ထံထၣ်စီး သဝီပူၤ တၢ်ဒုးတအိၣ်နာ်က့ပယီၤသုးခးလီၤမ့ၣ်ပိၢ်ဒီးကဘီယူၤအဃိ လီၢ်ကဝီၤဖိသံတဂၤ

လါစဲးပထ့ဘၢၣ် ၁၃သီ၊၂၀၂၃နံၣ်

ကညီကီၢ်စဲၣ် လ့းသိၣ်ကီၢ်ဆၣ်ထံထၣ်စီးသဝီပူၤ တၢ်ဒုးတအိၣ်နာ်က့ပယီၤသုးတ့ၤလီၤမ့ၣ်ပိၢ်ဒီးကဘီယူၤအဃိ လီၢ်ကဝီၤဖိသံတဂၤဘၣ်ဒိ ၄ဂၤန့ၣ် သ့ၣ်ညါဘၣ်လၢလ့းသိၣ်လီၢ်ကဝီၤဖိတဖၣ်အိၣ်န့ၣ်လီၤ

ပယီၤသုးဟဲခးလီၤမ့ၣ်ပိၢ်ဒီးကဘီယူၤဆူ ထံထၣ်စီးသဝီပူၤ ဖဲအပူၤကွံာ် လါစဲးပထ့ဘၢၣ်အသီ၁၀လၢ (၁၀)နီၣ်ထိၣ်ဆၢကတီၢ်တဝီ လၢမုၣ်ထူၣ် ၂နီၣ်ထိၣ်န့ၣ်ခံဝီန့ၣ်လီၤ

ခီဖျိခးလီၤမ့ၣ်ပိၢ်ဒ်အံၤအဃိ သးနံၣ်၀ဘျဲၣ်လီၢ်ကဝီၤဖိသံတဂၤဒီး သးနံၣ် ၁၂နံၣ် ဖိသၣ်တဂၤ၊လီၢ်ကဝီၤဖိဘၣ်ဒိသၢဂၤန့ၣ်လ့းသိၣ်ဝ့ၢ်လီၢ်ကဝီၤဖိစံးဝဲန့ၣ်လီၤ

“လၢဂီၤခီ နၣ်ရံၣ် ၁၀ဃၣ်ဃၣ်ဆၢကတီၢ်တဘျီ လၢ၁နၣ်ရံၣ်န့ၣ်ခံဘျီ တၢ်ဒုးတအိၣ်ဘၣ် ဟဲခးလီၤဝဲဒ်န့ၣ်လီၤ လီၢ်ကဝီၤဖိသံတဂၤဖဲပှၤဘၣ်ဒိ၄ဂၤအကျါပာ်ဃုၢ်ဒီးဖိသၣ်၁၂နံၣ်တဂၤ”န့ၣ်လ့းသိၣ်လီၢ်ကဝီၤဖိစံးဝဲလီၤ

ခီဖျိတၢ်ဒုးတအိၣ်နာ်က့ဟဲခးလီၤမ့ၣ်ပိၢ်ဒီးကဘီယူၤဒ်အံၤအဃိ ထံထၣ်စီး သဝီပူၤဟံၣ်ဟးဂီၤတနီဒီး လီၢ်ကဝီၤဖိ၂၀၀ဘျဲၣ် ဘၣ်ဃ့ၢ်ပူၤဖျဲးသးဆူ ခူးပူၤဒီးဖၣ်လၣ်ကရၢၤတဖၣ်အပူၤန့ၣ်သ့ၣ်ညါဘၣ်န့ၣ်လီၤ

“ဟံၣ်ဟးဂီၤ၅ဖျၢၣ်ဃၣ်ဃၣ်လီၤ ပက့ၤနုာ်ဆူသဝီပူၤတဘူၣ်ဒံးဘၣ် အခဲသဝီဖိတဖၣ်သူၣ်ဖၣ်လၣ်သၣ်ဆၢကတီၢ် အခဲဘၣ်လဲၤအိၣ်ဆူဖၣ်လၣ်ကလီးပူၤလီၤ”န့ၣ် လ့းသိၣ်ဝ့ၢ်လီၢ်ကဝီၤဖိတဂၤစံးဝဲလီၤ

တကးဒံးဘၣ် ပယီၤသုးလၢအိၣ်ဖဲ သၣ်တီၣ်၇မံးလၣ်တြဲၤ၊သၣ်တီၣ်ဝ့ၢ် ဘရ့းနီၣ်တြဲၤ၊သၣ်တီၣ်ဝ့ၢ် ၁၃မံးလၣ်တြဲၤတဖၣ် တၢ်ဒုးတအိၣ်နာ်က့ ခးလီၤကျိဖးဒိၣ်ဆူ လ့းသိၣ်ဝ့ၢ်ဒီးသၣ်တီၣ်ဝ့ၢ်တဖၣ်တကပၤဃိ သၣ်တီၣ်ဝ့ၢ်ကလံၤထံးတကပၤလီၢ်ကဝီၤဖိ၂၅၀ဘျဲၣ်ဘၣ်ဃ့ၢ်တၢ်ဒုးန့ၣ်လီၤ

ကညီကီၢ်စဲၣ် သၣ်တီၣ်ဝ့ၢ်ဒီးလ့းသိၣ်ဝ့ၢ်တဖၣ်တကပၤ ပယီၤသုးခးလီၤကျိဖးဒိၣ်အဃိ စးထီၣ်ဖဲလါအီကူးတုၤလၢလါစဲးပထ့ဘၢၣ် ၁၂သီအတီၢ်ပူၤ လီၢ်ကဝီၤဖိသံ၂ဂၤဒီးဟံၣ်ဟးဂီၤအဖျၢၣ်၁၀ဘျဲၣ်န့ၣ် သ့ၣ်ညါဘၣ်ခီဖျိ လီၢ်ကဝီၤဂံၢ်ခီၣ်ထံးတဖၣ်စံးဝဲအသိးန့ၣ်လီၤ