လါမ့ၤ ၆သီ၊၂၀၂၃နံၣ်
ကညီကီၢ်စဲၣ် ကီးတရ့းကလံၤထံးတကပၤသဝီတဖၣ်အပူၤ ပယီၤသုးမၤဝဲတၢ်မၤဂီၤတၢ်တပယူၤဃီန့ၣ်ဟီၣ်ကဝီၤဖိတဲဝဲအသိးသ့ၣ်ညါဘၣ်န့ၣ်လီၤ
ပယီၤသုးတဖၣ်အံၤ စးထီၣ်ဖဲလါမ့ၤတၢတနွံန့ၣ် မၤဟးဂီၤသဝီပူၤကျဲတဖၣ် ခးလီၤကျိဖးဒိၣ်လၢသဝီပူၤတဖၣ်လၢ ကီးတရ့းကလံၤထံးသဝီတဖၣ်တကပၤန့ၣ်လီၤ
မၤဟးဂီၤတၢ်ဒ်အံၤတကးဒံးဘၣ် ပယီၤသုးတဖၣ်အံၤဖဲလါမ့ၤ၆သီ ဂီၤ ၁နၣ်ရံၣ်မံးန့း၄၀ဆၢကတီၢ်န့ၣ် ဟဲတ့ၢ်လီၤမ့ၣ်ပိၣ်ဒီးကဘီယူၤဆူ ကီးတရ့းကလံၤစိး စ့ၣ်ဖလါ သဝီပူၤအဃိ တၢ်မၤလိလံာ်ကၠိတဖျၢၣ်ဒီးဟံၣ်ဟးဂီၤ၄ဖျၢၣ်န့ၣ်ဟီၣ်ကဝီၤဖိတဲဝဲန့ၣ်လီၤ
“တ့ၢ်လီၤဝဲ ၁၃ဖျၢၣ် ပိၣ်ဖး၁၂ဖျၢၣ် တဖျၢၣ်န့ၣ်အိၣ်တ့ၢ်ဒ်န့ၣ်လီၤ တပိၣ်ဖးဘၣ် ခးလီၤဝဲလၢ ကၠိအဃၢၢ်လီၤ ကၠိကပၤဟံၣ်တဖၣ်ဟးဂီၤလီၤ ပှၤကညီတဘၣ်ဒိဘၣ် ဟံၣ်တဖၣ်န့ၣ်ဘၣ်ဒိဒီးမ့ၣ်ပိၣ်အက့လီၤ မုၢ်နၤခီအဃိကၠိပူၤပှၤကညီတအိၣ်ဘၣ် ကၠိဒူဟးဂီၤလီၤ”န့ၣ် စ့ၣ်ဖလါ သဝီပူၤဟီၣ်ကဝီၤတဲဝဲန့ၣ်လီၤ
တကးဒံးဘၣ် ဖဲလါယူၤ ၆သီဂီၤ ၉နၣ်ရံၣ်ဆၢကတီၢ် KNLAသုးပာ်ဖှိၣ်တဖၣ်ဒီး ပယီၤသုးအဘၢၢ်စၢၢ်တၢ်ဒုးကဲထီၣ်ဝံၤအလီၢ်ခံ ပယီၤသုးခးလီၤကျိန့ၣ်ကီးတရ့းဝ့ၢ်ဟီၣ်ကဝီၤဖိတဲဝဲန့ၣ်လီၤ
“တၢ်ဒုးကဲထီၣ်လၢခန့မူၣ်သဝီပူၤလီၤ စးထီၣ်လၢ ၉နၣ်ရံၣ်ဘျဲၣ်လီၤ ပတုၤဖဲ၁၁နၣ်ရံၣ်လီၤ အခဲနာ်က့နၣ်ဟူဘၣ် ၉၇သုးခးလီၤကျိဖးဒိၣ်လီၤ သီၣ်ဖးဒိၣ်ဖိညါ ပှၤကညီဘၣ်ဒိဒူတနၣ်ဟူဘၣ်ဒံးဘၣ် ဟးထီၣ်လၢတၢ်ချၢနာ်က့တဘူၣ်ဘၣ်”န့ၣ်ကီးတရ့းဝ့ၢ်ဟီၣ်ကဝီၤဖိတဲဝဲလီၤ
ပယီၤသုးတဖၣ်အံၤ ခီဖျိလၢ မၤဟးဂီၤတၢ်လၢကီးတရ့းကလံၤထံးသဝီတဖၣ်အဃိ ဟီၣ်ကဝီၤကမျၢၢ်တဖၣ် ဘၣ်သဂၢၢ်ဒီးတၢ်ကီတၢ်ခဲလၢ ကိးမုၢ်နံၤအီၣ်အီအိၣ်ဆိးအဂီၤ ၊ကမၤမူကျိၤဝဲၤကွာ်တဖၣ်ဒီးခီဖျိလၢမၤဟးဂီၤသဝီတဖျၢၣ်ဒီးတဖျၢၣ်အဘၢၢ်စၢၢ်ကျဲတဖၣ်အဃိ ဘၣ်ကီဘၣ်ခဲလၢ တၢ်ဟးထီၣ်က့ၤလီၤဒီးတၢ်ပှ့ၤတၢ်အီၣ်တၢ်အီတဖၣ်အဂီၤန့ၣ်လီၤ
