ပယီၤသုးကျိၤနု၁်လီၤအဃိ ၀ီၢ်ရီဟီၣ်က၀ီၤအပူၤချၢၣ်တကူၣ်တၢၣ်ကမျၢၢ်၈၀၀ဘျဲၣ်ဘၣ်ဃ့ၢ်ထီၣ်ကဒီး

လါစဲးပထ့ဘၢၣ် ၁၃သီ၊၂၀၂၃နံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ၀ီၢ်ရ့ၣ်ကီၢ်ဆၣ် ၀ီၢ်ရီဟီၣ်က၀ီၤအပူၤ ဖဲမဟါလါစဲးပထ့ဘၢၣ် ၁၂ သီအနံၤ ခီဖျိပယီၤသုးကျိၤနုာ်လီၤလၢချၢၣ်တကူၣ်တၢၣ်သ၀ီကရူၢ်ပူၤအဃိ ကမျၢၢ်ၦၤထူလံၤဖိ၈၀၀ဘျဲၣ်တဖၣ်ဘၣ်ဃ့ၢ်ထီၣ်ကဒီးဝဲအါအါဂီၢ်ဂီၢ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤသ၀ီဖိတဖၣ်အအိၣ်န့ၣ် လီၤႉ

ဖဲမဟါလါစဲးပထ့ဘၢၣ် ၁၂ သီ မုၢ်နၤခီ ၈နၣ်ရံၣ်အဆၢကတီၢ် ပယီၤသုးတဖၣ်အိၣ်ဟဲထီၣ်လၢတလၢၤကီၢ်စဲၣ် မူၣ်ဒိၤကီၢ်ဆၣ် သုးဂံၢ်ဘါ ၂၀၀ဃၣ်ဃၣ်အံၤ ဟဲထီၣ်နုာ်ဝဲဆူ (ခ့ၣ်အဲၣ်ယူၣ်)၀ီၢ်ရ့ၣ်ကီၢ်ဆၣ် ချၢၣ်–တကူၣ်တၢၣ်သ၀ီကရူၢ် မၠိၣ်ဟီသ၀ီပူၤအဃိ လီၢ်ကဝီၤဖိ ၈၀၀ဘျဲၣ် ဘၣ်လဲၤဃ့ၢ်ထီၣ်အိၣ်ဝဲဆူ သဝီအဂုၤအဂၤဒီးမူးဒိၤဝ့ၢ်တကပၤန့ၣ်လီၢ်ကဝီၤပိၣ်မုၣ်တဂၤစံးဝဲန့ၣ်လီၤ

“အိၣ်နုာ်လီၤတဲလၢကမၣ်ဝဲးတကပၤ အနီၢ်ဂံၢ်ဖါအါညါ စးထီၣ်လၢမဟါန့ၣ် နုာ်လီၤလၢသဝီပူၤလီၤ တဲဝဲပ့ၣ်ချ့သုးဖိလီၤ အါထဲသးစၢ်တဖၣ်လီၤ ဖဲအပူၤကွံာ်၄သီန့ၣ်ဟဲသုးဘူးထီၣ်အသးလၢသဝီပူၤလီၤ”န့ၣ်အဝဲစံးဝဲလီၤ

တကးဒံးဘၣ် ပယီၤသုးကျိၤနီၢ်ဂံၢ်၂၀၀ဘျဲၣ်အံၤတနံၤအံၤ လါစဲးပထ့ဘၢၣ် ၁၃သီန့ၣ်ဟံန့ၣ်ဃးအလီၢ်ဖဲ ကၠဲးကမီး ကစၢၢ်ခိၣ်န့ၣ်အဝဲတဲအါထီၣ်ဝဲလီၤ

ဖဲလါစဲးပထ့ဘၢၣ် ၁၂သီ မုၣ်ထူၣ် ၁၂နၣ်ရံၣ်ဃၣ်ဃၣ်ဆၢကတီၢ်ခါနာ်က့ ပယီၤသုးတကပၤခးလီၤကျိဖးဒိၣ်ဒီးခီဖျိသုးကျိၤဟဲထီၣ်ဒ်အံၤအဃိ သဝီကပၤ လီၢ်ကဝီၤဖိတဖၣ်ဘၣ်ယိၣ်လၢတၢ်ဒုးကကဲထီၣ်န့ၣ် ပလ့ၣ်သဝီလီၢ်ကဝီၤပိၣ်မုၣ်တဂၤစံးဝဲန့ၣ်လီၤ

“ဖဲမဟါအဝဲသ့ၣ်ဟံန့ၣ်တၢ်လီၢ်ဖဲ မၠီၣ်ဟီကပၤလီၤပနၣ်ဟူကဟဲနုာ်လၢပသဝီပူၤ ဖဲမဟါနၣ်ဟူကျိသီၣ်လီၤ သဝီပူၤပှၤကညီတနီ လၢဟံၣ်ကပၤပှၤနီဃ့ၢ်လံ”န့ၣ်အဝဲစံးဝဲန့ၣ်လီၤ

တကးဒံးဘၣ် ချၢၣ်-တကူၣ်တၢၣ် သဝီကရူၢ်ပူၤ ဘၣ်တၢ်ဒီၣ်တဲၤဃးကွဲၤဒီနၣ်ကျိၤအိၣ်ခံလါဘျဲၣ်လံဒီးသုန့ၣ်ဒၣ်ထဲမုၢ်နၤခီဆၢကတီၢ်န့ၣ်လီၢ်ကဝီၤဖိစံးဝဲန့ၣ်လီၤ

ဖဲအပူၤကွံာ်လါအီကူး၁၅သီအနံၤခါနာ်က့ တကူၣ်တၢၣ် ပၢၤကီၢ်ဝဲၤဒၢးပူၤ ပယီၤသုး ခလရ ၂၈၄ ဘၣ်တၢ်နုာ်လီၤခးအီၤခီဖျိ KNLAသုးပာ်ဖှိၣ်တဖၣ်အဃိ တၢ်ဒုးကဲထီၣ်ဒီးပယီၤသုးဖိသံ ၄ဂၤန့ၣ်လီၤ

ကညီကီၢ်စဲၣ်ပူၤ လီၢ်ကဝီၤတဖၣ်လၢအမ့ၢ်ဝဲ မၠၣ်ဝတံၣ်၊ကီးတရံး ၊ကြုၤတုၢ်၊နိၣ်တကီ၊သၣ်တီၣ်ဒီးဖၣ်ပူၣ်ကီၢ်ဆၣ်တကပၤ ပယီၤသုးဒီး KNLAသုးပၣ်ဖှိၣ်တဖၣ် တၢ်ဒုးကဲထီၣ်ကိးမုၢ်နံၤဃၣ်ဃၣ်န့ၣ်သ့ၣ်ညါဘၣ်ခီဖျိ KNLAသုးဂံၢ်ခီၣ်ထံးတဖၣ်စံးဝဲအသိးန့ၣ်လီၤ