်လီၤ ပဝဲပဘၣ်ဃ့ၢ်လံ အခဲပဘၣ်လဲၤဃ့ၢ်ဆူကပၤပှၢ်ဒီးရီဘၢၣ်ကျီးသ့ၣ်တဖၣ်ပူၤလီၤ”န့ၣ်အဝဲစံးဝဲလီၤ
ဖဲအပူၤကွံာ်လါစဲးပထ့ဘၢၣ် ၁၆သီအနံၤခါနာ်က့ ပယီၤသုးကီၣ်ကးလၢဆီလီၤလီၢ်ဖဲ တီၣ်ကၠၣ်အ့သဝီကၠိပူၤတဖၣ်ခးလီၤ ၆၀မမကျိဖးဒိၣ်အဃိ သးနံၣ်၁၅နံၣ် ဖိသၣ်တဂၤဘၣ်ဒိဒီးကျိဖးဒိၣ်အက့လီၤ
ဖဲအပူၤကွံာ်လါအီကူးတုၤအခဲလါစဲးပထ့ဘၢၣ် အတီၢ်ပူၤ ကြုၤတုၢ်ဒီးကီးတရံးကီၢ်ဆၣ်ပူၤသဝီတဖၣ်ပယီၤသုးခးလီၤကျိဖးဒိၣ်အဃိ ဖိသၣ်ဆံး၂ဂၤဒီးလီၢ်ကဝီၤကမျၢၢ်ဘၣ်ဒိ၄ဂၤဝံၤသံတဂၤဒီးဟံၣ်ဟးဂီၤတဖျၢၣ်န့ၣ်ဒူပျာ်ယာ်ကီၢ်ရ့ၣ်ထုးထီၣ်တၢ်ကစီၣ်အသိးသ့ၣ်ညါဘၣ်န့ၣ်လီၤ