လါယူၤ ၂၁ သီ၊၂၀၂၃နံၣ်
ကညီကီၢ်စဲၣ် နိးတကီကီၢ်ဆၤပူၤ ပီအူချီၤ ကျဲဘၣ်တၢ်မၤဟးဂီၤအဃိ ဟီၣ်ကဝီၤကမျၢၢ်တဖၣ်ဘၣ်တၢ်သဂၢၢ်ဒီးတၢ်ကီတၢ်ခဲလၢ ဟးထီၣ်လ့ၣ်လိၣ်အဂီၤန့ၣ် သ့ၣ်ညါဘၣ်လၢ နိးတကီဟီၣ်ကဝီၤဖိအိၣ်န့ၣ်လီၤ
လါယူၤ ၁၆သီ ဂီၤ ၆နၣ်ရံၣ်ဆၢကတီၢ် ပယီၤသုးစုဖီလာ် ကီၢ်ဆၤတၢ်မုၢ်တၢ်ခုၣ်ဒီးလဲၤထီၣ်လဲၤထီ council ဟဲမၤဟးဂီၤ ပီအူချီၤ ကျဲဒီးဘဲးဟိသိလ့ၣ်တခိၣ်န့ၣ်လီၤ ဘၣ်ဃးဒီးတၢ်မၤဟးဂီၤဒ်အံၤန့ၣ်ဘၣ်ယိၤဝဲ ဟီၣ်ကဝီၤတၢ်ပၢၢ်ဆၢသုးတဖၣ်ကနုာ်လီၤလၢခံတဝီန့ၣ် ဟီၣ်ကဝီၤဖိတဲဝဲန့ၣ်လီၤ
ပီအူချီၤကျဲအံၤ နိးတကီဝ့ၢ်ဟီၣ်ကဝီၤဖိတဖၣ်တကးဒံးဘၣ် ဝ့ၢ်အဃၢၢ်သဝီတဖၣ်လၢအမ့ၢ်ဝဲ ပီအူချီၤသဝီ၊ကၠးတူၤရွ့သီၤသဝီဒီးဆဲၣ်အ့ၤစုးသဝီသၢဖျၢၣ်ဘၣ်ပာ်ဂံၢ်ပာ်ဘါသုဝဲလီၤ ခိဖျိလၢမၤဟးဂီၤကျဲဒ်အံၤအဃိ ဟီၣ်ကဝီၤဖိဘၣ်လ့ၣ်လိၣ်သူဝဲဒၣ် ပယီၤသုးပာ်လီၤဃးတြဲၤအလီၢ် သပြ့ၤချ့ၤ ကျဲန့ၣ်ဟီၣ်ကဝီၤပိၣ်မုၣ်တဂၤတဲဝဲန့ၣ်လီၤ
“လၢပီၣ်အူချီၤကျဲန့ၣ်တိၣ်အိၣ်တဘိလီၤ တချူးတုၤလၢတိၣ်ဝဲန့ၣ်အဝဲသ့ၣ်မၤဟးဂီၤဝဲဒီး ဘဲးဟိန့ၣ်လီၤ ကဲထီၣ်ဒ်သိးအကျိၤဒီးသိလ့ၣ်ယီၢ် သိလ့ၣ်လဲၤတန့ၣ်ဘၣ် သဝီတဖၣ်ဘၣ်လဲၤဖဲန့ၣ်လီၤ ခိဖျိလၢမၤဟးဂီၤကျဲဒ်န့ၣ်အဃိ ဘၣ်လဲၤဝဲလၢကျဲအဂၤအဃိယံာ်ထီၣ်လီၤပမ့ၢ်လဲၤဖဲန့ၣ်ပယီၤသုးသမံသမိးပှၤလီၤ”န့ၣ်အဝဲတဲန့ၣ်လီၤ
တကးဒံးဘၣ် နိးတကီဝ့ၢ်ပူၤနာ်က့ ပယီၤသုးတဖၣ်သမံသမိးဃံးထီၣ်န့ၣ်ဟီၣ်ကဝီၤဖိပိၣ်ခွါတဂၤတဲဝဲန့ၣ်လီၤ
“သမံသမိးဝဲသပှၢ်ကတၢၢ်လီၤ သမံသမိးဝဲလီၤတဲစိၤတဖၣ် ထၢၢ်တဖၣ်လီၤ လံာ်အုၣ်သးသိလ့ၣ်ယီၢ်ဒီးသမံသမိးဝဲသိလ့ၣ်ယီၢ်ပူၤတဖၣ်န့ၣ်လီၤ မ့ၢ်ကွာ်ဝဲတဘၣ်မဲာ်န့ၣ်ဃ့စ့န့ၣ်လီၤ”န့ၣ်အဝဲတဲန့ၣ်လီၤ
ပယီၤသုးမၤဟးဂီၤကျဲဒ်အံၤန့ၣ် ဒ်သိးကမၤကီမၤခဲဟီၣ်ကဝီၤဒီသဒၢသုးတဖၣ်ကဘၣ်ကီဘၣ်ခဲလၢဟးထီၣ်က့ၤလီၤအဂီၤ ဒ်သိးသုးတဖၣ်ကဒုးသုးတညီအဂီၤဒီး မၤကီမၤခဲဝဲဟီၣ်ကဝီၤကမျၢၢ်တဖၣ်န့ၣ် SOF ပှၤဘၣ်မူဘၣ်ဒါတဂၤတဲဝဲန့ၣ်လီၤ