လါစဲးပထ့ဘၢၣ် ၈သီ၊၂၀၂၃နံၣ်
ကညီကီၢ်စဲၣ် မၠၣ်ဝတံၣ်ဝ့ၢ် ပၢၤကီၢ်ဒူၣ်ဖိထၢဖိလၢအိၣ်ဆိးဝဲလၢပၢၤကီၢ်ဝဲၤဒၢးပူၤတဖၣ် အိၣ်ဝဲဖဲန့ၣ်တဘူၣ်လၢၤအဃိ ဘၣ်လဲၤအိၣ်ဝဲဆူမၠၣ်ဝတံၣ်ဝ့ၢ်ပူၤဘူးတံၤတဖၣ်အိၣ်န့ၣ်သ့ၣ်ညါဘၣ်လၢပှၤဘူးဒီးပၢၤကီၢ်ဝဲဒၢးတဖၣ်အိၣ်န့ၣ်လီၤ
လါစဲးပထ့ဘၢၣ်၃သီ ဟါခီဆၢကတီၢ် ပယီၤသုးစုတီၤဖီလၣ် ပၢပြးရူဒီးပၢၤကီၢ်ဝဲၤဒၢးတဖၣ် ဘၣ်တၢ်တ့ၤလီၤမ့ၣ်ပိၢ်ဒီးဒြိဝံၤအလီၢ်ခံ ပၢၤကီၢ်ဒူၣ်ဖိထၢဖိလၢအိၣ်ဖဲ ပၢၤကီၢ်ကရၢၤပူၤတဖၣ် အီၣ်အီဝံၤလဲၤအိၣ်ဆိးဝဲလၢမၠၣ်ဝတံၣ်ဝ့ၢ်ပူၤ ဘူးတံၤတဖၣ်အိၣ်န့ၣ်လီၤ
“ဒူၣ်ဖိထၢဖိလၢပၢၤကီၢ်ဝဲၤဒၢးပူၤတဖၣ် ဂီၤခီန့ၣ် က့ၤဖီအီၣ်ဖီအီမ့ဝံၤ ဘိၣ်ဝဲမ့ၤဒီးလဲၤဆူတၢ်ချၢလီၤ တမ့ၢ်ငါအိၣ်ဟံၣ်ဘၣ် အိၣ်ဝဲလၢအဝဲသ့ၣ်အတံၤသကိးတဖၣ်ဟံၣ်န့ၣ်လီၤ”န့ၣ်အဝဲစံးဝဲလီၤ
ပၢၤကီၢ်ဒူၣ်ဖိထၢဖိတဖၣ် လဲၤအိၣ်ဆိးဝဲလၢမၠၣ်ဝတံၣ်ဝ့ၢ်ပူၤန့ၣ်နာ်က့ပယီၤသုးစုဖီလာ်ပၢၤကီၢ်တဖၣ် ဘၣ်တၢ်မၤဃံးဃးတၢ်ဘျၢဒီးကဟးထီၣ်က့ၤလီၤအဂီၤ တညီန့ၣ် အဝဲတဲအါထီၣ်ဝဲလီၤ
“အဝဲသ့ၣ်ထုးထီၣ်တၢ်ကလုာ်လၢ တဘၣ်ဟးထီၣ်တဂ့ၤ ထုးထီၣ်ဝဲဒ်န့ၣ်နာ်ဟ့ ပၢၤကီၢ်ဒူၣ်ဖိထၢဖိဒီးအမါတဖၣ်ဟးထီၣ်ဝဲလီၤ ပှၤဟးထီၣ်တဘူၣ်န့ၣ်အိၣ်ဒၣ်ပၢၤကီၤလီၤ အခဲအဝဲသ့ၣ်အဒူၣ်ဖိထၢဖိအိၣ်လၢတၢ်ချၢ “န့ၣ်အဝဲစံးဝဲလီၤ
မၠၣ်ဝတံၣ်ဝ့ၢ်ပူၤ ပယီၤသုးစုဖီလာ် ဝဲၤကျိၤဝဲၤဒၢးပှၤမၤတၢ်ဖိတဖၣ်၊ပှၤမၤတၢ်ဖိဒူၣ်ဖိထၢဖိတကးဒံးဘၣ်ပှၤအိၣ်ဘူးဒီးပယီၤသုးဝဲၤဒၢးတဖၣ်ဒ်သိးကသုးလီၢ်ကျဲန့ၣ် Federal Wings ဒြိထုးထီၣ်တၢ်ကစီၣ်န့ၣ်လီၤ
ကညီကီၢ်စဲၣ်လီၢ်ကဝီၤတဖၣ်အပူၤ လါယူၤလံ ၊လါအီကူးဒီး တုၤလၢလါစဲးပထ့ဘၢၣ်အတီၢ်ပူၤကီၢ်ဆၣ်တဖၣ်ပူၤ ပယီၤသုးဆီလီၤလီၢ်တဖၣ် ၊ဝဲၤကျိၤဝဲၤဒၢးတဖၣ်၊ပယီၤသုးသိလ့ၣ်ကျိၤတဖၣ် ဘၣ်တၢ်ခးအီၤသတူၢ်ကလၤဒီးဘၣ်တၢ်ခးလီၤမ့ၣ်ပိၢ်ဒီးဒြိအဃိKNLAသုးဂံၢ်ခီၣ်ထံးတဖၣ်စံးဝဲန့ၣ်လီၤ
မၠၣ်ဝတံာ်ကီၢ်ဆၣ်ပၢၤကီၢ်ဝဲၤဒီး ပၢပြးရူဘၣ်တၢ်ခးအီၤဒီးဒြိအဃိ ပယီၤသုးတကပၤ ပဒိၣ်တဖၣ်ဒီးအဂုၤအဂၤသံ၆ဂၤဝံၤ ဘၣ်ဒိအဂၤ၁၀ဒီး ဖဲလါအီကူး ၂၂သီအနံၤနာ်က့ မၠၣ်ဝတံၣ်ဝ့ၢ် ကီၢ်ရ့ၣ် တၢ်ဆါဟံၣ်ဖးဒိၣ်ဘၣ်တၢ်တ့ၤလီၤမ့ၣ်ပိၢ်ဒီးဒြိအဃိ တၢ်ဆါဟံၣ်ပူၤတၢ်သူၣ်ထီၣ်ဟးဂီၤတနီန့ၣ်လီၢ်ကဝီၤဂံၢ်ခီၣ်ထံးတၢ်ကစီၣ်စံးဝဲအသိးသ့ၣ်ညါဘၣ်န့ၣ်လီၤ