ပယီၤသုးရၤလီၤတၢ်ကစီၣ်လၢ ကမျၢၢ်ဒီသဒၢသုးတဖၣ်ခးဝဲမၠၣ်ဝတံၣ်-ကီးတရံး အ့ရှါကျဲ တီနီၢ်ထံလီၤဆှူအဃၢၢ် ကျဲ၊တိၤ တၢ်သူၣ်ထီၣ်လီၢ်

လါအီကူး ၁၈သီ၊၂၀၂၃နံၣ်

ပယီသုးရၤလီၤတၢ်ကစီၣ်ကမၤလၢ ကညီကီၢ်စဲၣ် မၠၣ်ဝတံၣ်-ကီးတရံးအ့ရှါကျဲမုၢ် တီနီၢ်ထံလီၤဆှူအဃၢၢ် တၢ်သူၣ်ထီၣ်ကျဲ၊တိၤလီၢ် ကမျၢၢ်ဒီသဒၢသုးတဖၣ်နုာ်လီၤခးဝဲန့ၣ်လီၤ

မၠၣ်ဝတံၣ်-ကီးတရံးအ့ရှါကျဲ တီနီၢ်ထံလီၤဆှူအဃၢၢ် တၢ်စူၤတပယူာ်ဃီအဃိဖဲအပူၤကွံာ်လါအီကူး ၇သီအနံၤဟီၣ်ခိၣ်လာ်ကဲထီၣ်န့ၣ်လီၤ

တကီၢ်ခါခဲအံၤ ဖဲတီနီၢ်ထံလီၤဆှူ တချူးလၢဘှီဂ့ၤထီၣ်က့ၤကျဲဟးဂီၤဒ်သိးပှၤဟးထီၣ်က့ၤလီၤကန့ၣ်အဂီၤ ဖဲမၤဝဲတိၤ(ယာယီ)အလီၢ်ဟီၣ်ကဝီၤဒီသဒၢသုးတဖၣ်မၤတရီတပါဒီးခးဝဲန့ၣ် ပယီၤသုးရၤလီၤတၢ်ကစီၣ်ဒ်န့ၣ်လီၤဘၣ်ဃးဒီးတၢ်ကစီၣ်အံၤ နဂဖၠူၣ် သုးကျိၤပှၤဘၣ်မူဘၣ်ဒါစံးဝဲလၢ ကမျၢၢ်ဒီသဒၢသုးတဖၣ်လဲၤမၤတရီတပါဝဲတၢ်လီၢ်တအိၣ်ဘၣ်န့ၣ်လီၤ

“ပဖှီၣ်စုကဝဲၤပတၢ်ပညိၣ်မ့ၢ်ထဲ ပကထၢဒါတၢ်လၢတဖိးသဲစး ဒီးပကသူၣ်ထီၣ် federal democracy အဂီၤလီၤ အဃိပကဘၣ်ကွာ်တၢ်လၢကမျၢၢ်အဂီၤ အဃိ ဖဲတၢ်ဘျီထီၣ်တိၤတဘျီအံၤန့ၣ်ပဟ့ၣ်အခွဲးအယာ်လီၤ”န့ၣ်အဝဲစံးဝဲလီၤ

ကီးတရံးဝ့ၢ်အဃၢၢ် ပယီၤသုးမီၤစိရိၤဒီးKNLAသုးပာ်ဖှိၣ်တဖၣ်အဘၢၣ်စၢၤ တၢ်ဒုးကဲထီၣ်တပယူာ်ဃီနာ်က့ လၢတၢ်ဘှီဂ့ၤထီၣ်အ့ရှါကျဲကပၤတၢ်ဒုးကဲထီၣ်တအိၣ်န့ၣ်ကီးတရံးဝ့ၢ်ဟီၣ်ကဝီၤဖိစံးဝဲလီၤ

“ဖဲကျလီၢ်လံၤလၢကီးနွဲၣ်သဝီရွၣ်သံးသဝီအဃၢၢ်တၢ်ဒုးကဲထီၣ်အိၣ်လီၤ ပတနၣ်ဟူတၢ်ဒုးကဲထီၣ်လၢအ့ရှါကျဲတကပၤဘၣ် ကဲဖဲဝ့ၢ်ကပၤလီၤ”န့ၣ်ဟီၣ်ကဝီၤဖိစံးဝဲလီၤ

တကီၢ်ခါခဲအံၤကျဲလၢဟးဂီၤတကပၤတၢ်ဘှီဂ့ၤထီၣ်က့ၤတအိၣ်ဒံးအဃိပှၤနီသိလ့ၣ်တဖၣ်ဘၣ်လဲၤက့ၤဝဲဖဲ မၠၣ်ဝတံၣ်-ကီးတရံးကျဲလီၢ်လံၤဒီးခီဖျိကျဲအံၣ်အဃိ ဘၣ်လဲၤဝဲဒီးတသီထီၣ်တသီလီၤန့ၣ်သ့ၣ်ညါဘၣ်န့ၣ်လီၤ

“ကဲထီၣ်ပဘၣ်ဂုၤကဒါက့ၤလၢလီၢ်ခံအပူၤကွံာ်အနံၣ်၁၀မီနီ ဘၣ်လဲၤထီၣ်တသီဟဲက့ၤလီၤတသီ ကျဲအံၣ်အဃိမီနီ ပလဲၤဒ်သိးလၢညါတနံၤဃီတန့ၣ်ဘၣ်”န့ၣ်ပှၤနီသိလ့ၣ်တဂၤစံးဝဲလီၤ

တကီၢ်ခါခဲအံၤ မၠၣ်ဝတံၣ်-ကီးတရံးကျဲလီၢ်လံၤ တကပၤပယီၤသုးစုဖီလာ် BGFသုးတဖၣ် ပာ်လီၤတြဲၤဒီးထၢစ့သိလ့ၣ်တခိၣ်အဆှၤကတၢၢ်၅၀၀၀န့ၣ်သ့ၣ်ညါဘၣ်န့ၣ်လီၤ

ဆၢကတီၢ်ခဲအံၤမၠၣ်ဝတံၣ်-ကီးတရံးအ့ရှါကျဲဟးဂီၤအဃိ ဟီၣ်ကဝီၤဖိတဖၣ်ဘၣ်ကီဘၣ်ခဲလၢဟးထီၣ်က့ၤလီၤအဂီၤဒီးမၠၣ်ဝတံၣ်-ကီးတရံးကျဲတကပၤတြဲၤအိၣ်ခိးထၢစ့အါအဃိ တၢ်ဖိတၢ်လံၢ်တဖၣ်အပှ့ၤထီၣ်န့ၣ်လီၤ