လါယူၤလံ ၁၁ သီ ၊၂၀၂၃နံၣ်
ကညီကီၢ်စဲၣ်သၣ်တီၣ်ဝ့ၢ်ပူၤ ဖဲအပူၤကွံာ်လါယူၤလံ ၈သီ ၄နၣ်ရံၣ်ဃၣ်ဃၣ်ဆၢကတီၢ် ပယီၤသုးခးသံပိၣ်ခွါတဂၤအစိာ် ပှၤဟဲထၢက့ၤတအိၣ်ဒံးန့ၣ် ဟီၣ်ကဝီၤဖိတဲဝဲန့ၣ်လီၤ
သးနံၣ် ၂၅ နံၣ် မ့စီၤအူ အံၤ အိၣ်ဟဲက့ၤလၢပၠါစခ့ဆူသၣ်တီၣ်ဒီး ပယီၤသုးတဲအီလၢ ကညီဖှီၣ်စုကဝဲၤသုးဖိဒီးခးသံကွံာ်တ့ၢ်အီဖဲ သၣ်တီၣ်ဝ့ၢ်ကျးနုာ်လီၤကျဲကပၤန့ၣ်လီၤ
တကီၢ်ခါခဲအံၤ သၣ်တီၣ်ဝ့ၢ်ပူၤ ပယီၤသုးဟံးန့ၣ်ခူသူၣ်ဃးတၢ်လီၢ်အဃိ ပှၤဟဲထၢအစိာ်တဘူၣ်ဒံးဘၣ်န့ၣ်ဟီၣ်ကဝီၤဖိတဲန့ၣ်လီၤ
“ဖဲမနၤန့ၣ်ဟ့က့ၤထၢက့ၤအစိာ်တန့ၣ်ဘၣ် ပယီၤသုးအိၣ်ခိးတၢ်အဃိလဲၤတန့ၣ်ဘၣ် ပှၤဖှီၣ်စုကဝဲၤနာ်က့လဲၤတန့ၣ်ဘၣ် တၢ်ဘူၣ်တၢ်ဘါကရူၤကရၢတဖၣ်နာ်က့ တၢ်အုၣ်သးမ့ၢ်တအိၣ်လဲၤတဘူၣ်ဘၣ်”န့ၣ်သၣ်တီၣ်ဟီၣ်ကဝီၤဖိတဂၤတဲန့ၣ်လီၤ
သၣ်တီၣ်ဝ့ၢ်ပူၤ ပယီၤသုးဒီးတၢ်ပၢၤဆၢသုးပာ်ဖှိၣ်တဖၣ်အဘၢၢ်စၢၤသုးအတၢ်ဖ့ၣ်ဆၢကဲထီၣ်ဒီး တနံၤအံၤလါယူၤလံ ၁၁သီ ဂီၤအဆၢကတီၢ်နာ်က့ တၢ်ဒုးကဲထီၣ်တဆံးတက့ၢ်ဒံးန့ၣ်သ့ၣ်ညါဘၣ်န့ၣ်လီၤ
“ဖဲမဟါန့ၣ်တၢ်ဂၢၢ် တနံၤဂီၤခီ ယၣ်ဒိၣ်တၢ်အိၣ်ခိးလီၢ်တြဲၤန့ၣ် မ့ၢ်ဖဲလဲၣ်တဖုလဲၣ်တသ့ၣ်ညါဘၣ် ခးလီၤသးလီၤ သၣ်တီၣ်ဝ့ၢ်ခိၣ်ဟီၣ်ကဝီၤဖိတဖၣ်ဘၣ်ဃ့ၣ်တၢ်ဒုးဖးယံာ်လံ ယၣ်ဒိၣ်ဖီခိၣ်န့ၣ်တသ့ၣ်ညါတၢ်အိၣ်သးခဲလၢာ်ဒံးဘၣ်”န့ၣ်ဟီၣ်ကဝီၤဖိတဲန့ၣ်လီၤ
တကီၢ်ခါခဲအံၤ ပယီၤသုးမၤဃံးထီၣ်တၢ်သမံသမိးလၢဝ့ၢ်နုာ်လီၤဟးထီၣ်တၢ်လီၢ်တဖၣ်ဒီးသၣ်တီၣ်ဝ့ၢ်အဃၢၢ်ခးလီၤကျိဖးဒိၣ် ဒွဲၣ်အူအီၣ်ကမျၢၢ်ဟံၣ်တဖၣ်န့ၣ်လီၤ
ဖဲအပူၤကွံာ် လါယူၤလံ ၁၇သီအနံၤနာ်က့ ပယီၤသုးဒီးတၢ်ပၢၤဆၢသုးပာ်ဖှိၣ်တဖၣ်အဘၢၢ်စၢၤ တၢ်ဒုးကဲထီၣ်ဒီး ပယီၤသုးခးလီၤကျိဖးဒိၣ်ဒီးလီၤတဲၣ်ပိၣ်ဖးထီၣ်လၢချီနခွးသဝီပူၤအဃိ ပိၣ်မုၣ်သံတဂၤပိၣ်ခွါဘၣ်ဒိတဂၤန့ၣ်လီၤ
