ပယီၤသုးရၤလီၤတၢ်ကစီၣ်ကမၤလၢ ကမျၢၢ်ဒီသဒၢသုးလၢသမံသမိးတၢ်ဖဲမီၤလမၠ့ၣ်-ယ့-ဒဝဲၢ်ကျဲဖီခိၣ် တဖၣ်ဃ့စ့လၢကမျၢၢ်အိၣ်

လါအီကူး ၁၇သီ၊၂၀၂၃နံၣ်

ပယီၤသုးရၤလီၤတၢ်ကစီၣ်ကမၤလၢ မီၤလမၠ့ၣ်-ယ့-ဒဝဲၢ် ကျဲမုၢ်ဖးဒိၣ်ဖီခိၣ် ဟီၣ်ကဝီၤကမျၢၢ်ဒီသဒၢသုးတဖၣ်သမံသမိးတၢ်ဒီးထၢစ့န့ၣ်လီၤ

မီၤလမၠ့ၣ်-ယ့-ဒဝဲၢ် ကျဲမုၢ်ဖးဒိၣ်ဖီခိၣ်သိလ့ၣ်လၢဟးထီၣ်က့ၤလီၤတဖၣ်ဘၣ်သမံသမိးဝဲန့ၣ် ဘၣ်ဒၣ်လၢ ဟီၣ်ကဝီၤတၢ်ဒိၣ်စိအဂီၤဒီးဟီၣ်ကဝီၤတၢ်ဘံၣ်ဘၢအဂီၤဝံၤ ထၢစ့တအိၣ်ဘၣ်ဒီးတၢ်ကစီၣ်တဖၣ်အံၤမ့ၢ်ဒၣ်ပယီၤသုးတကပၤ ရၤလီၤတၢ်ကစီၣ်လၢတဘၣ်န့ၣ်ပှၤဘၣ်မူဘၣ်ဒါတဂၤစံးဝဲလီၤ

“ပဝဲပသမံသမိးသိလ့ၣ်လၢ ကျဲမုၢ်ဖးဒိၣ်ဖီခိၣ်အံၤမ့ၢ်ဒၣ် ဟီၣ်ကဝီၤတၢ်ဒိၣ်စိဒီးတၢ်ဘံၣ်တၢ်ဘၢအဂီၤလီၤ ပတထၢစ့လၢပှၤနီတဂၤအိၣ်ဘၣ် ဟီၣ်ကဝီၤသုးဖိတဖၣ်နာ်က့ပတမၢထၢစ့ဘၣ် တၢ်တဲတဖၣ်အံၤမ့ၢ်ဒၣ်ပယီၤသုးရၤလီၤတၢ်ကစီၣ်လီၤန့ၣ်”အဝဲစံးဝဲလီၤ

ပှၤနီသိလ့ၣ်ဖဲ မီၤလမၠ့ၣ်-ယ့-ဒဝဲၢ် ကျဲမုၢ်ဖးဒိၣ်တဂၤစံးဝဲ ကမျၢၢ်ဒီသဒၢသုးတဖၣ်ဖဲသိလ့ၣ်ဟးထီၣ်က့ၤလီၤအခါထၢစ့တအိၣ်ဘၣ်န့ၣ်လီၤ

“ထံဖိကီၢ်ဖိလံာ်အဲၣ်သးမ့အိၣ်န့ၣ်လဲၤန့ၣ်လီၤ ထၢစ့တအိၣ်ဘၣ် လံာ်အုၣ်သးမ့အိၣ်န့ၣ်လီၤ သမံသမိးဝဲလံာ်အုၣ်သးလီၤ လၢကျဲနာ်က့ သမံသမိးလီၤဆီတၢ်ပီးတၢ်လီတဖၣ်တအိၣ်ဘၣ်”န့ၣ်အဝဲစံးဝဲလီၤ

ဟီၣ်ကဝီၤကမျၢၢ်ဒီသဒၢသုးတဖၣ်ဖဲသမံသမိးတၢ်အလီၢ်န့ၣ်သမံသမိးဝဲဒၣ် ပှၤဘၣ်ထွဲဘၣ်ဃးဒီးပယီၤသုး၊ပှၤဖှီၣ်စုကဝဲၤကျိချံပှၢ်သၣ်တဖၣ်ဒီးထၢစ့တအိၣ်တၢ်ဘၣ်ယိၤတအိၣ်ဘၣ်န့ၣ်ပှၤလဲၤတၢ်ဖိလၢမီၤလမၠ့ၣ်ကျဲမုၢ်ဖးဒိၣ်တဂၤစံးဝဲလီၤ

“ထၢစ့တအိၣ်ဘၣ် ပှၤဘၣ်ဃးဒီးပယီၤသုးအိၣ်တအိၣ် ပယီၤသုးကျိတဖၣ်လီၤ တဘၣ်ပျံၤတၢ်ဘၣ် အဝဲသ့ၣ်တဲဒံးလၢပလီၢ်သးနီသိလ့ၣ်ဒံး ရၤလီၤတၢ်ကစီၣ်န့ၣ်အဝဲသ့ၣ်မၤဝဲအဃိလိၣ်ဘၣ်ဝဲအဃိလီၤ”န့ၣ်အဝဲစံးဝဲလီၤ

ကမျၢၢ်ဒီသဒၢသုးတဖၣ်သမံသမိးတၢ်အံၤတမ့ၢ်ထဲ မီၤလမၠ့ၣ်-ယ့-ဒဝဲၢ် နီၢ်ဂံၢ်၈ကျဲမုၢ်ဖးဒိၣ်ဘၣ် သုးက့၃ပူၤကျဲမုၢ်ဖးဒိၣ်တနီဖီခိၣ်နာ်က့ မၤဝဲတၢ်သမံသမိးန့ၣ် Royal Peacock Column ထုးထီၣ်တၢ်ကစီၣ်အသိးသ့ၣ်ညါဘၣ်န့ၣ်လီၤ

သိလ့ၣ်လၢဟးထီၣ်က့ၤလီၤဖဲ နီၢ်ဂံၢ်၈ကျဲမုၢ်ဖးဒိၣ်တဖၣ်ဒ်သိးကတူာ်လိၣ်ဝဲတၢ်သမံသမိးဒ်သိးတတီၤဝဲ ပယီၤသုးဖိ ပယီၤသုးကျိချံပှၢ်သၣ်တဖၣ် ဒီးဒ်သိးတလူၢ်ပိာ်ထွဲဝဲပယီၤသုးကျိၤသိလ့ၣ်ခံန့ၣ်KNLAသုးရ့ၣ် ၂၇ဘိးဘၣ်ရၤလီၤဝဲဖဲ လါယူၤ အသီ၁၀ခါန့ၣ်လီၤ

ဖဲအပူၤကွံာ်လါယူၤဒီးလါယူၤလံအခါနာ်က့ KNLAသုးပာ်ဖှိၣ်တဖၣ် မၤတၢ်သမံသမိးလၢကျဲဖီခိၣ်ဒီးထံၣ်လိာ်သးတၢ်ဒုးကဲထီၣ်ဒီးပယီၤသုးန့ၣ်သ့ၣ်ညါဘၣ်လၢ KNLAသုးဂံၢ်ခီၣ်ထံးတဖၣ်အိၣ်န့ၣ်လီၤ