လါစဲးပထ့ဘၢၣ် ၂၁သီ၊၂၀၂၃နံၣ်
ဖဲလါစဲးပထ့ဘၢၣ်အသီ၂၀ မုၣ်ထူၣ် ၂နၣ်ရံၣ်ဃၣ်ဃၣ်ဆၢကတီၢ် ကညီကီၢ်စဲၣ် မၠၣ်ဝတံၣ်ကီၢ်ဆၣ် ပယီၤသုးလၢဆီလီၤသးဖဲ ရွ့ၣ်အ့မၠ့ၣ်ဃိၣ်ခိၣ်တဖၣ်ဘၣ်တၢ်ခးအီၤအဃိ ပယီၤသုး သုးရ့ၣ်ခိၣ်ခံဘၣ်ဒိတဂၤန့ၣ် Cobra Column 2 Venom ထုးထီၣ်တၢ်ကစီၣ်န့ၣ်လီၤ
မၠၣ်ဝတံၣ်ကီၢ်ဆၣ် ရွှ့ၣ်အ့မၠ့ၣ်ဃိၣ်ခိၣ် ပယီၤသုးတဖၣ်အံၤဘၣ်တၢ်ခးအီၤခီဖျိ Cobra Column 2 Venomသုးကျိၤ ၊KNLA ၁၀၃ကရူၢ်၊KTLA ခ့ပွ့ တိခိၣ်ရိၤမဲကရူၢ်တဖၣ် ဒီး ၄၀ မမခံဖျၢၣ်ဖဲမုၣ်ထူၣ် ၁နၣ်ရံၣ် မံးနံး ၃၀ဃၣ်ဃၣ်ဆၢကတီၢ်န့ၣ်လီၤ
ခီဖျိတၢ်လဲၤခးတဘျီအံၤအဃိ ပယီၤသုး သုးရ့ၣ်ခိၣ်ခံ သုးခိၣ်ဒိၣ်စိ ၂ ဟ့စီၣ်လဲး တီခိၣ်ရိၤမဲ ၅၅၉သုးရ့ၣ် သုးခိၣ်ဒိၣ်ဖိ ဝ့ကၠီၣ်ဘၣ်ဒိန့ၣ် လၢလံာ်တၢ်ပာ်ဖျါအပူၤပာ်ဖျါထီၣ်ဝဲန့ၣ်လီၤ
“ပှၤကညီဘၣ်ဒိန့ၣ်တကီၢ်ခါပတဲလီၤတံၢ်တသ့ဘၣ် ပလဲၤခးဝံၤဟါခီဆၢကတီၢ်မးပသ့ၣ်ညါဒီးပာ်ဂၢၢ်ပာ်ကျၢၤက့ၤလီၤ လၢတၢ်အိၣ်သးဖီခိၣ်အဃိပခးဘၣ်ဒၣ်ခံဖျၢၣ်လီၤ”န့ၣ်ပှၤဘၣ်မူဘၣ်ဒါလၢ Cobra Column 2 Venomသုးကျိၤစံးဝဲလီၤ
လဲၤထီၣ်ခးဝဲဒ်အံၤဝံၤအလီၢ်ခံ ပယီၤသုးကီကးတကပၤခးလီၤကျိဖးဒိၣ်နာ်က့ တၢ်ပၢၢ်ဆၢသုးကရူၢ်တကပၤတၢ်ဘၣ်ဒိဘၣ်ထံးတအိၣ်န့ၣ် ပှၤဘၣ်မူဘၣ်ဒါလၢ Cobra Column 2 Venomသုးကျိၤစံးဝဲလီၤ
“ပလဲၤခးဝံၤအဝဲသ့ၣ်ခးကဒါက့ၤကျိဖးဒိၣ်အိၣ်မီနီပသုးမုၢ်သုးဘိတဖၣ်ဘၣ်ဒိတအိၣ်ဘၣ်”န့ၣ်အဝဲစံးဝဲလီၤ
တကးဒံးဘၣ် ပယီၤသုးတကပၤမၤဝဲတၢ်ထီၣ်ဒုးလၢ စူးကလံး၊ဝီၤလ့ၤကျဲဒီဘိသဝီတဖၣ်အပူၤတပယူာ်ဃီန့ၣ်သ့ၣ်ညါဘၣ်န့ၣ်လီၤ
ကညီကီၢ်စဲၣ် မၠၣ်ဝတံၣ်ကီၢ်ဆၣ်ပူၤ ပယီၤသုးစုတီၤဖီလာ် ဝဲၤကျိၤဝဲၤဒၢးတဖၣ် စးထီၣ်ဖဲလါစဲးပထ့ဘၢၣ်အခၢၣ်သးအနွံတဖၣ်န့ၣ် ဘၣ်တၢ်ခးလီၤဒီးဒြိ၊ဘၣ်တၢ်နုာ်လီၤခးတပယူာ်ဃီအဃိ ပယီၤသုးစုတီၤဖိလာ်ပှၤမၤတၢ်ဖိတဖၣ် ဘၣ်ဒိသံအိၣ်န့ၣ်လီၤ
ဖဲအပူၤကွံာ် လါစဲးပထ့ဘၢၣ် ၃သီ မုၢ်နၤခီ ၇နၣ်ရံၣ်ဆၢကတီၢ်ခါနာ်က့ မၠၣ်ဝတံၣ်ဝ့ၢ် ကီၢ်ဆၣ်ပၢၤကီၢ်ဝဲၤဒၢးဘၣ်တၢ်ခးလီၤဒီးဒြိအဃိ မၠၣ်ဝတံၣ်ဝ့ၢ် တၢ်မဲာ်ညါသုးပဒိၣ် အီၣ်ကၠီၣ်မ့ဒီးအဂုၤအဂၤသံ၅ဂၤဝံၤ ဘၣ်ဒိအဂၤ၁၀န့ၣ်လီၤ