လါစဲးပထ့ဘၢၣ် ၇သီ၊၂၀၂၃နံၣ်
ကညီကီၢ်စဲၣ်ကီးတရံးကီၢ်ဆၣ် တတါအူသဝီအဃၢၢ် တၢ်ခးလိၣ်သးကဲထီၣ်ဒီးပယီၤသုးတကပၤခးလီၤကျိဖးဒိၣ်န့ၣ်ကီးတရံးဝ့ၢ်လီၢ်ကဝီၤဖိစံးဝဲအသိးသ့ၣ်ညါဘၣ်န့ၣ်လီၤ
ကီးတရံးဝ့ၢ်ဒီးအဃၢၢ် ပယီၤသုးဒီးKNLAသုးပာ်ဖှိၣ်တဖၣ်အဘၢၣ်စၢၤ တၢ်ဒုးကဲထီၣ်တပယူာ်ဃီဒီး ပယီၤသုးတကပၤခးလီၤကျိဖးဒိၣ်ကိးမုၢ်နံၤဃၣ်ဃၣ်န့ၣ်လီၤ
ဖဲအပူၤကွံာ်လါစဲးပထ့ဘၢၣ် ၆သီ မုၢ်နၤခီ၇နၣ်ရံၣ်ဆၢကတီၢ် တတါအူသဝီအဃၢၢ် ပယီၤသုးဒီးKNLAသုးပာ်ဖှိၣ်တဖၣ်အဘၢၣ်စၢၤ တၢ်ဒုးကဲထီၣ်တဆံးတက့ၢ်ဒီး ပယီၤသုး ခလရ ၉၇သုးရ့ၣ်ခးလီၤကျိဖးဒိၣ်အဃိ ခၠီတီၣ်သဝီပူၤဟံၣ်ဟးဂီၤတဖျၢၣ်န့ၣ်ကီးတရံးဝ့ၢ်လီၢ်ကဝီၤဖိစံးဝဲအသိးသ့ၣ်ညါဘၣ်န့ၣ်လီၤ
“လၢမုၢ်နၤခီ၇နၣ်ရံၣ်ဃၣ်ဃၣ်န့ၣ် ခးဝဲဒီးကျိဖိ ၉၇သုးနာ်က့ခးလီၤကျိဖးဒိၣ် အဝဲသ့ၣ်ခးဒ်န့ၣ်အဃိ ခၠီတီၣ်တကပၤဟံၣ်ဟးဂီၤတဖျၢၣ်လီၤ သိလ့ၣ်နာ်က့ဟးဂီၤတခိၣ်လီၤ”န့ၣ်ကီးတရံးဝ့ၢ်လီၢ်ကဝီၤဖိစံးဝဲအသိးသ့ၣ်ညါဘၣ်န့ၣ်လီၤ
တကီၢ်ခါခဲအံၤ ကီးတရံးဝ့ၢ်ဒီးအဃၢၢ် ပယီၤသုးဒီးKNLAသုးပာ်ဖှိၣ်တဖၣ်အဘၢၣ်စၢၤတၢ်ဒုးကဲထီၣ်ဒိၣ်ဒိၣ်မုၢ်မုၢ်တအိၣ်သနာ်က့ ကီမူးသဝီဒီးတီနီၢ်ထံလီၤဆှူတကပၤ ပယီၤသုးခးလီၤကျိဖးဒိၣ်အိၣ်န့ၣ် KNLAသုးဂံၢ်ခီၣ်ထံးတဂၤစံးဝဲန့ၣ်လီၤ
“အဝဲသ့ၣ်ခးဝဲကိးမုၢ်နံၤလီၤ ခးဝဲလၢတီနီၢ်ထံလီၤဆှူတကပၤလီၤ မ့ဝံၤခးဝဲလၢကီမူးတကပၤလီၤ ခးနါစိၤဝဲဒ်န့ၣ်လီၤ ကိးမုၢ်နၤတမ့ၢ်ဘၣ် ကိးနံၤကိးသီကိးဆၢကဒဲးလီၤ ဖဲအပူၤကွံာ်အသီတဖၣ်ခါနာ်က့ ခးလီၤဝဲဘၣ်လၢဖံသးပှၢ်တဂၤလီၤ”န့ၣ်အဝဲစံးဝဲန့ၣ်လီၤ
ဖဲအပူၤကွံာ်လါအီကူးတလါအတီၢ်ပူၤပယီၤသုးခးလီၤကျိဖးဒိၣ်အဃိ ကီးတရံးကီၢ်ဆၣ်ပူၤ လီၢ်ကဝီၤဖိသံခံဂၤ ဒီးဟံၣ်ဟးဂီၤ၅ဖျၢၣ်ဃၣ်ဃၣ်န့ၣ် လီၤ တကီၢ်ခါခဲအံၤ ခီဖျိပယီၤသုးခးလီၤကျိဖးဒိၣ်အဃိ လီၢ်ကဝီၤကမျၢၢ်ဟံၣ်ဟးဂီၤတပယူာ်ဃီန့ၣ် လီၢ်ကဝီၤတၢ်ကစီၣ်ဂံၢ်ခီၣ်ထံးစံးဝဲအသိးသ့ၣ်ညါဘၣ်န့ၣ်လီၤ