ဖၣ်ပူၣ်ဝ့ၢ်ခိၣ် ပယီၤသုးကလၢၤဒီးပၢၤကီၢ်ဝဲၤဒၢးဘၣ်တၢ်နုာ်လီၤခး

လါအီကူး၂၃သီ၊၂၀၂၃နံၣ်

ကညီကီၢ်စဲၣ် ဖၣ်ပူၣ်ကီၢ်ဆၣ် ပယီၤသုးစုဖီလာ် ကီၢ်ဆၣ်ပၢၤကီၢ်ဝဲၤဒၢး ဘၣ်တၢ်နုာ်လီၤခးအီလၢKNLAသုးပာ်ဖှိၣ်တဖၣ်န့ၣ် သ့ၣ်ညါဘၣ်လၢဖၣ်ပူၣ်ဝ့ၢ်လီၢ်ကဝီၤဖိအိၣ်န့ၣ်လီၤ

ဖဲလါအီကူး၂၃သီ ဂီၤခီ ၅နၣ်ရံၣ်ဃၣ်ဃၣ်ဆၢကတီၢ် KNLAသုးပာ်ဖှိၣ်တဖၣ်နုာ်လီၤခးဝဲပယီၤသုးစုဖီလာ်ကီၢ်ဆၣ်ပၢၤကီၢ်ဝဲၤဒၢးဒီးပယီၤသုး၊ပယီၤသုးစုဖီလာ်BGFသုးတဖၣ်ဒီးKNLAအဘၢၣ်စၢၤ ခ့ခီခံကပၤထံၣ်လိာ်သးတၢ်ဒုးကဲထီၣ်န့ၣ် လီၢ်ကဝီၤပိာ်ခွါတဂၤစံးဝဲန့ၣ်လီၤ

“တဂီၤအံၤပနၣ်ဟူဘၣ်လၢKNLAသုးပာ်ဖှိၣ်တဖၣ်နုာ်လီၤခးဝဲပယီၤသုးစုဖီလာ် ကီၢ်ဆၣ်ပၢၤကီၢ်ဝဲၤဒၢးလီၤ စးထီၣ်လၢဂီၤခီ၅နၣ်ရံၣ်န့ၣ်လံ KNLAဟဲခးဝဲဝ့ၢ်ပူၤပယီၤသုးကလၢၤအိၣ်ခိးတၢ်လီၢ်တဖၣ်လီၤ တုၤခဲအံၤတဝံၤဒံးဘၣ်”န့ၣ်အဝဲစံးန့ၣ်လီၤ

တကးဒံးဘၣ်ဖဲလါအီကူး၂၂သီ မုၢ်နၤအဆၢကတီၢ်နာ်က့ ပယီၤသုးတကပၤခးလီၤကျိဖးဒိၣ်ဆူ ဝ့ၢ်အဃၢၢ်ဒီတနၤန့ၣ်အဝဲစံးအါထီၣ်ဝဲန့ၣ်လီၤ

“ဖဲမနၤနာ်က့ပယီၤသုးခးလီၤကျိဖးဒိၣ်ဆူဝ့ၢ်ချၢတကပၤဒီတနၤကျၢၤလီၤ”န့ၣ်အဝဲစံးဝဲလီၤ

ဖဲဂီၤ ၁၁ နၣ်ရံၣ်ဃၣ်ဃၣ်ဆၢကတီၢ်န့ၣ်တနၣ်ဟူဘၣ်ခံခီခံကပၤထံၣ်လိာ်သးတၢ်ဒုးကဲထီၣ်ကလုာ်လၢၤဘၣ်န့ၣ် လီၢ်ကဝီၤပိာ်ခွါတဂၤစံးဝဲန့ၣ်လီၤ

ဘၣ်ဃးဒီးတၢ်နုာ်လီၤခးဝဲ ကီၢ်ဆၣ် ပယီၤသုးစုဖီလာ် ကီၢ်ဆၣ်ပၢၤကီၢ်ဝဲၤဒၢး အံၤ တၢ်သံဒီးတၢ်ဘၣ်ဒိဘၣ်ထံးန့ၣ်ပာ်ဂၢၤကျၢၤတန့ၣ်ဒံးဘၣ်န့ၣ်လီၤ

ဖဲအပူၤကွံာ်လါအီကူး ၁၁သီအနံၤခါနာ်က့ ကီၢ်ရ့ၣ်ပၢပြးပှၤဘၣ်မူဘၣ်ဒါဟံၣ်၊တၢ်သမံသမိးစရီရူ၊တၢ်ဘျၢရူတဖၣ်ဘၣ်တၢ်ခးလီၤမ့ၣ်ပိၢ်အဃိ တၢ်သူၣ်ထီၣ်တဖၣ်ဟးဂီၤန့ၣ်လီၤ

ဖၣ်ပူၣ်ဝ့ၢ်ပူၤပယီၤသုးစုဖီလာ် ဝဲၤကျိၤဝဲဒၢးတဖၣ်ဘၣ်တၢ်ခးအီၤဒီးမ့ၣ်ပိၢ်တပယူာ်ဃီဒီး ဖၣ်ပူၣ်ဝ့ၢ်ပူၤ ပယီၤသုးစုဖီလာ်ရူပှၤမၤတၢ်ဖိအါတက့ၤ လဲၤအိၣ်ဆိးက့ၤဝဲလၢ ကမမီ ဝ့ၢ်ပူၤဒီးမၤဒံးဝ့ပယီၤသုးရူတၢ်မၤတဖၣ်န့ၣ်လီၢ်ကဝီၤဖိတဖၣ်စံးဝဲလီၤ

ကညီကီၢ်စဲၣ်ပူၤလီၢ်ကဝီၤတဖၣ်လၢအမ့ၢ်ဝဲ မၠၣ်ဝဝံၣ်၊ကီးတရံး၊ကြူၤတုၤ၊နိၣ်တကီ၊ဖၣ်ပူၣ်ဒီးသၣ်တီၣ်ဝ့ၢ်တဖၣ်တကပၤ ပယီၤသုးဒီးKNLAသုးပာ်ဖှိၣ်တဖၣ်အဘၢၣ်စၢၤခ့ခီခံကပၤထံၣ်လိာ်သးတၢ်ဒုးကဲထီၣ်တပယူာ်ဃီန့ၣ်KNLAသုးဂံၢ်ခီၣ်ထံးတဖၣ်စံးဝဲအသိးသ့ၣ်ညါဘၣ်န့ၣ်လီၤ