ကြုၤတုၢ်ကီၢ်ဆၣ်အပူၤ ပယီၤသုးကီၣ်ကးဟံန့ၣ်ဃးတၢ်လီၢ်တဖၣ် တၢ်ပၢၢ်ဆၢသုးပာ်ဖှိၣ်နုာ်လီၤခး

လါစဲးပထ့ဘၢၣ် ၂၇သီ၊၂၀၂၃နံၣ်

ကညီကီၢ်စဲၣ် ကြုၤတုၢ်ကီၢ်ဆၣ် သဝီတဖၣ်အပူၤ ပယီၤသုးကျိၤဟဲထီၣ်တဖၣ်ဒီးပယီၤသုးကီၣ်ကးလၢဆီလီၤဃးလီၢ်တဖၣ် လီၢ်ကဝီၤကမျၢၢ်ဒီသဒၢသုးတဖၣ်နုာ်လီၤခးဝဲန့ၣ် ဂလိၣ်သုးကျိၤထုးထီၣ်တၢ်ကစီၣ်အသိးသ့ၣ်ညါဘၣ်န့ၣ်လီၤ

စးထီၣ်ဖဲလါစဲးပထ့ဘၢၣ်အသီ ၂၀ န့ၣ်တ့ၤလီၤမ့ၣ်ပိၢ်ဒီးဒြိလၢပယီၤသုးကီၣ်ကးလၢဆီလီၤလီၢ်ဖဲ တီၣ်ကၠၣ်အ့သဝီပူၤတဖၣ်အသိး ဖဲ၂၂သီအနံၤ ခလရ(၂၀၃)ဒုးယၤခိၣ်ဟဲသမံသမိးတၢ်ဆၢကတီၢ် ခးလီၤဝဲမ့ၣ်ပိၢ်ဒီးဒြိတကးဒံးဘၣ်တၢ်ဒုးလၢကဲထီၣ်လၢဟီၣ်ကဝီၤပူၤန့ၣ်လီၤ

ပယီၤသုးကီၣ်ကးသုးတဖၣ်ဒီးလီၢ်ကဝီၤတၢ်ပၢၢ်ဆၢသုးပာ်ဖှိၣ်တဖၣ်အဘၢၣ်စၢၤစးထီၣ်လၢလါစဲးပထ့ဘၢၣ် ၁သီတုၤ ၂၅သီအတီၢ်ပူၤ ခံခီခံကပၤထံၣ်လိာ်သးတၢ်ဒုးတဖၣ် ၊ဘၣ်တၢ်ခးလီၤမ့ၣ်ပိၢ်ဒီးဒြိသ့ၣ်တဖၣ်အဃိ ပယီၤသုးကီၣ်ကးတကပၤသံ၃၈ဂၤ ဘၣ်ဒိ၂၁ဂၤန့ၣ်ဂလိၣ်သုးကျိၤပှၤဘၣ်မူဘၣ်ဒါစံးဝဲန့ၣ်လီၤ

“ပှၤသံနီၢ်ဂံၢ်န့ၣ် သ့ၣ်ညါဘၣ်လၢဒြိလီၤ ဖဲအခီၣ်ထံးတသီန့ၣ်သ့ၣ်ညါဘၣ်၆ဂၤလၢလီၢ်ကဝီၤမ့ၢ်ဂ့ၤလၢဒြိမ့ၢ်ဂ့ၤ လၢ fix wings ခဲလၢာ်မီနီ တမ့ၢ်ထဲဒြိတခါဘၣ် သံအါလီၤ ကအိၣ်လၢ၂၀ဘျဲၣ်ညါ”န့ၣ်အဝဲစံးဝဲလီၤ

တကးဒံးဘၣ်တကီၢ်ခါခဲအံၤနာ်က့ ပယီၤသုးတဖၣ်အံၤဆီလီၤဃးလီၢ်ဖဲ တီၣ်ကၠၣ်အ့သဝီသီခါဖၠၣ်အပူၤဒီးဆၢကတီၢ်ခဲအံၤဟီၣ်ကဝီၤတၢ်ဒုးတအိၣ်နာ်က့ပယီၤသုးဆီလီၤလီၢ်တဖၣ်ဘၣ်တၢ်ခးလီၤမ့ၣ်ပိၢ်ဒီးဒြိတပယူာ်ဃီန့ၣ်အဝဲစံးအါထီၣ်ဝဲန့ၣ်လီၤ

“ဟီၣ်ကဝီၤတၢ်ဒုးန့ၣ်ပှဲၤနံၤပှဲၤသီလဲၣ်ဒ်န့ၣ်တအိၣ်ဘၣ် စးထီၣ်လၢ၂၅သီတုၤခဲအံၤတၢ်ဒုးကဲထီၣ်လီၤ ကျဲနာ်က့ပံးဃးသးဒံး လၢန့ၣ်တခီသဝီဖိတဖၣ်ဃ့ၢ်လၢၤလံ ဟီၣ်ကဝီၤတၢ်ဒုးန့ၣ်ဖဲမဟါတသီ တနံၤအံၤတသီအိၣ်ခံသီလံ အခဲတၢ်ဒုးလၢကဲထီၣ်ဖဲဟီၣ်ကဝီၤပူၤတအိၣ်ဘၣ် လၢဒြိခးလီၤမ့ၣ်ပိၢ်ဒူအိၣ်”န့ၣ်အဝဲစံးဝဲလီၤ

လီၢ်ကဝီၤပိၣ်ခွါတဂၤနာ်က့”တနံၤညါမုၢ်ခုၣ်လီၤမီ တၢ်ဘှ့ၣ်ဘှီၣ်လီၤ အါတက့ၤပှၤဃ့ၢ်လံ တုၤခဲအံၤတနၣ်ဟူတၢ်နီတမံၤဒံးဘၣ်”န့ၣ်အဝဲစံးဝဲလီၤ

တကးဒံးဘၣ် ဖဲအပူၤကွံာ် ၂၃သီအခါနာ်က့ ပယီၤသုးကီၣ်ကးသုးကလၢၤခးလီၤကျိဖးဒိၣ်အဃိ နီၣ်တလၣ်သဝီပူၤ သးနံၣ်၃၀ဘျဲၣ်ပိၣ်ခွါတဂၤသံဒီးဖဲတၢ်ဒုးကဲထီၣ်ခံခီခံကပၤအပူၤတၢ်ပၢၢ်ဆၢသုးဖိ၂ဂၤဘၣ်ဒိန့ၣ်လီၤ

ကညီကီၢ်စဲၣ်ပူၤ လီၢ်ကဝီၤတဖၣ်လၢအမ့ၢ်ဝဲ မၠၣ်ဝတံာ်၊ကီးတရံး၊ကြုၤတုၢ်၊နိၣ်တကီ၊သၣ်တီၣ်ဒီးဖၣ်ပူၣ်ဝ့ၢ်တဖၣ်တကပၤ ခံခီခံကပၤတၢ်ဒုးကဲထီၣ်အသိး နီၣ်တလၣ်သဝီဒီးတီၣ်ကၠၣ်အ့သဝီပူၤလီၢ်ကဝီၤဖိတကထိဘျဲၣ်ဘၣ်လဲၤဃ့ၣ်စံၣ်အိၣ်ဝဲဆူ သဝီအဂုၤအဂၤတဖၣ်ဒီးရီဘၢၣ်ကလီးသ့ၣ်တဖၣ်အပူၤန့ၣ်လီၢ်ကဝီၤဖိစံးဝဲအသိးသ့ၣ်ညါဘၣ်န့ၣ်လီၤ