လါစဲးပထ့ဘၢၣ် ၁၂သီ၊၂၀၂၃နံၣ်
တလၢၤကီၢ်စဲၣ် ပယီၤသုးဆီလီၤလီၢ်ဖဲ ယ့ကီၢ်ဆၣ် စကခ (၁၉)စုဖီလာ် ခလရ (၆၁)သုးဖိတဖၣ်ဘၣ်တၢ်ခးလီၤဒီးကျိဖးဒိၣ်အဃိ သုးခိၣ်တဂၤဒီးသုးဖိသံ၂ဂၤနံၣ် တီနီၢ်သုးကျိၤထုးထီၣ်တၢ်ကစီၣ်အသိးသ့ၣ်ညါဘၣ်န့ၣ်လီၤ
ဖဲလါစဲးပထ့ဘၢၣ် ၂သီ ၈နီၣ်ထိၣ်၄၅မံးနံးဆၢကတီၢ် ယ့ကီၢ်ဆၣ်လစကခ(၁၉)စုဖီလာ် ခလရ(၆၁) သုးဖိနီၢ်ဂံၢ် ၁၀၀ဃၣ်ဃၣ်အံၤ တၢ်ကစီၣ်ဟးထီၣ်လၢပှၤကဆှၢထီၣ်ဆူ လဲးခဲးတီၣ်ဒီးကီးတရံးတကပၤအဃိ လဲၤခးဝဲဒီးကျိဖးဒိၣ်ဒီးပယီၤသုးတကပၤသုးခိၣ်တဂၤဒီးသုးဖိသံ၃ဂၤ ဘၣ်ဒိ၃၁ဂၤန့ၣ် သုးကျိၤခိၣ်စီၤဒါကိၣ်စံးဝဲလီၤ
“အဝဲသ့ၣ်တၢ်အိၣ်သးအိၣ်လၢကဆှၢထီၣ်ဝဲဆူ လဲးခဲးတီၣ်ဒီးကီးတရံးတကပၤလီၤ ပာ်ဖှိၣ်သုးဂံၢ်ဘါ၁၀၀ဃၣ်ဃၣ်န့ၣ်ပမၤန့ၣ်တၢ်ကစီၣ်လီၤ ပမၤန့ၣ်တၢ်ကစီၣ်ဝံၤဂီၤခီဆၢကတီၢ် တလၢၤသးစၢ်တဖၣ်ဒီးပဝဲတီနီၢ်သုးကျိၤပာ်ဖှိၣ်ထီၣ်သးဒီးကျဲလၢအဝဲသ့ၣ်ကဟဲလီၤ ကျဲလၢအဝဲသ့ၣ်ကဟးထီၣ်ပကွာ်ဝံၤပခးလီၤကျိဖးဒိၣ် ၈၁လီၤ ပခးလီၤဆၢကတီၢ်ဘၣ်န့အတီၢ်လၢအဝဲသ့ၣ်ရဲၤလီၤသးဆၢကတီၢ်အဃိဘၣ်ဒိအါန့ၣ်”အဝဲစံးဝဲဒၣ်န့ၣ်လီၤ
ဆၢကတီၢ်ခဲအံၤ ယ့ကီၢ်ဆၣ်ပူၤ ပယီၤသုးဆှၢတၢ်အီၣ်ဒီးကျိချံပှၢ်သၣ်ကရူၢ်တဖၣ်သုအါဝဲထဲထံကျဲတကပၤန့ၣ်အဝဲတဲအါထီၣ်ဝဲန့ၣ်လီၤ
“ပယီၤသုးဆှၢတၢ်ကရူၢ်တဖၣ်နာ်က့ တလဲၤဝဲဖဲပၠံၣ်ထီၣ်စုးသိလ့ၣ်ကျဲတကပၤလၢၤဘၣ် လဲၤဝဲလၢထံကျဲတကပၤလီၤ”န့ၣ်အဝဲစံးဝဲလီၤ
ဘၣ်ဃးဒီးတၢ်ခးလီၤတၢ်တဘျီအံၤ တီနီၢ်သုးကျိၤဒီးတလၢၤတၢ်ပၢၢ်ဆၢသုးMSRF၊ယ့သုးကရူၢ် YGF၊ABSDF သုးရ့ၣ် ၁ ဒီး KNLAသုးရ့ၣ် ၂၇သုးပာ်ဖှိၣ်တဖၣ်လဲၤခးဝဲန့ၣ်လီၤ
ပယီၤသုးဖိတဖၣ်ဘၣ်တၢ်လဲၤခးအီၤဒီးကျိဖးဒိၣ်ခီဖျိ လီၢ်ကဝီၤကမျၢၢ်ဒီသဒၢသုးဝံၤအလီၢ်ခံ ပယီၤသုးတကပၤခးက့ၤဝဲဒီးကျိဖးဒိၣ်နာ်က့ တၢ်ပၢၢ်ဆၢသုးပာ်ဖှိၣ်တကပၤတၢ်ဘၣ်ဒိဘၣ်ထံးတအိၣ်န့ၣ်သ့ၣ်ညါဘၣ်န့ၣ်လီၤ
တကးဒံးဘၣ်ဖဲအပူၤကွံာ်လါယူၤ၊လါယူၤလံဒီးလါအီကူးအတီၢ်ပူၤ နီၢ်ဂံၢ်၈ကျဲမုၢ်ဖးဒိၣ်တကပၤပယီၤသုးဒီးလီၢ်ကဝီၤကမျၢၢ်ဒီသဒၢသုးတဖၣ်အဘၢၣ်စၢၤထံၣ်လိာ်သးတၢ်ဒုးကဲထီၣ်အိၣ်သနာ်က့ တကီၢ်ခါခဲအံၤ နီၢ်ဂံၢ်၈ကျဲမုၢ်ဖးဒိၣ်ဒီးယ့ကီၢ်ဆၣ်အပူၤဒ်သိးကမၤန့ၣ်ဟီၣ်ကဝီၤတၢ်ဒိၣ်စိအဂီၤကဘၣ်မၤအါထီၣ်ဝဲအဃိတၢ်ဒုးကကဲထီၣ်တၢ်အိၣ်သးအိၣ်န့ၣ်KNLAသုးဂံၢ်ခီၣ်ထံးစံးဝဲအသိးသ့ၣ်ညါဘၣ်န့ၣ်လီၤ